COVID-19
ជាតិ
សហជីពគ្រោងស្នើឲ្យដំឡើងប្រាក់ឈ្នួលអប្បបរមា១១.៥៩ដុល្លារបន្ថែមដល់កម្មករនៅឆ្នាំ២០២១ កិច្ចចរចាប្រាក់អប្បបរមារបស់កម្មករសម្រាប់ឆ្នាំ២០២១ ធ្វើឡើងនៅថ្ងៃទី៣ កញ្ញា។ (រូបពីក្រសួងការងារ)
× ភ្នំពេញ៖ មេសហជីពបានបញ្ហាជំហរក្នុងការចរចាប្រាក់ឈ្នួលអប្បបរមាឆ្នាំ២០២១នេះ ចង់ឲ្យកម្មករទទួលបានប្រាក់ឈ្នួលអប្បបរមាជាង២០០ដុល្លារ ពោលគឺដំឡើងជាង១០ដុល្លារទៀត ដើម្បីជួយសម្រួលការលំបាករបស់កម្មករ ពិសេសនៅដំណាក់កាលរងវិបត្តិកូវីដ-១៩។
លោក ប៉ាវ ស៊ីណា ប្រធានសហភាពចលនាកម្មករកម្ពុជាបានបញ្ជាក់ថា ក្នុងកិច្ចចរចាប្រាក់ឈ្នួលអប្បបរមាឆ្នាំ២០២១នេះ ភាគីសហជីពបានបង្ហាញជំហរចង់ឲ្យប្រាក់ឈ្នួលអប្បបរមាឆ្នាំ២០២១ឡើង ១១.៥៩ដុល្លារបន្ថែមទៀត ខណៈដែលភាគីនិយោជកនិងក្រុមប្រឹក្សាជាតិប្រាក់ឈ្នួលអប្បបរមាមិនទាន់ប្រតិកម្មឡើយ។
បើតាមក្រសួងការងារ និងបណ្ដុះបណ្ដាលវិជ្ជាជីវៈ ការចរចាប្រាក់អប្បបរមាសម្រាប់២០២១ ធ្វើឡើងដោយមានភាគីនិយោជក សហជីព និងក្រុមប្រឹក្សាជាតិប្រាក់ឈ្នួលអប្បបរមាក្រសួងការងារចូលរួម កាលពីថ្ងៃទី៣កញ្ញា នៅទីស្ដីការក្រសួងការងារ។ កិច្ចពិភាក្សា ភាគីទាំងបីបានបង្ហាញគោលជំហររបស់ខ្លួនតាមលក្ខណៈវិនិច្ឆ័យសង្គម និងសេដ្ឋកិច្ចលើស្ថានភាពវិស័យកាត់ដេរនៅកម្ពុជា។ ការចរចានេះ នឹងបន្តនៅថ្ងៃទី៩ និងថ្ងៃទី១០ ខែកញ្ញានេះ។
លោក ប៉ាវ ស៊ីណា បានអះអាងប្រាប់ ThmeyThmey តាមទូរសព្ទថា ក្នុងស្ថានភាពលំបាកដែលរងផលប៉ះពាលដោយសារកូវីដ-១៩ កម្មករគួរត្រូវបានដំឡើងប្រាក់ឈ្នួលអប្បបរមា។ លោក ថ្លែងថា៖ «ជំហររបស់សហជីពសម្រាប់ការចរចាប្រាក់ឈ្នួលអប្បបរមា គឺចង់ឲ្យដំឡើង១១.៥៩ដុល្លារ។ វាមិនច្រើនទេ កម្មករគួរទទួលបានការដំឡើងប្រាក់អប្បបរមានេះ ដើម្បីដោះស្រាយស្ថានភាពលំបាកដែលកំពុងកើតមាន ពិសេសនៅអំឡុងពេលកូវីដ-១៩។ បើទោះបីមានការថយចុះនៃការបញ្ជាទិញពីអឺរ៉ុប ប៉ុន្តែនៅខាងអាមេរិកគឺមានការកើនឡើង ហើយចូលដល់ឆ្នាំ២០២១ស្ថានភាពនៃការបញ្ជាទិញនិងសេដ្ឋកិច្ចក៏អាចនឹងប្រសើរឡើងវិញដែរ»។
ប៉ុន្តែក្នុងកិច្ចពិភាក្សាភាគីនិយោជកចង់ឲ្យមានការបន្ថយប្រាក់អប្បបរមាសម្រាប់ឆ្នាំ២០២១ ក្រោយហេតុផលរងវិបត្តិកូវីដ-១៩។ នេះបើតាមលើកឡើងរបស់លោក ប៉ាវ ស៊ីណា។
ចំណែក លោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា GMAC ប្រាប់សារព័ត៌មានថ្មីៗតាមទូរស័ព្ទថា លោកសុំមិនបញ្ចេញការយល់ឃើញឬជំហរណាមួយ លើការចរចាប្រាក់ឈ្នួលអប្បបរមានេះឡើយ។ «ខ្ញុំមិននិយាយឬបង្ហាញជំហររឿងប្រាក់អប្បរមានោះទេ រងចាំការលើកឡើងក្នុងការចរចានៅថ្ងៃទី៩, ១០នេះទៅ»។
កន្លងមក ភាគីសហជីពបានស្នើប្រាក់ឈ្នួលអប្បបរមា១៩៥ដុល្លារ និងភាគីនិយោជកបានស្នើ១៨៦ដុល្លារ។ ក្រុមប្រឹក្សាជាតិប្រាក់ឈ្នួលអប្បបរមាក៏បានសម្រេចដោយការបោះឆ្នោតយក ១៨៧ដុល្លារ ធ្វើប្រាក់ឈ្នួលអប្បបរមា ខណៈដែលសម្ដេច ហ៊ុន សែន នាយករដ្ឋមន្រី្តបានថែម៣ដុល្លារទៀត ដែលធ្វើឲ្យប្រាក់ឈ្នួលអប្បបរមាកម្មករឡើងដល់១៩០ដុល្លារក្នុងឆ្នាំ២០២០៕
Tag:
ប្រាក់អប្បបរមា
កម្មកររោងចក្រ
© រក្សាសិទ្ធិដោយ thmeythmey.com