ជាតិ
នយោបាយជាតិ
×![]()
ភ្នំពេញ៖ គិតត្រឹមថ្ងៃទី៤ កញ្ញានេះ មន្ត្រីជាន់ខ្ពស់អតីតគណបក្សសង្គ្រោះជាតិ១២រូបហើយ ដែលបានសិទ្ធិធ្វើនយោបាយវិញ ក្រោយពីគណបក្សត្រូវបានតុលាការរំលាយ ជាង២ឆ្នាំ។ លោក សុន ឆ័យ និងមន្ត្រី២រូបទៀត ទើបតែទទួលបានសិទ្ធិនយោបាយវិញ កាលពីថ្ងៃទី៣ កញ្ញា តាមព្រះរាជក្រឹត្យរបស់ ព្រះមហាក្សត្រ។
មន្ត្រីជាន់ខ្ពស់អតីតគណបក្សសង្គ្រោះជាតិ លោក គង់ គាំ និងកូនប្រុសច្បងខ្លួន គឺលោក គង់ បូរ៉ា គឺជាមនុស្សដំបូងគេ ដែលស្នើសុំនីតិសម្បទានយោបាយវិញ កាលពីខែមករា ឆ្នាំ២០១៩ ក្នុងចំណោមមនុស្ស១១៨នាក់ ដែលត្រូវបានហាមឃាត់ធ្វើសកម្មភាពនយោបាយ៥ឆ្នាំ។ ការចាកចេញពីបក្សប្រឆាំងរបស់អ្នកទាំងពីរនេះ អមជាមួយការរិះគន់លើលោក សម រង្ស៊ី មេដឹកនាំខ្លួនផងដែរ។ ក្រោយទទួលបានសិទ្ធិធ្វើនយោបាយវិញ លោក គង់ គាំ ក៏ទៅចូលរួមសកម្មភាពនយោបាយជាមួយកូនប្រុសពៅខ្លួន គឺលោក គង់ មូនីកា ប្រធានគណបក្សឆន្ទៈខ្មែរ។ បច្ចុប្បន្នលោក គង់ គាំ មានតួនាទីជាប្រធានកិត្តិយសគណបក្សមួយនេះ។ ចំណែកលោក គង់ បូរ៉ា ក៏ទៅចូលរួមជីវភាពនយោបាយជាគណបក្សប្រជាជនកម្ពុជាដែរ។
ក្រោយឃើញឪពុកកូនទាំងពីរ ធ្វើសកម្មភាពនយោបាយវិញនេះ មន្ត្រីអតីតគណបក្សសង្គ្រោះជាតិផ្សេងទៀត ក៏យកគំរូតាម។ អ្នកសុំសិទ្ធិជាបន្តបន្ទាប់នោះរួមមាន លោក ស៊ីម សុវណ្ណនី ហៅ ស៊ីម វ៉ាន់នី ,លោក រៀល ខេមរិន្ទ្រ ,លោក អ៊ូ ច័ន្ទរ័ត្ន ,លោក កង គឹមហាក់ ,លោក ជីវ កត្តា ,លោក ច័ន្ទ សិលា និងលោកស្រី ទេព សុទ្ធី ជាដើម។ ពួកគេទាំងនេះ សុទ្ធតែអះអាងថា ខ្លួននៅតែស្រលាញ់ជីវភាពនយោបាយ ដោយចង់ចូលរួមដោះស្រាយបញ្ហាសង្គម។
បន្ទាប់ពីមានសិទ្ធិធ្វើនយោបាយហើយ លោក រៀល ខេមរិន្ទ្រ , លោក កង គឹមហាក់ ,លោក ជីវ កត្តា បានងាកទៅបង្កើតគណបក្សថ្មីរៀងៗខ្លួន។ លោក រៀល ខេម រិន្ទ្រ បានសម្រេចគណបក្សខ្មែរអភិរក្សនិយម កាលពីខែកញ្ញា ឆ្នាំ២០១៩។ ស្ថាបនិកបក្ស លោក រៀល ខេមរិន្ទ្រ អះអាងថា ការបង្កើតបក្សថ្មីនេះ មិនមែនដើម្បីដើរតួរជំនួសអតីតគណបក្សសង្គ្រោះជាតិនោះទេ ពោលគឺលោកចង់ប្រើប្រាស់នយោបាយបែបទន់ភ្លន់ ដើម្បីចូលរួមដោះស្រាយបញ្ហាជាតិ ដែលលោកយល់ឃើញថា វាប្រសើរជាងការរិះគន់វាយប្រហារនយោបាយគ្នាទៅវិញទៅមក។
