សង្គមអន្តរជាតិ
អន្តរជាតិ
នយោបាយអន្តរជាតិ
Microsoft ព្រមានថាមាន Hacker ពីចិន រុស្ស៊ីនិងអ៊ីរ៉ង់ព្យាយាមវាយប្រហារការបោះឆ្នោតអាមេរិក (ឆ្វេង) លោក ដូណាល់ ត្រាំ ប្រធានាធិបតីអាមេរិក និង លោក ចូ បៃឌិន បេក្ខជនប្រធានាបតីបក្សប្រជាធិបតេយ្យ (AFP)
× ក្រុម Hacker ដែលជាប់ទាក់ទងនឹងប្រទេសរុស្ស៊ី ចិន និងអ៊ីរ៉ង់ កំពុងព្យាយាមវាយប្រហារតាមប្រព័ន្ធអ៊ីនធឺណែតលើយុទ្ធនាការប្រធានាធិបតីទាំងបក្សប្រជាធិបតេយ្យ និងសាធារណរដ្ឋ។ ក្រុមហ៊ុន Microsoft បានព្រមានបែបនេះ។ បើតាមក្រុមហ៊ុនបច្ចេកវិទ្យាយក្សនេះ ក្រុម Hackers រុស្ស៊ី ដែលបានជ្រៀតជ្រៀកក្នុងការបោះឆ្នោតអាមេរិកកាលពីឆ្នាំ២០១៦ បានចូលពាក់ព័ន្ធម្ដងទៀត។
ការបោះឆ្នោតអាមេរិក ជាគោលដៅវាយប្រហាររបស់ក្រុម Hacker មកពីចិន រុស្ស៊ី និងអ៊ីរ៉ង់។ នេះជាការរកឃើញរបស់ Microsoft ។ ពួក Hacker ដែលធ្វើសកម្មភាពប្រឆាំងលោកស្រី ហ៊ីឡារី គ្លីនតុន កាលពីឆ្នាំ២០១៦ ក៏ធ្វើសកម្មភាពភាពម្ដងទៀតនៅឆ្នាំ២០២០ ។
ក្នុងសេចក្តីប្រកាសព័ត៌មាន នៅថ្ងៃទី ១០ ខែកញ្ញា លោក Tom Burt អនុប្រធានក្រុមហ៊ុន Microsoft បញ្ជាក់ដូច្នេះថា៖«ក្នុងប៉ុន្មានសប្តាហ៍ចុងក្រោយ Microsoft បានរកឃើញការវាយប្រហារតាមប្រព័ន្ធអ៊ីនធឺណិតលើមនុស្ស និងអង្គការពាក់ព័ន្ធក្នុងការបោះឆ្នោតប្រធានាធិបតីអាមេរិកដែលខិតជិតមកដល់ រួមមាន ការវាយប្រហារមិនជោគជ័យលើមនុស្សទាំងក្នុងយុទ្ធនាការរកសំឡេងឆ្នោតរបស់លោក បៃឌិន និងលោក ត្រាំ»។
ត្រង់ចំណុចនេះ ក្រុមហ៊ុន Microsoft បានកំណត់អត្តសញ្ញាណក្រុម Hacker ឈ្មោះថា Strontium ដែលសង្ស័យថាជាប់ទាក់ទងនឹងភ្នាក់ងារចារកម្មរុស្ស៊ី ។ បើតាមលោក Burt ក្រុមHacker រុស្ស៊ីនេះបានវាយប្រហារអង្គការជាង២០០ ដែលភាគច្រើនគឺជាប់ទាក់ទងនឹងគណបក្សនយោបាយអាមេរិកទាំងពីរ។
សម្រាប់ក្រុម Hacker ឈ្មោះ Zirconium ដែលមានមូលដ្ឋាននៅចិន លោក Burt អះអាងថា ពួកនេះ បានវាយប្រហារលើបុគ្គលជាន់ខ្ពស់ដែលជាប់ពាក់ព័ន្ធនឹងការបោះឆ្នោតអាមេរិក រួមមាន មនុស្សដែលធ្វើការឲ្យយុទ្ធនាការលោក ចូ បៃឌិន បេក្ខជនប្រធានាធិបតីមកពីបក្សសាធារណរដ្ឋ និងប្រធានាធិបតី ដូណាល់ ត្រាំ និងមេដឹកនាំសំខាន់ៗក្នុងសហគមន៍កិច្ចការអន្តរជាតិ ជាដើម។
ដោយឡែក ក្រុម Hacker ឈ្មោះថា Phosphorus ដែលមូលដ្ឋាននៅអ៊ីរ៉ង់វិញ បានវាយប្រហារលើគណនីបណ្ដាញសង្គមផ្ទាល់ខ្លួនរបស់មនុស្សដែលពាក់ព័ន្ធនឹងយុទ្ធនាការបោះឆ្នោតរបស់លោក ត្រាំ។ បើតាម Microsoft ក្រុមនេះ ធ្វើសកម្មភាព Hack តែបរាជ័យលើបុគ្គលិកសេតវិមានអាមេរិក និងបុគ្គលិកយុទ្ធនាការរកសំឡេងឆ្នោតលោកត្រាំ ចន្លោះពីខែឧសភា និងមិថុនា ឆ្នាំ២០២០នេះ។
យ៉ាងណាមិញ លោក Burt អះអាងថា ក្រុមហ៊ុនលោក បានប្រើបច្ចេកវិទ្យាតាមចាប់ និងបញ្ឈប់ការវាយប្រហារស្ទើរតែទាំងអស់ ហើយថែមទាំងបានផ្ដល់ដំណឹងដោយផ្ទាល់ទៅកាន់អ្នកដែលត្រូវបានវាយប្រហារ ដូច្នេះពួកគេអាចចាត់សកម្មភាពដើម្បីការពារខ្លួនពួកគេ។ ក្នុងសេចក្តីប្រកាសព័ត៌មានដដែល លោក Burt បានសង្កត់ធ្ងន់ថា ក្រុមហ៊ុន Microsoft ពុំទាន់អាចបញ្ជាក់ពីគោលបំណងរបស់ក្រុម Hacker ដែលមានមូលដ្ឋានទាំងបីប្រទេសនេះបានទេ។
សូមបញ្ជាក់ថា ទីភ្នាក់ងារចារកម្មអាមេរិក បានចេញសេចក្តីសន្និដ្ឋានក្នុងឆ្នាំ២០១៦ថា ក្រុម Hacker រុស្ស៊ី បានលូកដៃក្នុងការបោះឆ្នោតអាមេរិក ដោយទម្លាយអ៊ីមែល (Email) ផ្ទៃក្នុងបក្សប្រជាធិបតេយ្យ។ ហើយព្រឹត្តិការណ៍នេះ បានជួយជ្រោមជ្រែងឲ្យលោកត្រាំឈ្នះឆ្នោតលើអ្នកស្រី ហ៊ីឡារី គ្លីនតុន បេក្ខជនប្រធានាធិបតីមកពីបក្សប្រជាធិបតេយ្យពេលនោះ នៅទីបំផុត៕
Tag:
សហរដ្ឋអាមេរិក
រុស្ស៊ី
ចិន
អ៊ីរ៉ង់
ការបោះឆ្នោតអាមេរិក
Hacker
© រក្សាសិទ្ធិដោយ thmeythmey.com