ភ្នំពេញ៖ សាលារៀនមួយចំនួនកំពុងតែចាប់ផ្តើមបោសសំអាតថ្នាក់រៀន និងបាញ់ថ្នាំសម្លាប់មេរោគជាបណ្តើរៗហើយ ដើម្បីត្រៀមទទួលសិស្សចូលរៀនវិញនៅថ្ងៃទី៧ ខែកញ្ញា តាមការណែនាំរបស់ក្រសួងអប់រំ យុវជន និងកីឡា ។
ចាប់ពីថ្ងៃទី១ រហូតដល់ថ្ងៃទី៦ ខែកញ្ញា ជាពេលដែលសាលារៀននីមួយៗមមាញឹកនឹងការបោសសំអាតថ្នាក់រៀន ទីឆ្លាសាលា កាត់ស្មៅ បោចស្មៅ និងបាញ់ថ្នាំសម្លាប់មេរោគ ឬសំអាតដោយទឹកសាប៊ូជាដើម ដើម្បីត្រៀមទទួលសិស្សានុសិស្សចូលរៀនប្រកបដោយសុវត្ថិភាព។
លោក យឹម ចំរើន នាយកសាលាបឋមសិក្សាបឹងសាឡាង ស្ថិតនៅក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ដែលបានដឹកនាំគ្រូ និងសិស្សប្រមាណ២០នាក់ បោសសំអាតថ្នាក់រៀន និងទីធ្លាសាលា បានបញ្ជាក់ថា ក្នុងថា្នក់រៀនមួយចំនួនត្រូវបានគ្រូ និងសិស្សមួយចំនួនបោសសម្អាតរួចរាល់ហើយ។ ចំណែកនៅតាមទីឆ្លាសាលា និងតាមបន្ទប់ទឹក នឹងត្រូវបោសសំអាតរហូតដល់ថ្ងៃចូលរៀនវិញ។
កំពុងតែឈរនៅមុខថ្នាក់ដែលបានបោសសំអាតហើយ លោក យឹម ចំរើន បានរៀបរាប់ដូច្នេះថា៖«តាំងពីក្រសួងប្រកាសឲ្យបើកសាលាមក ខ្ញុំបានណែនាំឲ្យគ្រូៗ និងសិស្សនាំគ្នាមកបោសសំអាតថ្នាក់រៀន បរិស្ថានសាលា តុ កៅអី និងសួនច្បារ ឲ្យបានល្អដើម្បីត្រៀមលក្ខណៈទទួលកូនសិស្សមករៀនវិញ»។
ផ្ទាំងផ្សព្វផ្សាយពីការបង្ការជំងឺកូវីដ-១៩ នៅរបងសាលាអនុវិទ្យាល័យចតុមុខ
ពេលដែលសាលាស្វាគមន៍សិស្សចូលរៀនវិញ សាលានឹងវាស់កម្តៅសិស្សម្នាក់ៗមុននឹងអនុញ្ញាតឲ្យពួកគេចូលរៀន រួមទាំងបែងចែកវេនសិក្សារបស់ពួកគេផង។ នេះជាការបញ្ជាក់របស់ លោក ចំរើន ដែលបានរៀបរាប់ដូច្នេះថា៖«សិស្សមួយថ្នាក់មាន៣០នាក់ អ៊ីចឹងយើងបែងចែកជាពីរក្រុម ក្រុមទី១ រៀននៅថ្ងៃចន្ទ ដល់ថ្ងៃពុធ។ ចំណែកក្រុមទី២ រៀននៅថ្ងៃព្រហស្បតិ៍ សុក្រ និងសៅរ៍។ ហើយថ្ងៃផ្សេងៗទៀតគាត់ត្រូវរៀនតាមអនឡាញជាមួយនឹងគ្រូ ឬតាមយូធូបជាដើម ដើម្បីជៀសវាងការប្រមូលផ្តុំ និងប្រាស្រ័យទាក់ទងគ្នាយើង ក្រែងលោមានឆ្លងជំងឺកូវីដ-១៩»។
