រដ្ឋាភិបាលគាំទ្រការវិនិយោគចម្ការឈើដាំ ដើម្បីកាត់បន្ថយការប្រើប្រាស់ឈើធម្មជាតិ

ជាតិ

រដ្ឋាភិបាលគាំទ្រការវិនិយោគចម្ការឈើដាំ ដើម្បីកាត់បន្ថយការប្រើប្រាស់ឈើធម្មជាតិ

08, Sep 2020 , 10:04 am

រូបភាព

សកម្មភាពមន្ត្រីនៃក្រសួងបរិស្ថានចុះទស្សនកិច្ចនៅចម្ការឈើដាំរបស់ក្រុមហ៊ុន ស៊ីងបាយអូថេក កាលពីថ្ងៃទី៤កញ្ញាឆ្នាំ២០២០

ដោយ: ប៉ូ សាគុន

ក្រចេះ៖ រដ្ឋាភិបាលតាមរយៈក្រសួងបរិស្ថាន គាំទ្រសកម្មភាព និងការវិនិយោគចម្ការឈើដាំ ដើម្បីជំនួសឱ្យការកាប់ឈើធម្មជាតិ យកទៅធ្វើគ្រឿងសង្ហារឹម និងការប្រើប្រាស់ផ្សេងៗ។ បើតាមរដ្ឋលេខាធិការក្រសួងបរិស្ថាន លោក នេត្រ ភក្ត្រា កម្ពុជាកំពុងតែប្រឹងប្រែងការពារព្រៃធម្មជាតិ ដើម្បីរួមចំណែកជួយបរិស្ថាន និងទ្រទ្រង់ជីវិតជាសកល ព្រមទាំងអាចទាញចំណូលពីឈើឈរដោយការលក់ឥណទានកាបូន។

បច្ចុប្បន្នព្រៃឈើប្រមាណ៤១ភាគរយ ក្នុងចំណោមព្រៃឈើសរុបនៅទូទាំងប្រទេសប្រមាណ៤៧,៩៧ភាគរយ ត្រូវបានដាក់ក្នុងតំបន់ការពារ និងដែនអភិរក្ស ដែលគ្រប់គ្រងដោយក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ។ ព្រៃអភិរក្សទាំងនោះមានដូចជា ដែនជម្រកសត្វព្រៃ ដែនឧទ្យានជាតិ តំបន់រាមសា និងតំបន់ផ្សេងៗទៀត សរុបចំនួន៦៦កន្លែក ដែលមានផ្ទៃដីប្រមាណជា៧,៣លានហិកតា គ្របដណ្ដប់នៅទូទាំងប្រទេស។ នេះបើតាមរដ្ឋលេខាធិការក្រសួងបរិស្ថាន លោក នេត្រ ភក្ត្រា បញ្ជាក់ប្រាប់អ្នកសារព័ត៌មាន ក្នុងឱកាសដំណើរទស្សនកិច្ចទៅតំបន់ព្រៃឡង់។

រដ្ឋលេខាធិការក្រសួងបរិស្ថាន លោក នេត្រ ភក្ត្រា កំពុងធ្វើបទបង្ហាញអំពីដែនអភិរក្សព្រៃព្រៃឡង់ ក្នុងទីសា្នក់ការ កាលពីថ្ងៃទី៤ខែកញ្ញាឆ្នាំ២០២០

ក្នុងដំណើរចុះទៅមើលចម្ការឈើដាំ របស់ក្រុមហ៊ុន ស៊ីងបាយអូថេក អ្នកនាំពាក្យក្រសួងបរិស្ថាន លោក នេត្រ ភក្ត្រា បានប្រាប់ក្រុមអ្នកសារព័ត៌មានថា ចម្ការឈើដាំបានរួមចំណែកជួយកាត់បន្ថយការកាប់ព្រៃធម្មជាតិ យកទៅធ្វើគ្រឿងសង្ហារឹម និងការប្រើប្រាស់ផ្សេងៗ។

សូមបញ្ជាក់ថា ផ្ទៃដីសម្បទានដែលក្រុមហ៊ុន ស៊ីងបាយអូថេក បានទទួលសិទ្ធិពីរដ្ឋាភិបាល មានចំនួន ៣៤ពាន់ហិកតាស្ថិតក្នុងខេត្តក្រចេះ និងស្ទឹងត្រែង។ ក្រុមហ៊ុននេះបានវិនិយោគលើការដាំឈើមួយចំនួន ដូចជាឈើគ្រញូង អាកាស្យា ដើមប្រេងខ្យល់ និងដើមឈើមួយចំនួនទៀត ដើម្បីកែច្នៃជាគ្រឿងសង្ហារឹម ក៏ដូចជាធ្វើក្ដារកុងប្លាកេជាដើម។

