ប្រមុខការទូតឥណ្ឌូណេស៊ី៖ ឥណ្ឌូណេស៊ី មិនចង់ជាប់អន្ទាក់ការប្រជែងឥទ្ធិពលអាមេរិក-ចិនឡើយ

សង្គមអន្តរជាតិ

អន្តរជាតិ

ប្រមុខការទូតឥណ្ឌូណេស៊ី៖ ឥណ្ឌូណេស៊ី មិនចង់ជាប់អន្ទាក់ការប្រជែងឥទ្ធិពលអាមេរិក-ចិនឡើយ

09, Sep 2020 , 2:17 pm

រូបភាព

រដ្ឋមន្រ្តីការបរទេសឥណ្ឌូណេស៊ី លោកស្រី Retno Marsudi។ រូបភាព Jakarta Globe

ដោយ: ធៀន ភារិន្ទ

ប្រមុខការទូតឥណ្ឌូណេស៊ី លោកស្រី Retno Marsudi នៅថ្ងៃទី៨ ខែកញ្ញា បានប្រាប់មហាអំណាចចិន និងអាមេរិក កុំចង់ទាញឥណ្ឌូណេស៊ីឲ្យចូលទៅពាក់ព័ន្ធនឹងការប្រកួតប្រជែងឥទ្ធិពលរបស់ខ្លួននៅក្នុងតំបន់ ព្រោះឥណ្ឌូណេស៊ី មិនចង់ជាប់អន្ទាក់ក្នុងល្បែងនយោបាយបែបនេះទេ។ លោកស្រី ថ្លែងក្នុងន័យព្រមានបែបនេះ ស្របពេលដែលចិន និងអាមេរិកបង្កើនការប្រកួតប្រជែងគ្នាលើបញ្ហាជាច្រើននៅក្បែរតំបន់អាស៊ាន ពិសេសសមុទ្រចិនខាងត្បូង។

ការប្រកួតប្រជែងរវាងចិន និងអាមេរិក ត្រូវបានមើលឃើញថា មានសភាពកាន់តែស្រួចស្រាលទៅៗដែលធ្វើឲ្យប្រទេសនៅអាស៊ីអាគ្នេយ៍បារម្ភខ្លាំង។ នៅសមុទ្រចិនខាងត្បូង ចិនបានធ្វើសមយុទ្ធយោធា ឯអាមេរិក បានប្រជ្រៀតខ្លួនតាមរយៈគោលការណ៍សេរីភាពនៃនាវាចរណ៍។ មិនត្រឹមទាស់ទែងតែពីរនាក់ឡើយ មហាអំណាចទាំងពីរ ក៏បានស្វែងរកការគាំទ្រជំហររបស់ខ្លួនពីប្រទេសនៅក្នុងតំបន់ ជាពិសេសរដ្ឋនៅអាស៊ាន។

ឥណ្ឌូណេស៊ី ដែលត្រូវបានចាត់ទុកជាបងធំរបស់អាស៊ាន មិនចង់ចូលពាក់ព័ន្ធក្នុងការប្រកួតប្រជែងនេះឡើយ។ លោកស្រី Retno Marsudi រដ្ឋមន្ត្រីការបរទេសឥណ្ឌូណេស៊ី ជាអ្នកប្រកាសបែបនេះកិច្ចសម្ភាសជាមួយទីភ្នាក់ងារព័ត៌មាន Reuters នៅថ្ងៃទី៨ ខែកញ្ញា មុនរដ្ឋមន្ត្រីការបរទេសអាស៊ាន បើកជំនួបប្រចាំជាមួយដៃគូរបស់ខ្លួន។

ជាមួយគ្នាដែរ ប្រមុខការទូតឥណ្ឌូណេស៊ីរូបនេះ ក៏បានជំរុញអាស៊ាន ត្រូវតែរក្សាជំហរឲ្យនៅកណ្តាល និងសាមគ្គីគ្នា ដើម្បីប្រឈមនឹងបញ្ហាការប្រកួតប្រជែងឥទ្ធិពលចិន និងអាមេរិក។ «អាស៊ាន និងឥណ្ឌូណេស៊ី ចង់បង្ហាញទៅប្រទេសទាំងអស់ថា យើងត្រៀមខ្លួនរួចហើយ ដើម្បីក្លាយជាដៃគូ»។ លោកស្រី Retno បានបញ្ជាក់បែបនេះ ដោយបន្ថែមថា៖ «យើងមិនចង់ធ្លាក់ក្នុងអន្ទាក់នៃការប្រកួតប្រជែងទេ»។

បើតាមរដ្ឋមន្ត្រីការទូតឥណ្ឌូណេស៊ី ការរីកសាយនៃយោធូបនីយកម្មនៅក្នុងសមុទ្រចិនខាងត្បូង និងជម្លោះចិន-អាមេរិក កាន់តែធំឡើង គឺជាបញ្ហាគួរឲ្យបារម្ភ ហើយនេះ គឺជាអ្វីដែលអាស៊ាន ត្រូវតែប្រឈម។ បន្ថែមពីនេះ លោកស្រីក៏បានសាទរសេចក្តីថ្លែងការណ៍រួមរបស់អាស៊ាននៅខែមុន ជុំវិញជំហរលើសមុទ្រចិនផងដែរ។

សូមបញ្ជាក់ថា អាស៊ាន មានសមាជិកចំនួន ១០ប្រទេស ក្នុងនោះមានដូចជា វៀតណាម កម្ពុជា ព្រុយណេ ហ្វីលីពីន ម៉ាឡេស៊ី ឥណ្ឌូណេស៊ី ឡាវ មីយ៉ាន់ម៉ា ថៃ សិង្ហបុរី។ ក្នុងចំណោមនេះ មាន៤ប្រទេស ដែលមាន ហ្វីលីពីន ព្រុយណេ វៀតណាម ម៉ាឡេស៊ី កំពុងមានជម្លោះជាមួយចិន នៅក្នុងសមុទ្រចិនខាងត្បូង៕