លោក យឹម ចំរើន បានបន្តថា មុននឹងឲ្យសិស្សចូលរៀន លោកបានណែនាំឲ្យគ្រូ និងឪពុកម្តាយ ឬអាណាព្យាបាលសិស្សរៀបចំវេចខ្ចប់ចំណីអាហារពីផ្ទះដើម្បីយកមកបរិភោគនៅសាលា ពីព្រោះនៅតាមសាលានីមួយៗមិនអនុញ្ញាតឲ្យសិស្សទិញចំណីអាហារនៅក្នុងសាលា និងក្រៅសាលាឡើយ។
នាយកសាលាបឋមសិក្សាបឹងសាឡាងរូបនេះបានរៀបរាប់ដូច្នេះថា៖«យើងផ្សព្វផ្សាយឲ្យអាណាព្យាបាលសិស្សរៀបចំជាទឹកអាល់កុល និងម៉ាស់តាមកាតាបរបស់កូនរៀងៗខ្លួន។ ហើយយើងណែនាំឲ្យពួកគាត់ត្រៀមអាហារសម្រន់ និងទឹក ដាក់មកពីផ្ទះឲ្យហើយ»។
បើតាមលោក ចំរើន ក្នុងអំឡុងពេលសិស្សចូលរៀននៅតាមថ្នាក់វិញ ទាំងគ្រូ និងសិស្សត្រូវពាក់ម៉ាស់ និងលាងដៃជានិច្ច។ ក្រោយពីរៀនចប់ម៉ោង គ្រូត្រូវបែងចែកវេនសំអាតថ្នាក់រៀន និងទីឆ្លាសាលាជារៀងរាល់ថ្ងៃ។
សកម្មភាពសិស្សនៅសាលាបឋមសិក្សាបឹងសាឡាង បោសសំអាត និងជូត នៅក្នុងថ្នាក់រៀនសម្រាប់ត្រៀមចូលរៀន
សម្រាប់អនុវិទ្យាល័យចតុមុខ ដែលមានលោក ឌឹម វិរៈឫទ្ធី ជានាយកអនុវិទ្យាល័យចតុមុខ ក៏បានដឹកនាំក្រុមការងារចុះសំអាតសាលារៀនដែរ។ លោកបានរៀបរាប់ដូច្នេះថា៖«សាលាបានបោស ជូត និងបាញ់ទឹកសម្លាប់មេរោគតាមបន្ទប់រៀន វេរ៉ងដា និងតាមជណ្តើរ។ យើងបានរៀបចំតាមស្តង់ដារគម្លាតពីគ្នា។ សម្រាប់នៅបរិវេណសាលា យើងបានកាត់ ឬដកស្មៅ និងកាត់មែកឈើ។ ចំណែកនៅតាមរបងសាលាគឺយើងបានគូសគំនូសសម្រាប់ឲ្យសិស្សដឹងថាកន្លែងណាអាចចេញចូល និងកន្លែងណាដែលមិនអាចចេញចូលបាន»។
សកម្មភាពសិស្សសាលាបឋមសិក្សាបឹងសាឡាង បោសសំអាតនៅក្នុងថ្នាក់រៀនសម្រាប់ត្រៀមទទួលសិស្សឲ្យចូលរៀនវិញ
លោក ឌឹម វិរៈឫទ្ធី បានបញ្ជាក់ថាអនុវិទ្យាល័យចតុមុខនឹងត្រៀមទទួលតែសិស្សថ្នាក់ទី៩ឲ្យចូលរៀនក្នុងមួយសប្តាហ៍ពេញតែប៉ុណ្ណោះ។ ចំណែកសិស្សថ្នាក់ទី៧ និងទី៨ សាលាតម្រូវឲ្យរៀនតាមអនឡាញវិញ។
