លោក លី តារា នឹងប្រមូលសៀវភៅ Possible Crush មកវិញ

ជាតិ

សង្គមជាតិ

លោក លី តារា នឹងប្រមូលសៀវភៅ Possible Crush មកវិញ

29, Aug 2020 , 10:57 am

រូបភាព

លោក លី តារា ជួបជាមួយតំណាងក្រសួងវប្បធម៌ និងក្រុមប្រឹក្សាជាតិភាសាខ្មែរដើម្បីបកស្រាយពីសៀវភៅខ្លួន។ រូបថត ក្រសួងវប្បធម៌

ដោយ: ប៉ូ សាគុន

ភ្នំពេញ៖ ក្រៅពីការទទួលស្គាល់កំហុសឆ្គងដោយអចេតនា លោក លី តារា សន្យាជាមួយក្រសួងវប្បធម៌ និងវិចិត្រសិល្បៈ ថានឹងប្រមូលសៀវភៅ Possible Crush ដែលបានចេញផ្សាយរួចហើយមកវិញ និងកែប្រែមិនឱ្យមានកំហុសឆ្គងបែបនេះ កើតឡើងទៀតនៅថ្ងៃអនាគត។

អត្ថបទទាក់ទង

ក្រសួងវប្បធម៌ហៅលោក លី តារា ម្ចាស់សៀវភៅ “Possible Crush” ទៅជួបប្រជុំ ក្រោយផ្ទុះប្រតិកម្ម

ម្ចាស់ស្នាដៃ «Possible Crush»៖ ខ្ញុំនឹងយកការរិះគន់មកពិចារណា និងកែលម្អបន្ថែម

កាលពីថ្ងៃទី២៨ ខែសីហា លោក លី តារា បានទៅតាមការអញ្ជើញរបស់ក្រសួងវប្បធម៌ និងវិចិត្រសិល្បះ ដើម្បីបកស្រាយបំភ្លឺអំពីការបោះពុម្ពផ្សព្វផ្សាយសៀវភៅ Possible Crush ដែលមានផ្នែកខ្លះបានប្រើប្រាស់ អក្សរឡាតាំងកត់សូរភាសាខ្មែរ។

ក្នុងជំនួបដែលមានការចូលរួមពីតំណាងក្រុមប្រឹក្សាជាតិភាសាខ្មែរផងនោះ លោក លី តារា ទទួលស្គាល់កំហុស ឆ្គងដែលកើតមានដោយអចេតនា និងដោយពុំបានគិតគូរគ្រប់ជ្រុងជ្រោយ។ លោកបានសន្យាប្រមូលសៀវភៅ ដែលបានចេញផ្សាយហើយនោះមកវិញ ហើយនឹងធ្វើការកែប្រែកុំឲ្យមានកំហុសឆ្គងបែបនេះកើតមានទៀត។

សារព័ត៌មានថ្មីៗ មិនទាន់អាចសុំការបញ្ជាក់បន្ថែមពីលោក លី តារា បាននៅឡើយទេ ជុំវិញការកែប្រែកំហុសឆ្គងនៅក្នុងសៀវភៅ Possible Crush ត្រង់ចំណុចការសរសេរអក្សរឡាតាំង សំនៀងខ្មែរ និងការងារបន្ទាប់ ដោយទូរសព្ទចូលមិនមានអ្នកទទួល។

សូមបញ្ជាក់ថាសៀវភៅ Possible Crush ដែលលក់ចេញបានចំនួន ១០០ក្បាលទៅហើយនោះ ទទួលរងការរិះគន់ខ្លាំង លើបណ្ដាញសង្គមហ្វេសប៊ុក ត្រង់ចំណុចការសរសេរអក្សរឡាតាំង សំនៀងខ្មែរ ដែលមហាជនយល់ថា នេះគឺជាការបំផ្លាញអក្សរសាស្ត្រជាតិ៕