អន្តរជាតិ
ក្រោយជំនួបរដ្ឋមន្ត្រីការពារជាតិ ចិននិងឥណ្ឌាបន្តរុញកំហុសដាក់គ្នារឿងភាពតានតឹងនៅព្រំដែន រដ្ឋមន្ត្រីការពារជាតិចិន វៃ ហ្វឹងហឺ (ឆ្វេងទីពីរ) ជួបពិភាក្សាជាមួយសមភាគីឥណ្ឌា រ៉ាចណាត ស៊ីង (ស្ដាំទីបី)។ រូបភាព PTI
× ចិន និងឥណ្ឌា នៅតែរុញកំហុសដាក់គ្នាទៅវិញទៅមកជុំវិញភាពតានតឹងនៅព្រំដែនដែលឡើងកម្ដៅឡើងវិញនៅក្នុងសប្ដាហ៍នេះ។ ទោះមានជំនួបរដ្ឋមន្ត្រីការពារជាតិក្ដី មហាអំណាចទាំងពីរ នៅតែប្រកែកយកឈ្នះរៀងៗខ្លួន ហើយចោទភាគីម្ខាងទៀតជាអ្នកធ្វើខុស។
រដ្ឋមន្ត្រីការពារជាតិចិន វៃ ហ្វឹងហឺ បានជួបជាមួយសមភាគីឥណ្ឌា រ៉ាចណាត ស៊ីង នៅល្ងាចថ្ងៃទី៤ ខែសីហា អំឡុងពេលកិច្ចប្រជុំអន្តរជាតិមួយនៅឥណ្ឌា ហើយភាពតានតឹងនៅតាមព្រំដែន ទំនងជារបៀបវារៈធំនាជំនួបនេះ។ ប៉ុន្តែអ្វីដែលភ្ញាក់ផ្អើលនោះ ក្នុងសេចក្ដីថ្លែងការណ៍ក្រោយដោយឡែកពីគ្នាក្រោយជំនួបនេះ រដ្ឋមន្ត្រីការពារជាតិទាំងពីរទាំងពីរ បន្តជះទឹកដាក់គ្នាពីការទទួលខុសត្រូវដែលនាំឲ្យព្រំដែនតានតឹងឡើងវិញ។
ស្ថានភាពព្រំដែនចិន និងឥណ្ឌា បានឡើងកម្ដៅជាថ្មី ដោយក្រសួងការពារជាតិឥណ្ឌា នៅថ្ងៃទី៣១ ខែសីហា អះអាងថា ចិនបានចល័តទ័ពនៅតាមព្រំដែន។ ហេតុការណ៍ថ្មីនេះ បានកើតឡើង នៅភាគខាងត្បូងនៃជ្រោយទន្លេ Pangong Tso ស្ថិតក្នុងតំបន់ Ladakh ដែលជាតំបនប្រទាញប្រទង់។ បន្ទាប់ពីការចោទប្រកាន់របស់ឥណ្ឌា កងទ័ពចិនក៏បានចេញសេចក្តីថ្លែងការណ៍មួយ ដើម្បីការពារខ្លួនពីការចោទប្រកាន់របស់ឥណ្ឌា។
ក្នុងសេចក្ដីប្រកាសព័ត៌មានថ្ងៃទី៥ ខែកញ្ញា ក្រសួងការពារជាតិឥណ្ឌាលើកឡើងថា នាជំនួបនៅមូស្គូលោក ស៊ីង បានសង្កត់ធ្ងន់ពីសកម្មភាពយោធាចិន ដូចជាការបង្កើនចំនួននៅព្រំដែន សកម្មភាពហួសហេតុ និងការប៉ុនប៉ងបំពានស្ថានភាពបច្ចុប្បន្ន ដែលសកម្មភាពទាំងនេះជាការបំពានកិច្ចព្រមព្រៀងរវាងអ្នកជិតខាងទាំងពីរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។ ទីក្រុងញូវដែលីក៏ប្រកាសជំហរដោះស្រាយតាមការចរចា តែក៏តាំងចិត្តការពារទឹកដីរបស់ខ្លួនដែរ។
រដ្ឋមន្ត្រីការពារជាតិចិន ក៏ចេញសេចក្ដីថ្លែងការណ៍មិនខុសគ្នាពីឥណ្ឌាដែរ។ លោក វៃ អះអាងថា មូលហេតុ និងការពិតនៃភាពតានតឹងបច្ចុប្បន្ននៅព្រំដែនចិន និងឥណ្ឌា គឺច្បាស់លាស់ហើយ ហើយការទទួលខុសត្រូវធ្លាក់លើឥណ្ឌាទាំងស្រុង។ ប្រមុខការពារជាតិចិនរូបនេះបន្ថែមថា ចិនមិនបោះបង់ទឹកដីខ្លួនឡើយ ហើយឥណ្ឌាគួរតែផ្អាកធ្វើសកម្មភាពទាំងឡាយណាដែលធ្វើឲ្យទំនាក់ទំនងទ្វេភាគីឡើងកម្ដៅទៀតទៅ។
សូមបញ្ជាក់ថា នៅក្នុងខែមិថុនាកន្លងទៅ ឥណ្ឌា និងចិន បានប៉ះទង្គិចគ្នាម្តងហើយ ដែលជាការប៉ះទង្គិចមានអ្នកស្លាប់មិនធ្លាប់មានក្នុងពេលជាច្រើនឆ្នាំ។ ហេតុការណ៍នោះ ទាហានឥណ្ឌា បានបាត់បង់ជីវិតចំនួន ២០នាក់ និងរបួសជាច្រើននាក់ ខណៈចិន មិនបញ្ចេញរបាយការណ៍។ ប៉ុន្តែការប្រឈមមុខនេះ ត្រូវបានកាត់បន្ថយទៅវិញ បន្ទាប់ពីកងទ័ពប្រទេសទាំងពីរ បានជួបចរចាគ្នារហូតដល់ទៅ ៣លើក៕
© រក្សាសិទ្ធិដោយ thmeythmey.com