ក្នុងដំណើរទស្សនកិច្ចកាលពីថ្ងៃទី៤ខែកញ្ញាឆ្នាំ២០២០កន្លងទៅ នៅក្នុងតំបន់ព្រៃឡង់ លោក នេត្រ ភក្ត្រា ក៏បានបញ្ជាក់ផងដែរថា ការរក្សាព្រៃធម្មជាតិមិនត្រឹមតែអាចការពារបរិស្ថាន រក្សាជម្រកសត្វព្រៃ និងការពារប្រភពជីវចម្រុះបណ្ណោះទេ ប៉ុន្តែវាបានជួយជីវភាពប្រជាពលរដ្ឋដែលរស់នៅក្បែរតំបន់នោះ តាមរយៈការទាញយកអនុផលព្រៃឈើ ដូចជាការរកឃ្មុំ ចៀរជ័រទឹក រកផ្សិត និងបេះបន្លែផ្សេងៗ។ បន្ថែមពីនោះឈើឈរទាំងនោះ ក៏បានផ្ដល់ប្រាក់ប្រមាណជា១១,៦លានដុល្លារអាមេរិក តាមរយៈការលក់ឥណទានកាបូនផងដែរ។

កម្ពុជាបានលក់ឥណទានកាបូន នៅដែនជម្រកសត្វព្រៃកែវសីមា ក្នុងខេត្តមណ្ឌលគិរី នៅព្រៃតាតៃ និងនៅឧទ្យានជាតិជួរភ្នំក្រវាញខាងត្បូង ក្នុងតំបន់ខេត្តកោះកុង ហើយបច្ចុប្បន្នក្រសួងកំពុងអនុវត្តន៍សាកល្បងក្នុងតំបន់រេតបូក ក្នុងខេត្តស្ទឹងត្រែង ដោយមានការសហការណ៍ជាមួយគម្រោងព្រៃឡង់បៃតងរបស់អង្គការយូសេដ ដែលជាកិច្ចសហប្រតិបត្តិការ រវាងរដ្ឋាភិបាលកម្ពុជានិងសហរដ្ឋអាមេរិក ដើម្បីការពារព្រៃឈើ។

សកម្មភាពមន្ត្រីនៃក្រសួងបរិស្ថានចុះទស្សនកិច្ចនៅទីស្នាក់ការក្នុងតំបន់ព្រៃឡង់ កាលពីថ្ងៃទី៤ខែកញ្ញាឆ្នាំ២០២០

ប្រាក់ដែលបានពីការលក់ឥណទានកាបូន ត្រូវបានប្រើប្រាស់សម្រាប់ការងារអភិរក្ស និងការអភិវឌ្ឍសហគមន៍ដែលនៅជុំវិញតំបន់ការពារទាំងនោះ។ បើតាមលោក នេត្រ ភក្ត្រា ក្នុងមួយឆ្នាំ រដ្ឋាភិបាលបានផ្ដល់ប្រាក់ចំនួន ១២ពាន់ដុល្លារអាមេរិកសម្រាប់១ភូមិ ដើម្បីអភិវឌ្ឍន៍ហេដ្ឋារចនាសម្ព័ន និងជីវភាពប្រជាជនក្នុងភូមិនីមួយៗដែលនៅជុំវិញតំបន់អភិរក្ស។

លោក នេត្រ ភត្រា បញ្ជាក់ដូច្នេះ៖«ឧទាហរណ៍នៅខេត្តមណ្ឌលគិរី សហគមន៍ជនជាតិដើមភាគតិច ដែលរស់នៅក្នុងតំបន់ដែនជម្រកសត្វព្រៃកែវសីមា គាត់មិនមានទឹកស្អាតប្រើទេ ប៉ុន្តែក្រោយពីទទួលបានប្រាក់ ដែលបានពីការលក់ឥណទានកាបូន គាត់បានរៀបចំប្រព័ន្ធទឹកស្អាតប្រើប្រាស់ក្នុងភូមិ។ ក្នុងដែនព្រៃអភិរក្សរបស់យើង មានប្រាសាទ សត្វព្រៃ ទឹកធ្លាក់ និងអនុផលព្រៃឈើជាច្រើនទៀត ដែលនឹងក្លាយជាតំបន់ទេសចរណ៍ធម្មជាតិ ដ៏ស្រស់ស្អាត។ ដំណើរទេសចរណ៍ក្នុងតំបន់ព្រៃអភិរក្ស បានរួមចំណែកឃ្លាំមើលការកាប់ព្រៃ និងការទន្ទ្រានដីព្រៃអភិរក្ស»។

