អន្តរជាតិ
លោក Nayib Bukele (ឆ្វេង) និង អ្នកស្រី Sanna Marin
×![]()
រាប់ចាប់តាំងពីអាស៊ី អាមេរិក និងអូសេអានី ខាងក្រោមនេះគឺជាមេដឹកនាំទាំង៥នាក់ ដែលបច្ចុប្បន្នជាថ្នាក់ដឹកនាំប្រទេសវ័យក្មេងបំផុតរបស់ពិភពលោក ។ ក្នុងចំណោមនោះ ក៏មានស្ត្រីមេដឹកនាំលេចធ្លោ២រូបផងដែរ ។ 
អ្នកស្រី Sanna Marin នាយករដ្ឋមន្ត្រីហ្វាំងឡង់
មានអាយុត្រឹម ៣៤ឆ្នាំ អ្នកស្រី Sanna Marin បានស្បថចូលកាន់តំណែងជានាយករដ្ឋមន្ត្រីហ្វាំងឡង់ ចាប់តាំងពីថ្ងៃទី ១០ ខែធ្នូ ឆ្នាំ២០១៩ ។ ទោះក្មេងមានពិត អ្នកស្រី មានបទពិសោធន៍ក្រាស់ក្រែលក្នុងជីវិតនយោបាយ មុនពេលកាន់តំណែងកំពូលមួយនេះ។
តួយ៉ាង អ្នកស្រី បានក្លាយជាសមាជិកសភាប្រទេសអឺរ៉ុបនេះ ចាប់តាំងពីឆ្នាំ២០១៥មកម្ល៉េះ ហើយថែមទាំងធ្លាប់ធ្វើជារដ្ឋមន្ត្រីក្រសួងទូរគមនាគមន៍និងដឹកជញ្ជូន ពីថ្ងៃទី ៦ ខែមិថុនា ឆ្នាំ២០១៩ រហូតដល់តំណែងថ្មីជានាយករដ្ឋមន្ត្រី។ អ្នកស្រី Marin ជាស្ត្រីទី៣ហើយដែលក្លាយជានាយករដ្ឋមន្ត្រីរបស់ប្រទេសហ្វាំងឡង់ ។
លោក គីម ជុងអ៊ុន មេដឹកនាំកូរ៉េខាងជើង
លោក គីម ជុងអ៊ុន បានក្លាយមេដឹកនាំកំពូលរបស់ប្រទេស កូរ៉េខាងជើង ចាប់តាំងពីឆ្នាំ២០១១ មកម្ល៉េះ ដោយកាលនោះ លោកមានអាយុត្រឹម២៧ឆ្នាំប៉ុណ្ណោះ។ លោកគឺជាកូនទី២ របស់លោក គីម ជុងអ៊ីល ដែលជាមេដឹកនាំកំពូលរបស់ប្រទេសនេះ ចាប់ពីឆ្នាំ១៩៩៤ រហូតដល់ឆ្នាំ២០១១។
លោក គីម បច្ចុប្បន្នអាយុ ៣៦ឆ្នាំ គឺជាចៅប្រុសរបស់លោក គីម អ៊ីលសុង ដែលជាស្ថាបនិក និងមេដឹកនាំកំពូលទី១របស់កូរ៉េខាងត្បូង ចាប់តាំងពីបង្កើតឡើងក្នុងឆ្នាំ១៩៤៨មក រហូតដល់ទទួលមរណភាពក្នុងឆ្នាំ១៩៩៤។ លោក គីម ជុងអ៊ុន ជាជំនាន់ទី៣ហើយនៃត្រកូល គីម ដែលក្ដោបក្ដាប់អំណាចប្រទេសនេះយ៉ាងណែន។
លោក Nayib Bukele ប្រធានាធិបតី អែលសាល់វ៉ាឌ័រ
អាយុ ៣៩ ឆ្នាំ គិតត្រឹមឆ្នាំ២០២០ លោក Nayib Bukele ក៏ជាប់ឈ្មោះជាមេដឹកនាំក្មេងបំផុតក្នុងពិភពលោកផងដែរ។ លោក បានក្លាយជាប្រមុខរដ្ឋនៃប្រទេសក្នុងតំបន់អាមេរិកកណ្ដាលនេះ ចាប់តាំងពីខែមិថុនា ឆ្នាំ២០១៩ ក្រោយទទួលជោគជ័យក្នុងការបោះឆ្នោតថ្នាក់ជាតិ។ មុនទទួលតំណែងកំពូលនេះ លោក Bukele ធ្លាប់ប្រឡូកក្នុងឆាកនយោបាយ ដោយធ្វើជាអភិបាលក្រិងចំនួន ២ដង ចាប់តាំងពីឆ្នាំ២០១២មក។
អ្នកស្រី Jacinda Ardern នាយករដ្ឋមន្ត្រី នូវែលសេឡង់
អ្នកស្រី Ardern ដែលបច្ចុប្បន្នអាយុ ៤០ឆ្នាំ បានក្លាយជានាយករដ្ឋមន្ត្រីទី៤០របស់នូវែលសេឡង់ ចាប់តាំងពីឆ្នាំ២០១៧មក ។ អ្នកស្រី បានជាប់ឆ្នោតជាសមាជិកសភាលើកដំបូងក្នុងឆ្នាំ ២០០៨ ដោយកាលនោះ អ្នកស្រីមានអាយុត្រឹម២៨ ឆ្នាំប៉ុណ្ណោះ។
ក្រៅពីមានឈ្មោះជាមេដឹកនាំស្ត្រីវ័យក្មេងក្នុងពិភពលោក អ្នកស្រី Ardern ក៏បានក្លាយជាមេដឹកនាំទី២របស់ពិភពលោកដែលបង្កើតកូនក្នុងខែមិថុនា ឆ្នាំ២០១៨ ខណៈកំពុងកាន់តំណែងផងដែរ។ អ្នកទី១ គឺអ្នកស្រី Benazir Bhutto អតីតនាយករដ្ឋមន្ត្រីប៉ាគីស្ថាន។
ព្រះចៅរដ្ឋកាតា Tamim bin Hamad Al Thani
Tamim bin Hamad Al Thani បានក្លាយព្រះចៅមហាម៉ាត់នៃប្រទេសកាតា ក្រោយបិតាសោយទិវង្គត ក្នុងឆ្នាំ២០១៣ ដោយកាលនោះ ទ្រង់មានព្រះជន្មាយុ ៣៣ វស្សាប៉ុណ្ណោះ។ Tamim ជាបុត្រទី៤ របស់អតីតព្រះចៅមហាម៉ាត់ Hamad bin Khalifa Al Thani ។
មានប្រវត្តិមិនធម្មតា ព្រះចៅមហាម៉ាត់នៃប្រទេសសម្បូរប្រេងអង្គនេះ បច្ចុប្បន្នមានព្រះជន្មាយុ ៤០វស្សា ធ្លាប់ត្រូវបានតែងតាំងជាអគ្គមេបញ្ជាការងនៃកងទ័ពកាតា ក្នុងឆ្នាំ២០០៩ ។ ទ្រង់ក៏ជាអ្នកចូលចិត្តលេងកីឡាម្នាក់ ហើយលេងពូកែផងដែរ៕
© រក្សាសិទ្ធិដោយ thmeythmey.com
