ពេលចូលរៀនវិញ! ក្រសួងអប់រំហាមអាជីវករលក់ចំណីអាហារនៅបរិវេណសាលា ដើម្បីបង្ការជំងឺកូវីដ-១៩

ជាតិ

សង្គមជាតិ

ពេលចូលរៀនវិញ! ក្រសួងអប់រំហាមអាជីវករលក់ចំណីអាហារនៅបរិវេណសាលា ដើម្បីបង្ការជំងឺកូវីដ-១៩

01, Sep 2020 , 4:11 pm

រូបភាព

ទិដ្ឋភាពសិស្សានុសិស្សទិញចំណីអាហារ ឬទឹកភេសជ្ជៈនៅក្នុងវិទ្យាល័យព្រះស៊ីសុវត្ថិភាពកាលអំឡុងក្រសួងអប់រំមិនទាន់ប្រកាសឲ្យបិទសាលា

ដោយ:

ភ្នំពេញ៖ ក្រសួងអប់រំ ហាមមិនឲ្យអាជីវករលក់ចំណីអាហារ នៅខាងក្នុង និងក្រៅសាលារៀន ដែលនឹងបើកទ្វារឲ្យសិស្សចូលរៀនវិញ ក្នុងដំណាក់កាលទី២នេះឡើយ ដើម្បីបង្ការជំងឺកូវីដ-១៩។ នេះបើយោងតាមគោលការណ៍ស្តង់ដាសុវត្ថិភាព(SOP)ក្នុងបរិបទកូវីដ-១៩ របស់ក្រសួងអប់រំ យុវជន និងកីឡា។

សាលារៀនខ្លះ នឹងត្រូវអនុញ្ញាតឲ្យបើកទ្វារវិញ នាថ្ងៃទី៧ កញ្ញានេះ។ ដូច្នេះក្រសួងអប់រំ ណែនាំឲ្យមាតាបិតា ឬអាណាព្យាបាលសិស្ស ត្រូវរៀបចំចំណីអាហារ ទឹក និងភេសជ្ជៈផ្សេងៗ ដែលប្រកបដោយសុវត្ថិភាពខ្ពស់សម្រាប់ទុកឲ្យកូនបរិភោគនៅសាលា ដើម្បីជៀសវាងបរិភោគអាហាររួមដែលជាប្រភពចម្លងមេរោគលឿន។

ចំពោះគ្រូ និងបុគ្គលិកសាលាទាំងអស់ក៏ត្រូវរៀបចំម្ហូបអាហារដោយវេចខ្ចប់ពីផ្ទះយកមកបរិភោគនៅសាលាផងដែរ ។ នោះក៏ព្រោះតែក្រសួងអប់រំហាមអាជីវករលក់ចំណីអាហារនៅបរិវេណសាលារៀន ដើម្បីបង្ការជំងឺកូវីដ-១៩។

លោក រស់ សុវាចា អ្នកនាំពាក្យក្រសួងអប់រំ ប្រាប់សារព័ត៌មានថ្មីៗថា៖«អំឡុងសាលារៀននីមួយៗបើកដំណើរការវិញ គឺមិនអនុញ្ញាតឲ្យមានការលក់ដូរចំណីអាហារនៅតាមសាលារៀនឡើយ»។

បើតាមក្រសួងអប់រំ សាលារៀនដែលតែងមានកម្មវិធីផ្តល់ស្បៀងអាហារសម្រាប់សិស្សដោយប្រើប្រាស់កសិផលក្នុងសហគមន៍ ក៏ត្រូវផ្អាកមួយរយៈផងដែរ។

ដើម្បីធានាដល់សុវត្ថិភាពសិស្សានុសិស្ស ក្រសួងអប់រំបានណែនាំឲ្យគណៈគ្រប់គ្រងសាលា អាណាព្យាបាលរួមគ្នាអនុវត្តតាមការណែនាំរបស់ក្រសួងសុខាភិបាល។ បើតាមក្រសួងអប់រំ មាតាបិតាសិស្សគឺសុទ្ធតែឯកភាពបញ្ជូនកូនមករៀននៅសាលា ហើយក៏ទទួលខុសត្រូវលើហានិភ័យផ្សេងៗដែលកើតឡើងនៅសាលាទៀតផង។

ក្រសួងអប់រំបញ្ជាក់ថា ក្នុងករណីដែលសិស្សសាលាសង្ស័យថាមានជំងឺកូវីដ-១៩ ខាងសាលារៀន អាណាព្យាបាលសិស្ស និងអ្នកពាក់ព័ន្ធផ្សេងទៀតនឹងចេញថ្លៃធ្វើតេស្តរកជំងឺកូវីដ-១៩។ បើលទ្ធផលមានជំងឺកូវីដ-១៩មែន ភាគីខាងលើនឹងចេញថ្លៃព្យាបាល។ ប៉ុន្តែបើមានការផ្ទុះឡើង នូវជំងឺកូវីដ-១៩ នៅក្នុងសាលាណាមួយ សាលានោះគឺត្រូវដោះស្រាយ និងទទួលខុសត្រូវ។

ក្រសួងអប់រំផ្តល់សិទ្ធិឲ្យសិស្សណាដែលមិនចង់ត្រឡប់មកសាលាវិញ អាចបន្តការរៀនតាមអនឡាញបាន ហើយក្រសួងក៏អនុញ្ញាតឲ្យអ្នកសិក្សាអាចព្យូរការសិក្សាមួយរយៈបានទៀតផង។

សូមបញ្ជាក់ថា ក្រសួងអប់រំអនុញ្ញាតឲ្យសិស្សអាចត្រឡប់ទៅរៀន នៅតាមសាលាវិញគឺត្រឹមតែ២ ទៅ៣ថ្ងៃ ក្នុងមួយសប្តាហ៍ ហើយសល់ប៉ុន្មានទៀតគឺត្រូវបន្តរៀនតាមអនឡាញវិញ៕

អត្ថបទទាក់ទង

ឌីប្លូមប្រឡងថ្ងៃទី៣០ ខែវិច្ឆិកា រីឯបាក់ឌុបនៅថ្ងៃទី២១ ខែធ្នូ

រដ្ឋមន្ត្រីអប់រំ៖ ការបើកសាលារៀនឡើងវិញ មិនមែនបើកទាំងប្រថុយប្រថានឡើយ

ដំណើរការសាលាឡើងវិញ ប៉ុន្តែបន្តរៀនអនឡាញ៣ថ្ងៃ និងការគោរពលក្ខខណ្ឌផ្សេងៗ