លោក ជា អូន អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានបញ្ជាក់ប្រាប់អ្នកសារព័ត៌មានថ្មីៗថា ចាប់ពីថ្ងៃទី១៥ ខែកញ្ញា  ក្រុមហ៊ុនអាកាសចរCambodia angkor air នឹងបើកការហោះហើរក្នុងស្រុក និងនៅតំបន់មួយចំនួននៅក្នុងប្រទេសចិន និងតំបន់អាស៊ានដែលមានហានិភ័យការរាតត្បាតជំងឺកូវីដ-១៩ទាប។

 

លោក ជា អូន បានរៀបរាប់ដូច្នេះថា៖«ពេលណាគេបើក យើងនឹងទៅ។ ប៉ុន្តែដោយសារគេមិនទាន់បើក។ ភាគច្រើនដែលយើងហោះទៅរាល់ថ្ងៃនោះ គឺមានទៅតែប្រទេសចិនទេ ហើយក្នុងតំបន់អាស៊ីយើងអត់មានទេ»។ 

 

សម្រាប់ក្រសួងទេសចរណ៍សង្ឃឹមថា ក្រុមហ៊ុនអាកាសចរ Cambodia angkor air នោះនឹងពិចារណាបើកប្រត្តិបត្តិការហោះហើរ ឡើងវិញរវាងភ្នំពេញ និងក្រុងព្រះសីហនុផងដែរ។ 

 

បើតាមលោក ជា អូន ក្រុមហ៊ុនអាកាសចរកម្ពុជាទាំងអស់គឺនៅតែបើកការហោះហើរទៅប្រទេសដែលមានការបញ្ជា។ លោក បានរៀបរាប់ដូច្នេះថា៖«ឥឡូវមិនមែនហោះតាមកាលវិភាគ(Schedule)ទេ។ ពេលគេជួលមួយជើងៗទៅ យើងហោះទៅមួយជើងៗទៅ ពេលអត់ក៏អត់ទៅ។ យើងនៅតែហោះមួយៗអ៊ីចឹង តែវាអត់ដូចពីមុនទេ»។

 

លោក ជា អូន បានបញ្ជាក់ថា កម្ពុជាក៏កំពុងតែចរចាជាមួយនឹងវៀតណាម និងសិង្ហបុរី ក្នុងការបើកការហោះហើរឡើងវិញផងដែរ។ បើតាមលោក ជា អូន ការបើកជើងហោះហើរនេះ គឺគោរពទៅតាមស្តង់ដារសុវត្ថិភាពខ្ពស់។ លោកបានរៀបរាប់ដូច្នេះថា៖«យើងមានការប្រុងប្រយ័ត្ន មិនមែនចេះតែបើកទេ គឺយើងមានការរឹតត្បិតខ្លាំងណាស់។ ហើយវិធានសុខាភិបាល និងលក្ខខណ្ឌគឺនៅតែមានអ៊ីចឹង»។

 

សូមបញ្ជាក់ថា បច្ចុប្បន្នកម្ពុជាបានផ្អាកជើងហោះហើរពីប្រទេស ឥណ្ឌូណេស៊ី ម៉ាឡេស៊ី និងហ្វីលីពីននជាបណ្តោះអាសន្នសិន ដោយសារតែជាប្រទេសដែលមានអត្រាហក់ខ្ពស់នូវជំងឺកូវីដ-១៩៕