ជាតិ
ជប៉ុន នឹងបន្តគាំទ្រកម្ពុជាដើរលើមាគ៌ានៃការអភិវឌ្ឍ តាមបែបប្រជាធិបតេយ្យរបស់ខ្លួន លោក ម៉ូតេហ្គី តូស៊ីមីត្សឹ រដ្ឋមន្ត្រីក្រសួងការបរទេសជប៉ុន បានជួបលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៅប្រទេសជប៉ុនកន្លងមក។
×
រដ្ឋមន្ត្រីការបរទេសជប៉ុនលោក ម៉ូតេហ្គី តូស៊ីមីត្សឹ នឹងមកដល់កម្ពុជា នៅល្ងាចថ្ងៃទី២១ សីហា ក្នុងដំណើរទស្សនកិច្ចរយៈពេល៣ថ្ងៃ (ចាប់ពីថ្ងៃទី២១ ដល់ ២៣ ខែសីហា)។ មុនមកដល់កម្ពុជា រដ្ឋមន្ត្រីការបរទេសជប៉ុន បានផ្ញើសារ និងរម្លឹកអនុស្សាវរីយ៍ ដែលលោកធ្លាប់មកទស្សនកិច្ចច្រើនដងហើយនោះ។
ទិដ្ឋភាពនៅតំបន់អង្គរ គឺជាការចងចាំដ៏មានន័យរបស់លោក ម៉ូតេហ្គី តូស៊ីមីត្សឹ។ តាមរយៈហ្វេសប៊ុកស្ថានទូតជប៉ុនប្រចាំកម្ពុជា បានលើកសាររបស់រដ្ឋមន្ត្រីការបរទេសជប៉ុន មករៀបរាប់ដូច្នេះថា៖«ថ្ងៃនេះខ្ញុំបានមកធ្វើទស្សនកិច្ចនៅប្រទេសកម្ពុជាជាលើកដំបូង ក្រោយពីខ្ញុំបានទទួលដំណែងជារដ្ឋមន្ត្រីក្រសួងការបរទេសជប៉ុន។ កន្លងមកនេះ ខ្ញុំធ្លាប់បានមកធ្វើទស្សនកិច្ចនៅប្រទេសកម្ពុជាប៉ុន្មានលើករួចមកហើយ ហើយអ្វីដែលដិតជាប់នៅក្នុងចិត្តរបស់ខ្ញុំមិនអាចបំភ្លេចបាននោះគឺសម្រស់ថ្ងៃលិចមើលពីប្រាសាទអង្គរវត្ត»។
ក្រៅពីរម្លឹកអនុស្សាវរីយ៍ខ្លួន លោក ម៉ូតេហ្គី តូស៊ីមីត្សឹ ក៏បានលើកពីទំនាក់ទំនងទ្វេរភាគីផងដែរ។ លោករដ្ឋមន្ត្រីការបរទេសជប៉ុន បាននិយាយថា កិច្ចសហប្រតិបត្តិការរវាងប្រទេសទាំងពីរកាន់តែរឹងមាំឡើង ជាពិសេសនៅក្នុងអំឡុងពេលរាតត្បាតនៃជំងឺកូវីដ-១៩ ដែលជប៉ុនបានផ្ដល់ជំនួយឧបត្ថម្ភដែលគិតជាទឹកប្រាក់សរុបជិត៥០លានដុល្លារ តាមរយៈការផ្តល់បរិក្ខារវេជ្ជសាស្ត្រ និងកែលម្អមន្ទីរពេទ្យបង្អែកខេត្តសៀមរាប(៤,២០០លានយ៉េន) ព្រមទាំងជំនួយបច្ចេកទេសតាម និងសម្ភារៈផ្សេងៗ (ក្នុងទឹកប្រាក់ប្រមាណ១ពាន់លានយ៉េន) តាមរយៈអង្គការអន្តរជាតិជាដើម។
