ប៉េកាំងប្រាប់វ៉ាស៊ីនតោនឲ្យឈប់ធ្វើបាបនិស្សិតចិន ក្រោយអាមេរិកលុបទិដ្ឋាការជាង១០០០នាក់

សង្គមអន្តរជាតិ

អន្តរជាតិ

ប៉េកាំងប្រាប់វ៉ាស៊ីនតោនឲ្យឈប់ធ្វើបាបនិស្សិតចិន ក្រោយអាមេរិកលុបទិដ្ឋាការជាង១០០០នាក់

11, Sep 2020 , 8:29 pm

រូបភាព

លោក Zhao Lijian អ្នកនាំពាក្យក្រសួងការបរទេសចិននាសន្និសីទសារព័ត៌មានថ្ងៃទី១០ ខែកញ្ញា។ រូបភាពពីក្រសួងការបរទេសចិន

ដោយ: តន ចាន់រិទ្ធារ៉ា

ក្រសួងការបរទេសចិន បានស្នើឲ្យទីក្រុងវ៉ាស៊ីនតោន បញ្ឈប់ការធ្វើទុក្ខបុកម្នេញនិស្សិតចិនដែលកំពុងរៀនសូត្រនៅទឹកដីអាមេរិក ព្រោះវាប៉ះពាល់ដល់ការផ្លាស់ប្ដូររវាងប្រជាជនប្រទេសទាំងពីរ។ ការស្នើនេះ ធ្វើឡើងក្រោយអាមេរិកដកហូតទិដ្ឋាការពីនិស្សិត និងអ្នកស្រាវជ្រាវចិនប្រមាណ១០០០នាក់ក្រោមហេតុផលថា លួចស៊ើបការណ៍ឲ្យរដ្ឋាភិបាលចិន។ អ្នកនាំពាក្យក្រសួងការបរទេសចិនព្រមានថា ចិនអាចចាត់វិធានការតបវិញ។

នាសន្និសីទសារព័ត៌មានថ្ងៃទី១០ ខែកញ្ញា លោក Zhao Lijian អ្នកនាំពាក្យក្រសួងការបរទេសចិន ចាត់ទុកការដកហូតទិដ្ឋាការពីនិស្សិត និងអ្នកស្រាវជ្រាវចិនដោយក្រសួងការបរទេសអាមេរិក ជាទង្វើឆ្គាំឆ្គង ដែលផ្ទុយពីការអះអាងរបស់ខ្លួនថា ជាប្រទេសបើកចំហ និងមានសេរីភាព។ សកម្មភាពនេះ ក៏ដើរផ្ទុយពីការយោបល់របស់សាធារណជនទូទៅក្នុងប្រទេសទាំងពីរ ក៏ដូចជានិន្នាការផ្លាស់ប្ដូររវាងប្រជាជននៅលើពិភពលោកជាទូទៅ។

នៅថ្ងៃទី៩ ខែកញ្ញា ក្រសួងការបរទេសអាមេរិក បានប្រកាសថា ខ្លួនបានលុបចោលទិដ្ឋាការដែលផ្ដល់ឲ្យជនជាតិចិនជាង១០០០នាក់គិតតាំងពីថ្ងៃទី១ ខែមិថុនាមក ដែលក្នុងនោះមានទាំងនិស្សិតកំពុងសិក្សានៅអាមេរិក និងអ្នកស្រាវជ្រាវនៅតាមសាកលវិទ្យាល័យនានាផង។ ការលុបចោលនេះ ជាការអនុវត្តតាមបញ្ជារបស់ប្រធានាធិបតី ដូណាល់ ត្រាំ ដែលតែងចោទចិនថា ប្រើប្រាស់និស្សិតចិនដើម្បីប្រមូលព័ត៌មាននានាឲ្យរដ្ឋាភិបាលប៉េកាំង។

ប៉ុន្តែលោក Zhao ប្រាប់អ្នកកាសែតជាច្រើនថា សកម្មភាពបែបនេះ ប៉ះពាល់ផលប្រយោជន៍ និងសិទ្ធិស្របច្បាប់របស់និស្សិតចិនដែលកំពុងសិក្សានៅអាមេរិក ហើយក៏ជាការធ្វើទុក្ខបុកម្នេញផ្នែកនយោបាយពេញទី ការរើសអើងជាតិសាសន៍ ព្រមទាំងបំពានសិទ្ធិមនុស្សរបស់ជនជាតិចិនទាំងនោះ។ អ្នកនាំពាក្យរូបនេះ ប្រាប់អាមេរិកឲ្យបញ្ឈប់ការរឹតត្បិតដែលគ្មានហេតុផល និងការសង្កត់សង្កិនសិទ្ធិនិស្សិតចិនក្រោមហេតុផលគ្រប់ទម្រង់។

«យើងគាំទ្រនិស្សិតចិនក្នុងការការពារសិទ្ទិស្របច្បាប់ និងផលប្រយោជន៍ក្រោមច្បាប់កំណត់។ ចិនរក្សាសិទ្ធិក្នុងការឆ្លើយតបថែមទៀត។» នេះជាព្រមានរបស់មន្ត្រីក្រសួងការបរទេសចិនរូបនេះទៅកាន់អាមេរិក។

សិស្សចិនរៀននៅអាមេរិក ប្រភពចំណូលដ៏សំខាន់មួយរបស់បណ្ដាសាកលវិទ្យាល័យអាមេរិកក្នុងកាលៈទេសៈដែលជំងឺ COVID-19 កំពុងរាតត្បាតនោះ។ នៅឆ្នាំ២០១៩ និស្សិចិនមានជិត៣៧ម៉ឺននាក់ រៀននៅអាមេរិក ជាមួយអ្នកស្រាវជ្រាវជាច្រើនទៀត។ យ៉ាងណាមិញ ទីក្រុងវ៉ាស៊ីនតោនអះអាងថា និស្សិតចិនកាន់តែច្រើន បានក្លាយជាឧបករណ៍របស់បក្សកុម្មុយនីស្តចិនក្នុងការលួចស៊ើបការណ៍សំងាត់ពីអាមេរិក៕