កីឡាអន្តរជាតិ
អន្តរជាតិ
Messi ចូលហ្វឹកហាត់វិញ ក្រោយចេញពី Barca មិនបានសម្រេច
× Lionel Messi បានត្រឡប់ចូលហ្វឹកហាត់ជាមួយក្រុម Barcelona វិញហើយ ក្រោយការប៉ុនប៉ងចាកចេញពីក្លិបយក្សអេស្ប៉ាញមួយនេះត្រូវបរាជ័យ។ ក្លិប Barca បានបង្ហាញរូបភាព និងវីដេអូសកម្មភាពហ្វឹកហាត់របស់ Messi ជាលើកដំបូង ក្នុងទំព័រហ្វេសប៊ុកផ្លូវការរបស់ខ្លួននៅថ្ងៃទី៧ ខែកញ្ញា។
Messi ដែលប្រកបអាជីពជាមួយក្លិបរហស្សនាមអ្នកមានបុណ្យ២០ឆ្នាំ បានដាក់សំណើផ្ទេរចេញកាលពីថ្ងៃទី២៥ ខែសីហា ដែលធ្វើឲ្យកក្រើកពិភពកីឡាបាល់ទាត់។ ខ្សែបម្រើសញ្ជាតិអាហ្សង់ទីន វ័យ៣៣ឆ្នាំ បានផ្ញើសារទៅកាន់ក្លិប ឲ្យជួយសម្រួលកិច្ចសន្យាដែលនៅសល់ ដែលអាចអនុញ្ញាតឲ្យរូបគេអាចចាកចេញពីក្លិបដោយគ្មានបញ្ហា ដោយសម្អាងលើចំណុចមួយក្នុងកិច្ចព្រមព្រៀងដែលអនុញ្ញាតឲ្យ Messi ចាកចេញបាននៅខែមិថុនា។
យ៉ាងណាក៏ដោយ Barca បានបដិសេធការស្នើនេះ ដោយលើកហេតុផលថា ខែមិថុនាកន្លងផុតទៅហើយ បើទោះបីជាលីគអេស្ប៉ាញត្រូវពន្យារពេលប្រកួតដោយសារ COVID-19 ក៏ដោយ។ ក្លិបថែមទាំងបញ្ជាក់ពីការបង់ថ្លៃផ្ដាច់កិច្ចសន្យាចំនួន៨២៣លានដុល្លារទៀតផងសម្រាប់ក្រុមណាដែលចង់បាន Messi ទៅរួមក្រុម។
បន្ទាប់ពីក្លិប Barca លើកឡើងបែបនេះ Messi ក៏បានប្តូរចិត្តបន្តស្នាក់នៅជាមួយក្រុមរហូតចប់កិច្ចសន្យានៅរដូវកាលក្រោយ បើទោះរូបគេមានជម្រើសចុងក្រោយ គឺឡើងតុលាការដើម្បីដោះស្រាយបញ្ហាកិច្ចសន្យាក៏ដោយត។ ម្ចាស់ពាន Ballon d’Or ៦ សម័យកាល អះអាងថាខ្លួនមិនជ្រើសរើសផ្លូវនេះដើម្បីដោះស្រាយជាមួយក្លិបដែលខ្លួនស្រឡាញ់ឡើយ។
នេះជាលើកដំបូងហើយដែល Messi ចូលរួមហ្វឹកហាត់ជាមួយក្រុមវិញ ចាប់តាំងពីការមកដល់របស់អ្នកចាត់ការថ្មីលោក Ronald Koeman។ ខ្សែបម្រើ និងប្រធានក្រុមជម្រើសជាតិអាហ្សង់ទីន ក៏ត្រូវបានឃើញហ្វឹកហាត់ជាមួយ Philippe Coutinho ដែលទើបត្រឡប់ពីការខ្ចីជើងពី Bayern Munich ផងដែរ។
Barcelona នឹងចាប់ផ្តើមយុទ្ធនាការ La Liga រដូវកាលថ្មី ២០២០-២១ របស់ខ្លួនទល់នឹង Villarreal នៅថ្ងៃទី២៧ ខែកញ្ញា៕
Tag:
Lionel Messi
Barcelona
© រក្សាសិទ្ធិដោយ thmeythmey.com