រដ្ឋមន្ត្រីការបរទេសជប៉ុន លោក ម៉ូតេហ្គី តូស៊ីមីត្សឹ តាមរយៈស្ថានទូតជប៉ុនប្រចាំកម្ពុជា បានថ្លែងដូច្នេះថា៖«ចំណាត់ការលើវិធានការកូវីដ១៩ទាំងនេះ ក៏បានធ្វើឲ្យទំនាក់ទំនងរវាងប្រទេសទាំងពីរកាន់តែមានភាពរឹងមាំផងដែរ។ ដើម្បីពង្រឹងទំនាក់ទំនងនេះបន្ថែមទៀត យើងនឹងបន្តកិច្ចពិភាក្សាជាមួយរាជរដ្ឋាភិបាលកម្ពុជាដើម្បីបើកឡើងវិញនូវការផ្លាស់ប្តូររវាងប្រជាជន និងប្រជាជនក្នុងវិស័យធុរកិច្ចតាមលក្ខណៈសមស្របនឹងការការពារការឆ្លងរាលដាលសារជាថ្មីនៃកូវីដ១៩។ ម្យ៉ាងវិញទៀត ខ្ញុំក៏មានបំណងជំរុញនូវសាមគ្គីភាពឆ្ពោះទៅរកការស្តារសេដ្ឋកិច្ច និងការអភិវឌ្ឍក្រោយពេលដែលការរីករាលដាលកូវីដ១៩នេះត្រូវបានបញ្ចប់ផងដែរ»។
មិនត្រឹមតែប៉ុណ្ណោះ រដ្ឋមន្ត្រីការបរទេសជប៉ុនរូបនេះ ក៏ប្ដេជ្ញាជួយកម្ពុជា ឱ្យដើរលើផ្លូវប្រជាធិបតេយ្យខ្លួនដែរ។»ប្រទេសជប៉ុននឹងបន្តផ្តល់ការគាំទ្រដើម្បីឲ្យប្រទេសកម្ពុជាអាចដើរលើមាគ៌ាសំដៅទៅរកទិសដៅនៃការអភិវឌ្ឍតាមបែបប្រជាធិបតេយ្យរបស់ខ្លួន ដោយបញ្ចូលកម្លាំងយុវជនជាសសរទ្រូង»។ នេះជាការលើកឡើងរបស់លោក ម៉ូតេហ្គី ដែលបានមើលឃើញពីសក្ដានុពលយុវជនកម្ពុជា ។
រដ្ឋមន្ត្រីការបរទេសជប៉ុនរូបនេះ បាននិយាយដូច្នេះថា៖«កាលពីខែមករាឆ្នាំនេះ ខ្ញុំបានជួបជាមួយយុវជនកម្ពុជាដែលមានចំណាប់អារម្មណ៍លើនយោបាយចំនួន១០រូប ដែលបានមកធ្វើទស្សនាកិច្ចនៅប្រទេសជប៉ុន ហើយពួកគាត់ទាំងអស់គ្នាបានសម្តែងចេញនូវស្មារតីចង់អភិវឌ្ឍប្រទេសរបស់ខ្លួនខ្លាំងណាស់។ ប្រទេសកម្ពុជាមានធនធានមនុស្សប្រៀបដូចជាកំពូលនៃប្រាសាទអង្គរវត្ត និងប្រាសាទអង្គរធំ ដែលត្រូវបានទ្រដោយថ្មរឹងមាំដាក់បន្តុបលើគ្នាជាច្រើនដើម្បីឲ្យខ្ពស់។ ម្យ៉ាងវិញទៀត ដូចគ្នានឹងយុគសម័យអង្គរដែលបានរីកចម្រើនលូតលាស់ដោយការរួមរស់ជាមួយគ្នា និងការលាយបញ្ចូលគ្នារវាងសាសនាហិណ្ឌូ និងព្រះពុទ្ធសាសនា ប្រទេសកម្ពុជាមានប្រវត្តិ និងប្រពៃណីទទួលយកវប្បធម៌ គំនិតខុសៗគ្នា និងធនធានមនុស្សផ្សេងៗគ្នាផងដែរ»។
ក្នុងដំណើរទស្សនកិច្ច៣ថ្ងៃ ចាប់ពីថ្ងៃទី២១ ដល់២៣ សីហា រដ្ឋមន្ត្រីការបរទេសជប៉ុន លោក ម៉ូតេហ្គី តូស៊ីមីត្សឹ នឹងត្រូវជួបសម្តេចនាយករដ្ឋមន្ត្រី ហ៊ុន សែន និងលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លើបញ្ហាទ្វេភាគី និងពហុភាគីមួយចំនួន ដែលជាចំណាប់អារម្មណ៍រួម។ ជាពិសេសការពង្រឹងកិច្ចសហប្រតិបត្តិការ នៃភាពជាដៃគូយុទ្ធសាស្ត្ររវាងប្រទេសទាំងពីរ ឱ្យកាន់តែរីកចម្រើនថែមទៀត៕
Tag:
ការទូតកម្ពុជា-ជប៉ុន
© រក្សាសិទ្ធិដោយ thmeythmey.com