លោក ស៊ូហ្កា មនុស្សជំនិតលោក អាបេ មានសង្ឃឹមខ្ពស់ក្នុងការធ្វើនាយករដ្ឋមន្ត្រី

អន្តរជាតិ

លោក ស៊ូហ្កា មនុស្សជំនិតលោក អាបេ មានសង្ឃឹមខ្ពស់ក្នុងការធ្វើនាយករដ្ឋមន្ត្រី

01, Sep 2020 , 10:59 pm

រូបភាព

បេក្ខជនដែលនឹងអាចស្នងតំណែងពីលោក ស៊ិនហ្សូ អាបេ៖ អតីតរដ្ឋមន្រ្តីការពារជាតិ ស៊ីហ្កេរូ អ៊ីស៊ីបា(ឆ្វេង), អតីតរដ្ឋមន្រ្តីការបរទេស ហ្វូមីអូ គីស៊ីដា (កណ្ដាល) និងលោក យូស៊ីហ៊ីដេ ស៊ូហ្កា (ស្ដាំ)។

ដោយ: តន ចាន់រិទ្ធារ៉ា

លោក យូស៊ីហ៊ីដេ ស៊ូហ្កា (Yoshihide Suga) មនុស្សជំនិតលោកនាយករដ្ឋមន្ត្រី ស៊ិនហ្សូ អាបេ កំពុងនាំមុខអ្នកនយោបាយផ្សេងទៀតក្នុងការប្រកួតប្រជែងតំណែងប្រធានបក្សប្រជាធិបតេយ្យសេរី (LDP) ដែលជាបក្សកាន់អំណាច និងឈានទៅកាន់តំណែងនាយករដ្ឋមន្ត្រីបន្តពីលោក អាបេ ។ លោក ស៊ូហ្កា ទទួលបានការគាំទ្រពីសមាជិកធំៗក្នុងជួរបក្ស ស្របពេលបក្ស LDP ក៏បានកំណត់របៀបបោះឆ្នោតថ្មី ដែលត្រូវបានមើលឃើញថា ផ្ដល់ផលចំណេញឲ្យលោកផងដែរ។

សព្វថ្ងៃ លោក យូស៊ីហ៊ីដេ ស៊ូហ្កា ជាប្រធានលេខាធិការគណៈរដ្ឋមន្ត្រី ដែលជាតំណែងសំខាន់មួយក្នុងរដ្ឋាភិបាលជប៉ុន។ ជាអ្នកនាំពាក្យកំពូលរបស់រដ្ឋាភិបាលផងនោះ លោក ស៊ូហ្កា ដើរតួនាទីសំខាន់ក្នុងការសម្របសម្រួលការអនុវត្តគោលនយោបាយរវាងក្រសួង និងស្ថាប័នរដ្ឋនានា ដែលនេះធ្វើឲ្យលោកក្លាយជាមន្ត្រីមានអំណាចមួយក្នុងគណៈរដ្ឋមន្ត្រីលោក ស៊ិនហ្សូ អាបេ ។

យ៉ាងណាមិញ លោក ស៊ូហ្កា មិនទាន់ប្រកាសជាផ្លូវការក្នុងការប្រជែងកៅអីប្រធានបក្សប្រជាធិបតេយ្យសេរី ដែលនឹងធានាកៅអីនាយករដ្ឋមន្ត្រីជំនួសលោក អាបេ ឡើយ។ ប្រព័ន្ធផ្សព្វផ្សាយក្នុងស្រុកជប៉ុនរាយការណ៍ថា លោក ស៊ូហ្កា នឹងប្រកាសចូលរួមផ្លូវការនៅថ្ងៃទី២ ខែកញ្ញាខាងមុខ។ លោក ស៊ូហ្កា នឹងត្រូវប្រជែងជាមួយអតីតរដ្ឋមន្ត្រីការពារជាតិ ស៊ីហ្កេរូ អ៊ីស៊ីបា និងអតីតរដ្ឋមន្ត្រីការបរទេស ហ្វូមីអ៊ូ គីស៊ីដា ជាដើម។

ទោះមិនទាន់ប្រកាសផ្លូវការមែន លោក ស៊ូហ្កា ត្រូវបានរំពឹងថា មានសង្ឃឹមច្រើនទៅហើយ។ នៅថ្ងៃទី១ ខែកញ្ញា សមាជិកសំខាន់ៗរបស់បក្ស LDP បានប្រកាសគាំទ្រលោក ស៊ូហ្កា ឲ្យធ្វើជាប្រធានបក្ស។ សារព័ត៌មានក្នុងស្រុកជប៉ុន ផ្សាយ បេក្ខជនដែលចង់ចូលរួមការបោះឆ្នោត ត្រូវចុះឈ្មោះនៅថ្ងៃទី៨ ខែកញ្ញា ខណៈការបោះឆ្នោតនឹងធ្វើនៅថ្ងៃទី១៤ ខែកញ្ញា។ នៅសភា ការបោះឆ្នោតជ្រើសរើសនាយករដ្ឋមន្ត្រី នឹងធ្វើនៅថ្ងៃទី១៦ ខែកញ្ញា។

បន្ថែមពីលើការទទួលបានការគាំទ្រពីប្លុកសមាជិកបក្សមានឥទ្ធិពលហើយនោះ លោក ស៊ូហ្កា ក៏មានផលចំណេញពីរបៀបបោះឆ្នោតដែលបក្ស LDP កំណត់ដែរ។ ដោយសារការរាតត្បាតជំងឺ COVID-19 ហើយភាពបន្ទាន់ក្នុងការជ្រើសរើសអ្នកស្នងតំណែងលោក អាបេ ផងនោះ ការបោះឆ្នោតរើសប្រធានបក្សកាន់អំណាច នឹងមានការចូលរួមតែពីសមាជិកបក្សដែលជាសមាជិកសភាទាំងពីរថ្នាក់ និងតំណាងថ្នាក់ក្រោមជាតិប៉ុណ្ណោះ ដែលនេះជាមូលហេតុធ្វើឲ្យលោក ស៊ូហ្កា មានភាគរយខ្ពស់។

ប៉ុន្តែសមាជិកបក្ស LDP ខ្លះបានតវ៉ាការកំណត់របៀបបោះឆ្នោតចង្អៀតបែបនេះ ហើយចង់ឲ្យសមាជិកបក្សនៅថ្នាក់ក្រោមចូលរួមក្នុងការបោះឆ្នោតនេះដែរ។ លោក អ៊ីស៊ីបា ដែលមានការគាំទ្រលើសលុបពីសមាជិកបក្សថ្នាក់ក្រោម ក៏ចង់បានបែបនេះដែរ។ ប៉ុន្តែលោក Toshihiro Nikai អគ្គលេខាធិកាបក្ស LDP អះអាងថា បក្សត្រូវការមេដឹកនាំថ្មីឲ្យបានលឿនបំផុតដើម្បីបំពេញកន្លែងដែលទំនេរ។ ចំណែលោក Shunichi Suzuki ប្រធានក្រុមប្រឹក្សាបក្សវិញ ពន្យល់ថា ការអូសបន្លាយពេល នឹងក្លាយជាបន្ទុកលើសុខភាពលោក អាបេ ៕