ជាតិ
សេដ្ឋកិច្ច
រដ្ឋមន្ត្រីការបរទេសASEM ប្តេជ្ញាផ្តល់ប្រយោជន៍ពាណិជ្ជកម្ម-វិនិយោគគ្នាទៅវិញទៅមក ក្នុងវិបត្តិកូវីដ-១៩
×![]()
ភ្នំពេញ៖ រដ្ឋាភិបាលនានាក្នុងតំបន់អាស៊ី-អឺរ៉ុប(ASEM) ប្តេជ្ញាធ្វើការរួមគ្នា ផ្តល់ប្រយោជន៍ឱ្យគ្នាទៅវិញទៅមកសម្រាប់ធ្វើពាណិជ្ជកម្ម និងវិនិយោគ ស្ថិតក្នុងវិបត្តិពិភពលោកនៃជំងឺឆ្លងកូវីដ-១៩(COVID-19)។ នេះបើតាមសេចក្តីថ្លែងការណ៍រួមនៃកិច្ចប្រជុំអាស៊ី-អឺរ៉ុប(ASEM) ស្តីពី«ជំងឺកូវីដ-១៩ និងសិទ្ធិមនុស្ស» លើកទី១៣ ដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំ ។
សេចក្តីថ្លែងការណ៍រួម របស់រដ្ឋមន្ត្រីការបរទេសASEM បានបញ្ជាក់ថា ទោះបីប្រទេសជាដៃគូASEM អនុវត្តវិធានការវិសាមញ្ញាក្នុងការការពារ ស្វែងរក គ្រប់គ្រង និងឆ្លើយតបទៅនឹងរីករាលនៃកូវីដ-១៩ ក៏ដោយ ក៏រដ្ឋាភិបាលនៃប្រទេសទាំងនោះ នៅតែប្តេជ្ញារួមគ្នា ឆ្ពោះទៅរកបរិយាកាសមួយមានលក្ខណៈបើកចំហ សេរី និងយុតិ្តធម៌។ លើសពីនេះទៅទៀត គឺគ្មានការរើសអើង ដែលផ្តល់នូវភាពស្មើគ្នា តម្លាភាព និងផ្តល់អាប្រយោជន៍ឱ្យគ្នាទៅវិញទៅមកសម្រាប់ធ្វើពាណិជ្ជកម្ម និងវិនិយោគ។
«យើងត្រូវការខ្សែច្រវាក់ផ្គត់ផ្គង់ដែលកាន់តែធន់ និងមានពិពិធកម្ម គឺមានភាពចាំបាច់ ដើម្បីទប់ទល់នឹងស្ថានភាពវិបត្តិផ្សេងៗ នាពេលអនាគត»។ យើងនឹងបន្តធានានូវលំហូរទំនិញ និងសេវាកម្មសំខាន់ៗ ឆ្លងកាត់ព្រំដែន ក៏ដូចជាការចែកចាយជាសកល និងសមស្របចំពោះទំនិញ និងសេវាកម្មទាំងនោះ ដោយមិនឱ្យមានការរាំងស្ទះអ្វីឡើយ»។ នេះបើតាមសេចក្តីថ្លែងការណ៍របស់រដ្ឋមន្ត្រីការបរទេសASEM។
សេចក្តីថ្លែងការណ៍រួមដដែល បានអះអាងថា ការប្តេជ្ញាទាំងនេះ គឺនឹងធ្វើឡើងយ៉ាងជិតសិ្នទ្ធ ដើម្បីដោះស្រាយរាល់ការរាំងស្ទះដល់ផ្នែកផ្គត់ផ្គង់ ដែលត្រូវការសម្រាប់សុខភាព និងសុខុមាលភាពរបស់ប្រជាជនទាំងអស់។
ទន្ទឹមនឹងគ្នានេះ ប្រទេសក្នុងតំបន់អាស៊ី-អឺរ៉ុប នឹងបន្តធ្វើគ្នារួមគ្នា ដើម្បីរក្សា និងសម្រួលដល់ពាណិជ្ជកម្មអន្តរជាតិ រួមទាំងតាមរយៈអង្គការពាណិជ្ជកម្មពិភពលោក និងសម្របសម្រួលដល់ការឆ្លើយតបនានាដែលធានានូវដំណើរការចរាចរណ៍អន្តរជាតិ និងហេដ្ឋារចនាសម្ព័ន្ធដឹកជញ្ជូនសំខាន់ៗ ទាំងផ្លូវអាកាស និងទាំងកំពង់ផែ។
កិច្ចប្រជុំអាស៊ី-អឺរ៉ុប ថ្នាក់រដ្ឋមន្ត្រីការបរទេស ស្តីពី«ជំងឺកូវីដ-១៩ និងសិទ្ធិមនុស្ស» លើកទី១៣ ដែលកម្ពុជាធ្វើជាម្ចាស់ផ្ទះនេះ មានសហភាពអឺរ៉ុប និងអាល្លឺម៉ង់ ជាប្រទេសសម្របសម្រួលក្រុមអឺរ៉ុប មានសិង្ហបុរី ជាប្រទេសសម្របសម្រួលក្រុមអាស៊ាន និងរុស្សី ជាប្រទេសសម្របសម្រួលក្រុមប្រទេសអាស៊ីភាគឦសាន និងខាងត្បូងនេះ។
គិតត្រឹមថ្ងៃទី៩កញ្ញា ឆ្នាំ២០២០ មានមនុស្សជាង២៧លាននាក់ក្នុងពិភពលោកបានឆ្លងជំងឺកូវីដ-១៩ ដោយក្នុងនោះមានជិត២០លាននាក់ បានជាសះស្បើយ និងមានជាង៩០ម៉ឺននាក់បានស្លាប់។ នេះបើតាមរបាយការណ៍របស់គេហទំព័រ worldmeter.info៕
Tag:
ពាណិជ្ជកម្ម
វិនិយោគ
កូវីដ-១៩
ASEM
© រក្សាសិទ្ធិដោយ thmeythmey.com
