ជាតិ
កម្មកររោងចក្រផេកធីកនៅខេត្តសៀមរាប តវ៉ាឲ្យក្រុមហ៊ុនបើកប្រាក់អតីតភាពការងារ កាលពីថ្ងៃទី២៧ សីហា ២០២០។ (រូបផ្ដល់ដោយ លោក ទូច កុសល)
×![]()
ដោយ: ឡាយ សុភាវតី
ភ្នំពេញ៖ កម្មកររោងចក្រផេកធីក(Pactics Cambodia Co., Ltd)នៅសៀមរាប បានទាមទារនៅឲ្យក្រុមហ៊ុនបើកប្រាក់អតីតការងារ តាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាល នៅថ្ងៃទី២៨ សីហានេះ ។ 
លោក ម៉េត រ៉ាត មេសហជីពរបស់កម្មករផេកធីក ថ្លែងប្រាប់ ThmeyThmey ថា ការតវ៉ានេះ ដោយសារភាគីក្រុមហ៊ុនជំទាស់មិនបើកប្រាក់អតីតភាពការងារឲ្យកម្មករ ក្រោមហេតុផលរងផលប៉ះពាល់ដោយសារកូវីដ-១៩ ខណៈដែលគ្មានអ្នកបញ្ជាទិញទំនិញពីរោងចក្រ។
បើតាមលោក ម៉េត រ៉ាត ក្រុមកម្មករទាំងនោះ ក៏បានស្នើឱ្យរោងចក្រ ទទួលយករូបលោក និងលោក ពីង ទាវ ចូលបំពេញការងារសហជីពវិញដែរ ក្រោយពីក្រុមហ៊ុនបានបញ្ឈប់ការងារ ដោយគ្មានហេតុផលច្បាស់លាស់ដោយសារការទាមទារឲ្យមានការបើកប្រាក់អតីតភាពការងារឲ្យកម្មករនេះ។ លោក ម៉េត រ៉ាត អះអាងថា រោងចក្រផេកធីក ជារោងចក្រកាត់ដេ ប៉ុន្តែមិនបានតាមអនុវត្តគោលការណ៍ប្រាក់ឈ្នួលអប្បបរមា ។
«វិវាទទាមទារឲ្យបើកប្រាក់អតីតភាពការងារនេះ ក្រុមប្រឹក្សាអាជ្ញាកណ្ដាលបានបង្គាប់ឲ្យភាគីក្រុមហ៊ុនរោងចក្របើកប្រាក់ឲ្យកម្មករហើយ ប៉ុន្តែក្រុមហ៊ុនជំទាស់ថាគ្មានអ្នកបញ្ជាទិញ។ ប៉ុន្តែការផលិតក្នុងរោងចក្រឃើញដំណើរការរហូត រួមទាំងរើសបុគ្គលិកបន្ថែមទៀតផង។ ដោយសារខ្ញុំជាតំណាងទាមទារវិវាទនេះ បានខ្ញុំរងការបញ្ឈប់ការងារ ទើបកម្មករក៏សម្រេចចិត្តតវ៉ា ហើយអ្វីដែលសំខាន់នោះ គឺកម្មករខ្លះទទួលបានប្រាក់ខែក្រោមប្រាក់អប្បបរមានៃវិស័យកាត់ដេរ»។ នេះបើតាមការលើកឡើងរបស់ លោក ម៉េត រ៉ាត។
ជុំវិញបញ្ហានេះ លោក ផេង ឆេងលី ប្រធានការិយាល័យដោះស្រាយវិវាទខេត្តសៀមរាប បានប្រាប់សារព័ត៌មានថ្មីៗតាមទូរសព្ទថា ការទាមទាររបស់កម្មករ គឺត្រឹមត្រូវតែមួយចំណុចប៉ុណ្ណោះ ទាក់ទងនឹងការបើកប្រាក់អតីតភាពការងារ មុនឆ្នាំ២០១៩ និង២០២០។ ដោយឡែកពីរចំណុចទៀត កម្មករមិនទាន់បានដោះស្រាយតាមនីតិវិធីនៃច្បាប់នោះទេ។
លោក ឆេងលី ថ្លែងថា៖ «ចំណុចនៃការទាមទារឲ្យក្រុមហ៊ុនអនុវត្តប្រាប់អប្បបរមានៃវិស័យកាត់ដេរ ខាងក្រុមប្រឹក្សាអាជ្ញាកណ្ដាលមិនទាន់បានទទួលសំណុំរឿងដោះស្រាយនៅឡើយទេ។ អ៊ីចឹងហើយបើទាមទារគឺវាខុស។ ហើយទាមទារឲ្យសហជីពពីររូបចូលធ្វើការវិញក៏ខុសដែរ ព្រោះរឿងនេះកម្មករបានបញ្ជូនទៅរដ្ឋមន្ត្រីការងារជាសម្រេច ប៉ុន្តែមិនទាន់ចេញសេចក្ដីសម្រេចផង គាត់ធ្វើការទាមទារ។ ទាំងពីរចំណុចនេះ គឺអនុវត្តខុសពីនីតិវិធីនិងមិនទាន់អស់លទ្ធភាព»។
កន្លងមកក្រុមហ៊ុនផេកធី អះអាងថា ខ្លួនបានបញ្ជីនៅក្រសួងពាណិជ្ជកម្ម ជាក្រុមហ៊ុនផលិតក្រណាត់ជូតវ៉ែនតាប៉ុណ្ណោះ ពោលគឺមិនមែនជាប្រភេទរោងចក្រកាត់ដេរឡើយ។ ដូច្នេះភាគីក្រុមហ៊ុនមិនអនុវត្តតាមគោលការណ៍វិស័យកាត់ដេរ ដែលត្រូវបើកប្រាក់អតីតភាពការងារនិងប្រាក់អប្បបរមានោះទេ។ នេះបើតាមលោក ផេង ឆេងលី ប្រធានការិយាល័យដោះស្រាយវិវាទខេត្តសៀមរាប ដែលបានសាកសួរទៅភាគីក្រុមហ៊ុន។
តែយ៉ាងណា ការបកស្រាយរបស់ក្រុមហ៊ុននេះ ហាក់មិនដូចជាស្ថានភាពជាក់ស្ដែងឡើយ។ បើតាមការចុះពិនិត្យជាក់ស្ដែងវិញ លោក ឆេងលី អះអាងថា ក្រុមហ៊ុននេះ មានផលិតក្រណាត់ជូតវ៉ែនតា កាបូប រួមទាំងមានម៉ាស៊ីកាត់ដេរទៀតផង។
លោក ឆេងលី បានសង្កត់ធ្ងន់ថា៖« ដើម្បីដោះស្រាយបញ្ហានេះបាន ទាល់តែមានភាគីនៃក្រសួងពាក់ព័ន្ធឬគណកម្មការណាមួយកំណត់ជាថ្មីថា រោងចក្រនេះជាប្រភេទរោងចក្រកាត់ដេរឬមិនមែន ទើបដោះស្រាយបានឆាប់»។
លោក ម៉េត រ៉ាត តំណាងកម្មករ បានអះអាងថា លោកនិងកម្មករនឹងពិភាក្សាគ្នាបន្តទៀត ដើម្បីរកដំណោះស្រាយធ្វើយ៉ាងណា ឲ្យទទួលបានអត្ថប្រយោជន៍នៃកម្លាំងការងាររបស់ខ្លួនមកវិញ៕
Tag:
កម្មករ
រោងចក្រកាត់ដេរ
សៀមរាប
© រក្សាសិទ្ធិដោយ thmeythmey.com
