PSG ចាញ់ក្រុមឡើងថ្មី Lens ក្នុងជំនួបបើកឆាក ក្រោយកីឡាករសំខាន់ៗឆ្លង COVID-19

កីឡាអន្តរជាតិ

អន្តរជាតិ

PSG ចាញ់ក្រុមឡើងថ្មី Lens ក្នុងជំនួបបើកឆាក ក្រោយកីឡាករសំខាន់ៗឆ្លង COVID-19

11, Sep 2020 , 11:06 am

រូបភាព

ដោយ: ទេព ពិទូរ្យ

ក្រុមការពារតំណែងជើងឯក Paris St-Germain ចាប់ផ្តើមយុទ្ធនាការ Ligue 1 រដូវកាលថ្មីដោយទទួលលទ្ធផលខកចិត្តក្រោយចាញ់ក្រុមទើបឡើងពីលីគទី២ Lens ១-០។ អវត្តមានកីឡាករឆ្នើមជាច្រើនដោយសារឆ្លង COVID-19 ជាមូលហេតុធ្វើឲ្យក្រុមលោក Thomas Tuchel បរាជ័យក្នុងជំនួបបើកឆាកនេះ។

នាការប្រកួតនៅកីឡដ្ឋាន Stade Bollaert-Delelis នៅយប់ថ្ងៃទី១០ កញ្ញា ក្រោមក្រសែភ្នែកអ្នកគាំទ្រ៥០០០នាក់ PSG ភ្លាត់ស្នៀតចាញ់ក្នុងជំនួបដំបូងរបស់ខ្លួន ដោយសារអ្នកចាំទីដៃទីពីរ Marcin Bulka បង្កើតកំហុសនៅមុខទី ដែលធ្វើឲ្យ Ignatius Ganago ខ្សែប្រយុទ្ធក្រុម Len ដណ្តើមបាល់បាន និងសម្រេចទីនៅនាទី៥៧។

អ្វីដែលគួរចាប់អារម្មណ៍ក្នុងជំនួបនេះ គឺក្រុមការពារតំណែងជើងឯកបានដាក់កីឡាករថ្មីៗជាច្រើនរូប ខណៈកីឡាករល្អជាច្រើនសុទ្ធតែគ្មានឈ្មោះ។ ដាក់កីឡាករក្មេងច្រើន មិនមែនអ្នកចាត់ការទូទៅលោក Tuchel ចង់ដឹងពីសមត្ថភាពកូនក្រុមនោះទេ ប៉ុន្តែបណ្តាលមកពីតារាល្បីៗរបស់ខ្លួនជាច្រើននាក់កំពុងសម្រាកព្យាបាលក្រោយឆ្លង COVID-19។

១១នាក់ដំបូងរបស់ PSG សម្រាប់ជំនួបបើកឆាករដូវកាលថ្មី

បើតាមការផ្សាយរបស់ BBC សមាជិកក្រុមយក្សបារាំងចំនួន៧រូបដែលឆ្លងជំងឺរាតត្បាតសកលក្រោយត្រឡប់ពីដើរកម្សាន្តនៅកោះ Ibiza មាន អ្នកចាំទី Keylor Navas ខ្សែការពារ Marquinhos ខ្សែបម្រើ Angel Di Maria, Leandro Paredes, Mauro Icardi រួមទាំងតារាស៊ុតបញ្ចូល Kylian Mbappe និង Neymar។

Lens ដែលជាក្រុមទើបឡើងពីលីគទី២របស់បារាំង Ligue 2 បានទាញយកផលប្រយោជន៍ពីអវត្តមានសមាជិកសំខាន់របស់ PSG នេះ ដើម្បីទទួលបាន៣ពិន្ទុសម្រាប់ការប្រកួតលើកទី២ក្នុងក្របខណ្ឌកំពូលបារាំងរដូវកាល ២០២០-២១ របស់ពួកគេ។

PSG បានក្លាយជាម្ចាស់ជើងឯក Ligue 1 រដូវកាលមុន តាមរយៈការសម្រេចរបស់ប្រធានលីគនៅពាក់កណ្តាលទី ក្រោយជំងឺ COVID-19 រាតត្បាតខ្លាំងក្នុងប្រទេសបារាំង។ ខណៈពួកគេមានពិន្ទុនាំមុខដល់ទៅ១២ពិន្ទុ។

ជំនួបបន្ទាប់ អ្នកចាត់ការសញ្ជាតិអាល្លឺម៉ង់នឹងត្រូវដឹកនាំ PSG ក្នុងទឹកដីខ្លួនដើម្បីទទួលភ្ញៀវ Marseille នៅថ្ងៃទី១៣ ខែកញ្ញា។ តើលោក Tuchel ត្រូវប្រើប្រាស់សមាជិកក្រុមនេះដដែល ឬ Super Star របស់លោកជាទាន់ពេលសម្រាប់ការប្រកួតទី២នៅ Le Parc des Princes?