សង្គមអន្តរជាតិ
អន្តរជាតិ
បន្ទាប់ពីអារ៉ាប់រួម ស៊ូដង់និងបារ៉ែន អាចជាប្រទេសបង្កើតចំណងការទូតជាមួយអ៊ីស្រាអែល រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ ធ្វើដំណើរទស្សនកិច្ចនៅអ៊ីស្រាអែល ស៊ូដង់ បារ៉ែន និងអេមីរ៉ាតអារ៉ាប់រួម។ រូបភាព Xinhua
× រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅថ្ងៃទី២៤ ខែសីហា បានចាប់ផ្ដើមដំណើរទស្សនកិច្ចមួយជុំទៅកាន់អ៊ីស្រាអែល ស៊ូដង់ អេមីរ៉ាតអារ៉ាប់រួម និងបារ៉ែន។ ដំណើរទស្សនកិច្ចនេះ នឹងផ្ដោតលើទំនាក់ទំនងថ្មីថ្មោងរវាងអ៊ីស្រាអែល និងអេមីរ៉ាត់អារ៉ាប់រួម និងការជំរុញឲ្យប្រទេសក្នុងតំបន់ផ្សេងទៀតរាប់រកអ៊ីស្រាអែលជាផ្លូវការផងដែរ។
លោក ម៉ៃ ប៉ុមប៉េអូ នឹងទៅដល់ទឹកដីអ៊ីស្រាអែលនៅថ្ងៃទី២៤ ខែសីហា ហើយជួបជាមួយនាយករដ្ឋមន្ត្រី បេនចាមីន ណេតាន់យ៉ាហ៊ូ ។ នេះបើតាមការប្រកាសរបស់ក្រសួងការបរទេសអាមេរិកនៅថ្ងៃទី២៣ ខែសីហា។ មុនជំនួបជាមួយប្រមុខការទូតអាមេរិក លោក ណេតាន់យ៉ាហ៊ូ និយាយថា លោក និងលោក ប៉ុមប៉េអូ នឹងជជែកពីការពង្រីករង្វង់សន្តិភាពក្នុងតំបន់ ហើយនឹងមានប្រទេសច្រើនទៀត នឹងបង្កើតទំនាក់ទំនងជាមួយអ៊ីស្រាអែលក្នុងពេលដ៏ខ្លី។
ចេញពីអ៊ីស្រាអែល លោក ម៉ៃ ប៉ុមប៉េអូ ក៏នឹងទៅស៊ូដង់ បារ៉ែន និងអេមីរ៉ាតអារ៉ាប់រួមផងដែរ។ អេមីរ៉ាតអារ៉ាប់រួម ទើបឈានដល់កិច្ចព្រមព្រៀងបង្កើតទំនាក់ទំនងជាមួយអ៊ីស្រាអែលនៅពេលថ្មីៗនេះ ក្រោមការត្រួសត្រាយផ្លូវដោយអាមេរិកផ្ទាល់។ ទាំងអាមេរិក ទាំងអ៊ីស្រាអែលជឿថា កិច្ចព្រមព្រៀងនេះ នឹងផ្ដល់ពន្លឺដល់ប្រទេសក្នុងតំបន់ឲ្យរាប់រកអ៊ីស្រាអែលដូចគ្នាដែរ។ ស៊ូដង់ និងបារ៉ែន ត្រូវបានមើលឃើញថា ជាប្រទេសបន្ទាប់។
«អំឡុងទស្សនកិច្ចនេះ លោក ប៉ុមប៉េអូ នឹងពិភាក្សាបញ្ហាសន្តិសុខតំបន់ទាក់ទងឥទ្ធិពលរបស់អ៊ីរ៉ង់ ក៏ដូចជាការបង្កើត និងការធ្វើឲ្យស៊ីជម្រៅទំនាក់ទំនងរបស់អ៊ីស្រាអែលក្នុងតំបន់។» ក្រសួងការបរទេសអាមេរិកបញ្ជាក់បែបនេះ។ ត្រង់ចំណុចនេះ លោក ប៉ុមប៉េអូ នឹងបន្តបញ្ចុះបញ្ចូលស៊ូដង់ និងបារ៉ែនឲ្យទទួលស្គាល់អ៊ីស្រាអែលថែមទៀត។
មុនការប្រកាសកិច្ចព្រមព្រៀងរវាងអ៊ីស្រាអែល និងអេមីរ៉ាតអារ៉ាប់រួម នៅប្លុកប្រទេសតំបន់អារ៉ាប់ មិនថាមជ្ឈិមបូព៌ា ឬក៏អាចរាប់បញ្ចូលប្រទេសកាន់សាសនាឥស្លាមភាគច្រើន មានតែអេហ្ស៊ីប និងហ្ស៊កដានីប៉ុណ្ណោះដែលបានចុះកិច្ចព្រមព្រៀងសន្តិភាពជាមួយអ៊ីស្រាអែល។ ភាគច្រើននៃប្រទេសនេះ មិនដែលទទួលស្គាល់អ៊ីស្រាអែលឡើយ ហើយបន្តគាំទ្រប៉ាឡេស្ទីនក្នុងការក្លាយជារដ្ឋឯករាជ្យ។
យ៉ាងណាមិញ ក្រោមការសម្របសម្រួលពីសំណាក់រដ្ឋបាលប្រធានាធិបតី ដូណាល់ ត្រាំ ប្រទេសក្នុងតំបន់ភាគច្រើន ចាប់ផ្ដើមគិតគូរពីលទ្ធភាពក្នុងការធ្វើមិត្តជាមួយអ៊ីស្រាអែល ខណៈអ៊ីស្រាអែលផ្ទាល់ ក៏ខិតខំចរចាជាសម្ងាត់ជាមួយប្រទេសនានាផងដែរ។ កាលពីសប្ដាហ៍មុន អ្នកនាំពាក្យក្រសួងការបរទេសស៊ូដង់ ត្រូវបណ្ដេញចេញក្រោយទម្លាយរឿងចរចាជាមួយអ៊ីស្រាអែល។
បើតាមក្រសួងការបរទេសអាមេរិក នៅស៊ូដង់ លោក ប៉ុមប៉េអូ នឹងជាមួយនាយករដ្ឋមន្ត្រី Abdalla Hamdok ដើម្បីបង្ហាញការគាំទ្ររបស់អាមេរិកលើការជំរុញទំនាក់ទំនងរវាងអ៊ីស្រាអែល និងស៊ូដង់។ នៅបារ៉ែន រដ្ឋមន្ត្រីការបរទេសអាមេរិក នឹងជួបជាមួយរជ្ជទាយាទ សាល់ម៉ាន ប៊ីន ហាម៉ាដ អាល់-ខាលីហ្វា រួចបន្តជួបរដ្ឋមន្ត្រីការបរទេសអេមីរ៉ាតអារ៉ាប់រួម អាប់ឌុឡាហ៍ ប៊ីន ហ្សាយេដ អាល់-ណាយ៉ាន់ ដើម្បីពិភាក្សាកិច្ចព្រមព្រៀងជាមួយអ៊ីស្រាអែល៕
Tag:
អាមេរិក
អ៊ីស្រាអែល
ស៊ូដង់
បារ៉ែន
អេមីរ៉ាតអារ៉ាប់រួម
© រក្សាសិទ្ធិដោយ thmeythmey.com