មិនខុសពីលោក រៀល ខេមរិន្ទ្រ ទេ លោក កង គឹមហាក់ និងលោក ជីវ កត្តា ក៏ទៅបង្កើតបក្សរួមគ្នាមួយឈ្មោះថា គណបក្សខ្មែរស្រលាញ់ជាតិ ដែរ។ លោក កង គឹមហាក់ ធ្លាប់បានបញ្ជាក់ថា គោលបំណងដែលបង្កើតបក្សខ្មែរស្រលាញ់ជាតិនេះ ក្នុងគោលដៅស្មារតីសង្គ្រោះជាតិ បង្កើតវប្បធម៌នយោបាយថ្មី បង្រួបបង្រួមអ្នកស្នេហាជាតិ និងអ្នកប្រជាធិបតេយ្យ ផ្សះផ្សាជាតិ និងតស៊ូមតិតាមគោលការណ៍លទ្ធិប្រជាធិបតេយ្យ។
ចំណែកលោក អ៊ូ ច័ន្ទរ័ត្ន កំពុងពិចារណាលើការបង្កើតគណបក្សថ្មី ខណៈលោក សុន ឆ័យ , លោក វ៉ា សាម៉ុន និងលោក តាវ គឹមឈុន ទើបតែទទួលបានសិទ្ធិធ្វើនយោបាយឡើងវិញ តាមព្រះរាជក្រឹត្យរបស់ ព្រះមហាក្សត្រ កាលពីថ្ងៃទី៣ កញ្ញា។
បច្ចុប្បន្នមន្ត្រីអតីតគណបក្សសង្គ្រោះជាតិ ១០៥នាក់ កំពុងជួបបម្រាមនយោបាយ ក្រោយពីមនុស្ស១២នាក់សម្រេចចិត្តសុំសិទ្ធិធ្វើសកម្មភាពវិញ។ តែការស្នើសុំសិទ្ធិនយោបាយវិញនេះ ហាក់ដូចជាផ្ទុយនឹងការអំពាវនាវរបស់លោក សម រង្ស៊ី មេដឹកនាំអតីតគណបក្សសង្គ្រោះជាតិ។ លោក សម រង្ស៊ី ដែលមិនចង់ឱ្យមន្ត្រីខ្លួនសុំនីតិសម្បទានយោបាយនេះ ធ្លាប់សង្កត់ធ្ងន់ថា អ្នកដែលសុំសិទ្ធិនយោបាយវិញ គឺជាអ្នកក្បត់បក្ស និងអ្នកគាំទ្រខ្លួន។
តុលាការកំពូល បានសម្រេចរំលាយគណបក្សសង្គ្រោះជាតិ កាលពីថ្ងៃទី១៦ វិច្ឆិកា ឆ្នាំ២០១៧ ។ ថ្នាក់ដឹកនាំនយោបាយរបស់គណបក្សប្រឆាំង ចំនួន១១៨(ក្នុងនោះស្លាប់១នាក់)នាក់ ក៏ត្រូវបានតុលាការ សម្រេចផ្អាកសកម្មភាពនយោបាយរយៈពេល៥ឆ្នាំ តាមសំណើរបស់ក្រសួងមហាផ្ទៃ។
ជាង២ឆ្នាំមុន ក្រសួងមហាផ្ទៃ បានយកករណីរបស់លោក កឹម សុខា ដែលត្រូវបានសង្ស័យថាប្រព្រឹត្តអំពើក្បត់ជាតិ ទៅផ្សារភ្ជាប់ជាមួយគណបក្សសង្គ្រោះជាតិទាំងមូល ដើម្បីធ្វើជាភស្តុតាងដាក់ទៅតុលាការ។ ក្រសួងមហាផ្ទៃ យល់ថា គណបក្សសង្គ្រោះជាតិ ក៏អាចជាប់ទាក់ទងនឹងអំពើក្បត់ជាតិ ដូចលោក កឹម សុខា ដែរ ទើបបានជាសុំឲ្យតុលាការកំពូលរំលាយចោល ហើយថែមទាំងសុំឲ្យដកសិទ្ធិពីថ្នាក់ដឹកនាំគណបក្សប្រឆាំងដ៏ធំមួយនេះ ។ បច្ចុប្បន្ននេះ លោក កឹម សុខា កំពុងស្ថិតនៅក្នុងដំណើការរឿងក្តី «គប់គិតជាមួយបរទេស»៕
Tag:
CNRP
នយោបាយ
© រក្សាសិទ្ធិដោយ thmeythmey.com