ទោះជាយ៉ាងណាអ្នកនាំពាក្យរូបនេះ ទទួលស្គាល់ថាក្នុងដែនអភិរក្សដែលខ្លួនកាន់កាប់ នៅតែមានការកាប់ឈើ និងការទន្ទ្រានយកដីព្រៃ ប៉ុន្តែនៅក្នុងចំនួនតិចតួច ហើយក្រសួងកំពុងតែប្រឹងប្រែងលុបបំបាត់ឱ្យបានទាំងស្រុង។ ដោយសារបច្ចុប្បន្នក្រសួងបរិស្ថានកំពុងប្រឈមនឹងការខ្វះខាតមន្ត្រីឧទ្យាននុរក្ស ក្នុងការចុះល្បាតតាមគោលដៅ ដូច្នោះហើយរាល់ការចុះល្បាតព្រៃ មន្ត្រីឧទ្យាននុរក្សអះអាងថា ខ្លួនបានរៀបចំយុទ្ធសាស្ត្រខ្ពស់ ក្រៅពីការដាក់កាមេរ៉ាដើម្បីអង្កេតបទល្មើសនានា។

ទីស្នាក់ការមួយក្នុងដែនអភិរក្សព្រៃឡង់

ដើម្បីឱ្យការអភិរក្សព្រៃក្នុងតំបន់ការពារកាន់តែមានប្រសិទ្ធភាព រដ្ឋាភិបាលបានសហការជាមួយគម្រោងព្រៃឡង់បៃតង អង្គការសង្គ្រោះសត្វព្រៃ អង្គការអភិរក្សសត្វព្រៃ អង្គការWA WWF និងអង្គការWCS ជាដើម ដែលមានលទ្ធភាពមានផ្កាយរណប និងមានឧបករណ៍ជំនួយក្នុងការឃ្លាំមើលមួយចំនួនទៀត។

សូមបញ្ជាក់ថា ក្រសួងបរិស្ថានបានរៀបចំគម្រោងផែនការមេ ដើម្បីសាងសង់មជ្ឈមណ្ឌលមួយ ក្នុងស្នាក់ការដែនជម្រកសត្វព្រៃព្រៃឡង់ ក្នុងខេត្តក្រចេះ ដែលមានផ្ទៃដី២៥ហិកតា។ មជ្ឈមណ្ឌលនេះ នឹងសាងសង់កន្លែងចុះចតយន្តហោះ សារមន្ទីរដាក់សំណាកសត្វផ្សេងៗ និងសំណាកឈើគ្រប់ប្រភេទ កន្លែងដាក់វត្ថុបទល្មើស សួនរុក្ខជាតិគ្រប់ប្រភេទ និងកន្លែងឱ្យប្រជាសហគមន៍សិក្សាស្វែងយល់ពីការអភិរក្សនានា។ នឹងមានជីកស្រះចិញ្ចឹមត្រីដើម្បីផ្គត់ផ្គង់អាហារដល់ក្រុមការងារអភិរក្ស កន្លែងចិញ្ចឹមគោ កន្លែងដាំស្មៅ និងមានកន្លែងលេងកីឡា ដូចជាទាត់បាល់ និងបោះបូលជាដើម។

គួររំឭកផងដែរថា ព្រៃឈើនៅក្នុងប្រទេសកម្ពុជាកាលពីឆ្នាំ១៩៦២ មានចំនួន៧៣ភាគរយគ្របដណ្ដប់លើផ្ទៃប្រទេស ដោយក្នុងនោះចំនួនប្រជាជនមានប្រមាណ៥៧សែននាក់។ បច្ចុប្បន្ននេះ ព្រៃឈើនៅសល់ប្រមាណជា៤៧,៩៧ភាគរយ ដោយកំណើនប្រជាជនឡើងដល់ប្រមាណ១៦លាននាក់។ នេះបើតាមការបញ្ជាក់របស់លោក នេត្រ ភក្ត្រា រដ្ឋលេខាធិការក្រសួងបរិស្ថាន៕