បើតាមលោក ឌឹម វិរៈឫទ្ធី សាលាបានរៀបចំកន្លែងលាងដៃ សាប៊ូនៅតាមបន្ទប់ទឹក និងទឹកអាល់កុលតាមថ្នាក់រៀន រៀបចំឲ្យមានគ្រូសម្របសម្រួលមួយចំនួន សម្រាប់តាមដានសកម្មភាពសិស្សទាំងពេលចូលរៀន និងចេញលេង។ លោក បន្តថា សាលាក៏បានបង្កើតគណៈកម្មការសុខភាពដើម្បីត្រួតពិនិត្យសុខភាពសិស្ស ក្នុងករណីសិស្សមានរោគសញ្ញាអ្វីមួយ នឹងបញ្ជូនទៅមន្ទីរសុខាភិបាល។
លោកបានរៀបរាប់ដូច្នេះថា៖«ក្នុងមួយវេនយើងមានគ្រូសម្របសម្រួលចំនួន៦នាក់ដែលនឹងដើរពិនិត្យតាមថ្នាក់ថាតើសិស្សបានពាក់ម៉ាស់ឬអត់ មើលការអង្គុយ និងការលាងដៃរបស់ពួកគេ។ សម្រាប់ពេលចេញលេងគឺគាត់នឹងមើលសិស្សមិនឲ្យអង្គុយជាប់គ្នា ប៉ះពាល់គ្នា និងការប្រឡែងគ្នា»។
លើសពីនេះលោកនាយកសាលារូបនេះ ក៏នឹងសហការជាមួយនឹងអាជ្ញាធរសម្រាប់គ្រប់គ្រងលើការលក់នំចំណីនៅតាមរបងសាលា។ ជាមួយគ្នានេះលោកក៏នឹងណែនាំឲ្យសិស្សគ្រប់គ្រង និងទុកដាក់សំរាមឲ្យមានសណ្តាប់ធ្នាប់ផងដែរ។
សកម្មភាពសិស្សនៅសាលាបឋមសិក្សាបឹងសាឡាង បោសសំអាតនៅមុខថ្នាក់រៀនសម្រាប់ត្រៀមចូលរៀន
សូមបញ្ជាក់ថា ក្រសួងអប់រំអនុញ្ញាតឲ្យសិស្សអាចត្រឡប់ទៅរៀន នៅតាមសាលាវិញគឺត្រឹមតែ២ ទៅ៣ថ្ងៃ ក្នុងមួយសប្តាហ៍ ហើយសល់ប៉ុន្មានទៀតគឺត្រូវបន្តរៀនតាមអនឡាញវិញ។
រដ្ឋមន្ត្រីក្រសួងអប់រំ យុវជន និងកីឡាលោក ហង់ ជួន ណារ៉ុន បានអះអាងថា ការសម្រេចឲ្យបើកសាលារៀនឡើងវិញ មិនមែនបើកទាំងប្រថុយប្រថានឡើយ ។ លោក ហង់ ជួន ណារ៉ុន បានបញ្ជាក់ថា ការបើកដំណើរការគ្រឹះស្ថានសិក្សាវិញនេះ គឺអនុវត្តតាមស្តង់ដា សុវត្ថិភាព (SOP) តាមការណែនាំរបស់ក្រសួងសុខាភិបាល។ រដ្ឋមន្ត្រីអប់រំ បានសង្កត់ធ្ងន់ថា សាលារៀនត្រូវធានាបាននូវសុវត្ថិភាព អនាម័យ រៀបចំនូវហេដ្ឋារចនាសម្ព័ន្ធ សមស្រប ពិសេសធានានូវគម្លាតសុវត្ថិភាព ជៀសវាសកុំឱ្យសិស្សជួបជុំគ្នា ដោយមានការត្រួតពិនិត្យត្រឹមត្រូវ ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩៕