កាលពីថ្ងៃទី៧ ខែកញ្ញា លោកឧបនាយករដ្ឋមន្ត្រី អូន ព័ន្ធមុនីរ័ត្ន បានដឹកនាំអន្តរក្រសួងប្រជុំឆ្លងសេចក្តីព្រាងផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២០-២០៣៥។ រដ្ឋាភិបាលបានបង្ហាញឆន្ទៈរបស់ខ្លួនក្នុងការពង្រីកវិស័យទេសចរណ៍ទៅជាមាសបៃតង ដោយក្រៅពីប្រាសាទនានា ខេត្តសៀមរាបមានតំបន់ជាច្រើនទៀតដែលពោរពេញទៅដោយសក្តានុពលទេសចរណ៍ ដូចជាទន្លេសាប ស្ទឹងសៀមរាប ឧទ្យានជាតិភ្នំគូលែន និងតំបន់ជនបទដ៏ទាក់ទាញ។ មណ្ឌលគិរី និងកែប ក៏ជាការខេត្តគោលដៅសម្រាប់អភិវឌ្ឍទេសចរណ៍ ២០២០-២០៣៥ផងដែរ។
យោងតាមសេចក្តីប្រកាសព័ត៌មានស្តីពីកិច្ចប្រជុំឆ្លងសេចក្តីព្រាង «ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២០-២០៣៥ របស់គណៈកម្មាធិការជាតិអភិវឌ្ឍទេសចរណ៍ ផែនការមេអភិវឌ្ឍទេសចរណ៍ខេត្តសៀមរាប ក្រៅពីចូលរួមដល់ការអភិវឌ្ឍសង្គម-សេដ្ឋកិច្ច និងលើកស្ទួយវប្បធម៌ជាតិ ក៏ទ្រទ្រងដល់កិច្ចគាំពារបរិស្ថានប្រកបដោយប្រសិទ្ធភាពខ្ពស់ និងប្តេជ្ញាចិត្តក្នុងការអភិវឌ្ឍវិស័យទេសចរណ៍នៅខេត្តសៀមរាប និងតំបន់ជុំវិញ ដើម្បីប្រែក្លាយជាគោលដៅទេសចរណ៍ប្រកបដោយគុណភាព (Alternative Tourism/Quality Destination)។
កិច្ចប្រជុំដែលដឹកនាំដោយលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងជាប្រធានគណៈកម្មាធិការជាតិអភិវឌ្ឍទេសចរណ៍ ក៏បានបង្ហាញពីការគ្រប់គ្រងលើការអភិវឌ្ឍវិស័យទេសចរណ៍ច្បាស់លាស់ និងកាត់បន្ថយផលប៉ះពាល់ជាអវិជ្ជមានដល់តំបន់អង្គរ និងធនធានធម្មជាតិឱ្យបានអតិបរមា ដោយសំដៅការទាក់ទាញភ្ញៀវទេសចរណ៍មកកម្សាន្តឱ្យបានច្រើនដង។ ជាពិសេសទទួលបានភ្ញៀវទេសចរកម្រិតខ្ពស់ ដើម្បីបង្កើននូវប្រភពចំណូលជូនជាតិ និងពលរដ្ឋមូលដ្ឋាន។
សេចក្តីប្រកាសព័ត៌មានដដែលបានអះអាងថា ចក្ខុវិស័យរបស់ផែនការមេសម្រាប់អភិវឌ្ឍទេសចរណ៍នៅខេត្តសៀមរាបនេះគឺ៖«ការក្តាប់យកមកវិញនូវមោទកភាពជាគោលការណ៍ទេសចរណ៍ចម្បងបំផុតរបស់វិស័យទេសចរណ៍កម្ពុជា និងនៅក្នុងតំបន់អាស៊ីអាគ្នេយ៍»។
សៀមរាប គឺជាខេត្តទេសចរណ៍អន្តរជាតិដ៏គួរឱ្យចាប់អារម្មណ៍ និងមានការទទួលស្គាល់ជាលក្ខណៈសកលលើការអភិរក្ស និងកិច្ចគាំពារសម្បត្តិបេតិកភណ្ឌវប្បធម៌ និងបរិស្ថានធម្មជាតិ ដោយផ្តល់ជូននូវធនធានទេសចរណ៍ និងទាក់ទាញជាច្រើនទៀត។ នេះជាបំណងប្រាថ្នារបស់រដ្ឋាភិបាលដើម្បីអភិវឌ្ឍខេត្តសៀមរាប ដោយធានាបាននូវផលប្រយោជន៍សង្គម-សេដ្ឋកិច្ច ជាអតិបរមាពីវិស័យទេសចរណ៍។ ពោលគឺតំបន់ប្រវត្តិសាស្ត្រអង្គរ, តំបន់ទីក្រុងដែលមានជាប់ស្ទឹងសៀមរាប , តំបន់ទន្លេសាប, ឧទ្យានជាតិភ្នំគូលែន និងតំបន់ជនបទដែលជាគោលដៅទេសចរណ៍ត្រូវតែភ្ជាប់ជាមួយការអភិវឌ្ឍសេដ្ឋកិច្ចមូលដ្ឋាន និងការកាត់បន្ថយភាពក្រីក្រ។
ពិសេសខេត្តសៀមរាប ត្រូវតែជាគោលដៅទេសចរណ៍ប្រកបដោយគុណភាព សំដៅទាក់ទាញភ្ញៀវទេសចរដែលមានគុណភាពមកកម្សាន្ត ម្តងហើយម្តងទៀត ស្នាក់នៅបានយូរ និងចំណាយច្រើន អាចបង្កើនចំណូលជូនប្រជាពលរដ្ឋមូលដ្ឋាន និងកសាងសេដ្ឋកិច្ចមូលដ្ឋានប្រកបដោយបរិយាប័ន្ន។
ដើម្បីសម្រេចបាននូវចក្ខុវិស័យ និងគោលបំណងទាំងនេះ រាជរដ្ឋាភិបាលតាមរយៈគណៈកម្មាធិការជាតិអភិវឌ្ឍទេសចរណ៍ដែលមានលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចជាប្រធាន និងលោក ថោង ខុន រដ្ឋមន្ត្រីទេសចរណ៍ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងលោក សាយ សំអាល់ រដ្ឋមន្ត្រីក្រសួងបរិស្ថានជាសមាជិកនោះ បានដាក់ចេញគោលដៅយុទ្ធសាស្ត្រាចំនួន៧ចំណុច។
យុទ្ធសាស្ត្រទាំង៧ចំណុចនោះមាន៖ ១.ការអភិវឌ្ឍតំបន់ទេសចរណ៍អាទិភាពខេត្តសៀមរាប។ ២. គឺការវិនិយោគទេសចរណ៍ និងអភិវឌ្ឍរបៀងទេសចរណ៍ថ្មីៗក្នុងខេត្តសៀមរាប។ ៣. ការអភិវឌ្ឍទីផ្សារ និងផ្សព្វផ្សាយទេសចរណ៍ និងការតភ្ជាប់។ ៤. ការពអង្រឹងគុណភាព និងអភិវឌ្ឍធនធានមនុស្សក្នុងវិស័យទេសចរណ៍ខេត្តសៀមរាប។ ៥. ការគ្រប់គ្រងបរិស្ថាននៅខេត្តសៀមរាប។ ៦. ការអភិវឌ្ឍហេដ្ឋារចនាសម្ព័ន្ធ និងការពង្រឹងការតភ្ជាប់គាំទ្រវិស័យទេសចរណ៍ខេត្តសៀមរាប និងយុទ្ធសាស្ត្រទី៧ គឺអភិបាលកិច្ចសម្រាប់ទ្រទ្រង់ការអភិវឌ្ឍទេសចរណ៍ ខេត្តសៀមរាប។ ក្រសួងសេដ្ឋកិច្ចបានបញ្ជាក់ថា ក្នុងចំណោមយុទ្ធសាស្ត្រទាំង៧នេះ មាន យុទ្ធសាស្ត្រតូចៗចំនួន៤៦ និងសកម្មភាពអនុវត្តចំនួណ១៥១ ដែលបានកំណត់រយៈពេលនៃការអនុវត្ត ក្នុងរយៈពេលខ្លី មធ្យម និងវែង។
បើតាមប្រកាសព័ត៌មានរបស់ក្រសួងសេដ្ឋកិច្ច សេចក្តីព្រាង«ផែនការមេអភិវឌ្ឍទេសចរណ៍ខេត្តសៀមរាប ឆ្នាំ២០២០-២០៣៥ នឹងប្រជុំរវាងអន្តរក្រសួងម្តងទៀតនៅចុងខែតុលា ឆ្នាំ២០២០ ហើយក្រោយពីកែសម្រួលមុននឹងដាក់ជូន សម្តេច ហ៊ុន សែន ដើម្បីពិនិត្យ និងសម្រេច។
ផែនការមេអភិវឌ្ឍទេសចរណ៍សម្រាប់ឆ្នាំ២០២០-២០៣៥ ក្រៅពីមាននៅខេត្តសៀមរាបនេះ រាជរដ្ឋាភិបាលក៏កំពុងរៀបចំផែនការមេអភិវឌ្ឍទេសចរណ៍នៅក្នុងខេត្តមណ្ឌលគិរី និងខេត្តកែបផងដែរ។ នេះបើយោងរបាយការណ៍របស់ក្រសួងទេសចរណ៍៕