អន្តរជាតិ
ចិនគំរាមឆែក! រដ្ឋមន្ត្រីការបរទេសអាល្លឺម៉ង់ ថា ពាក្យគំរាម មិនសមប្រើនៅទឹកដីអឺរ៉ុបទេ លោកវ៉ាង យី រដ្ឋមន្រ្តីការបរទេសចិន (ខាងឆ្វេង) ជាមួយសមភាគីអាល្លឺម៉ង់ លោក Heiko Maas នាប្រទេសអាល្លឺម៉ង់ នៅថ្ងៃទី១ ខែកញ្ញា ឆ្នាំ២០២០។ រូបភាព៖ AP
× ប្រមុខការទូតអាល្លឺម៉ង់ លោក Heiko Maas នៅថ្ងៃទី១ ខែកញ្ញា បានប្រាប់សមភាគីចិន លោក វ៉ាង យីថា ពាក្យគំរាមមិនសក្តិសមប្រើនៅលើទឹកដីអឺរ៉ុបទេ។ ការអះអាងរបស់រដ្ឋមន្ត្រីការទូតអាល្លឺម៉ង់បែបនេះ ធ្វើឡើងបន្ទាប់ពីការព្រមានរបស់លោក វ៉ាង លើប្រធានព្រឹទ្ធសភាឆែកដែលធ្វើទស្សនកិច្ចនៅតៃវ៉ាន់។
ថ្មីៗនេះ ប្រធានព្រឹទ្ធិសភាឆែក លោកMilos Vystrcil បានដឹកនាំប្រតិភូ៩០នាក់ទៅតៃវ៉ាន់រយៈពេល ៥ថ្ងៃ។ ចិនក្ដៅក្រហាយខ្លាំងនឹងរឿងនេះ។ លោក វ៉ាង យី រដ្ឋមន្ត្រីការបរទេស និងជាទីប្រឹក្សារដ្ឋចិន បានចេញសារព្រមានពីទឹកដីអាល្លឺម៉ង់ ថា ប្រធានព្រឹទ្ធសភាឆែករូបនេះ នឹងរងផលវិបាកធ្ងន់ធ្ងរចំពោះសកម្មភាពបំពានគោលនយោបាយចិនតែមួយ។ លើសពីនេះ លោក វ៉ាង បានលើកឡើងថា ដំណើរទស្សនកិច្ចរបស់ប្រធានព្រឹទ្ធិសភាឆែក គឺឆ្លងបន្ទាត់ក្រហមហើយ។
ប៉ុន្តែពាក្យព្រមានទាំងនេះ ត្រូវបានអាល្លឺម៉ង់ប្រតិកម្ម។ ថ្លែងក្នុងសន្និសីទសារព័ត៌មានមួយបន្ទាប់ពីជំនួបជាមួយលោក វ៉ាង នៅថ្ងៃទី១ ខែសីហា លោក Heiko Maas រដ្ឋមន្ត្រីការបរទេសអាល្លឺម៉ង់ បានលើកឡើងថា៖ «ពាក្យគំរាម មិនសក្តិសមនៅទីនេះទេ»។
ក្នុងន័យនេះ លោក Maas បញ្ជាក់ថា ក្នុងនាមជាសមាជិកសហភាពអឺរ៉ុបដូចគ្នា អាល្លឺម៉ង់ មានសហប្រតិបត្តិការយ៉ាងជិតស្និទ្ធជាមួយប្រទេសសមាជិកផ្សេងទៀត ហើយអាល្លឺម៉ង់ចង់ឲ្យដៃគូអន្តរជាតិគោរពសមាជិកអឺរ៉ុបផ្សេងទៀតដូចៗគ្នា។ នេះបើតាមការចុះផ្សាយរបស់សារព័ត៌មាន Bloomberg។
ប្រមុខការទូតចិន បានធ្វើទស្សនកិច្ចមកអឺរ៉ុប តាំងពីថ្ងៃទី២៥ ខែសីហាមកម្លេះ។ ក្នុងដំណើរទស្សនកិច្ចលើកដំបូងចាប់តាំងពីផ្ទុះCOVID-19 នេះ លោកវ៉ាង បានធ្វើដំណើរទៅប្រទេសចំនួន ៥ មានដូចជា អ៊ីតាលី ហូឡង់ ន័រវេស បារាំង និងអាល្លឺម៉ង់។ ក្នុងដំណើរទស្សនកិច្ចនេះ ប្រទេសទាំងអស់សុទ្ធតែបានលើកឡើងពីការបារម្ភជុំវិញបញ្ហាសិទ្ធិមនុស្សលើជនជាតិភាគតិចវីហ្គ័រ និងច្បាប់សន្តិសុខជាតិហុងកុង៕
© រក្សាសិទ្ធិដោយ thmeythmey.com