លោក យិន ចិន ជាម្ចាស់កន្លែងកម្សាន្តថ្មីមួយកន្លែងឈ្មោះថា «តាលោសែនជ័យរីស៊ត» ស្ថិតនៅខេត្តពោធិ៍សាត់។ រយៈពេលជិត២ខែហើយដែលទីតាំងកម្សាន្តរបស់លោក បើកដំណើរការ និងមានភ្ញៀវទេសចរមកកម្សាន្តច្រើនកុះករ។ យន្តហោះពណ៌ក្រហម ដាក់បញ្ឈរចោល ក្នុងបរិវេណរីស៊តរបស់លោក យិន ចិន មានកម្ពស់៤ម៉ែត្រ បណ្ដោយ២០ម៉ែត្រ និងទទឹង៣ម៉ែត្រ។ លោក យិន ចិន ចេះធ្វើយន្តហោះតាមយូធូប ដោយចំណាយពេលធ្វើ អស់ជាង១ខែ ។

បុរសវ័យ៣២ឆ្នាំរូបនេះ បានប្រាប់ThmeyThmey25 តាមទូរសព្ទដូច្នេះថា៖«តាមពិតទៅខ្ញុំគិតអញ្ចេះ! ធ្វើយន្តហោះហ្នឹងខ្ញុំគិតថា អ្នកណាក៏គេចេះធ្វើដែរ គ្រាន់តែធ្វើឈរចោលអត់ហោះចឹងហ៎ គ្រាន់តែគេអត់ចង់ធ្វើ។ តែខ្ញុំធ្វើនឹងដោយសារ ខ្ញុំគិតថាស្រុកខ្មែរមិនទាន់មានទេយន្តហោះ(ធ្វើដោយខ្លួនឯង) ហើយមួយទៀតបើទឹកដីពោធិ៍សាត់ដឹងតែអត់ម៉ង យន្តហោះពិតប្រាកដដឹងតែមិនមាន។ អ៊ីចឹងខ្ញុំចង់ធ្វើមួយឲ្យមានជារាងយន្តហោះឲ្យគេស្គាល់»។ 

លោក យិន ចិន ចំណាយប្រាក់ និងពេលវេលាក្នុងការធ្វើយន្តហោះមួយគ្រឿងនេះ ដើម្បីចង់ទាក់ទាញភ្ញៀវទេសចរឲ្យមកកម្សាន្តកន្លែងរបស់ខ្លួន។ ក្រៅពីយន្តហោះ រីស៊តរបស់លោក ចិន ក៏មានសួនផ្កា និងអាងហែលទឹក សម្រាប់ភ្ញៀវទេសចរផងដែរ។ លោក មិនអាចបញ្ជាក់ពីចំណូលសរុបដែលលោកទទួលបាននោះឡើយ ដោយគ្រាន់តែបញ្ជាក់ថា៖«ភ្ញៀវទេសចរ ត្រូវទិញសំបុត្រចូល ម្នាក់១ដុល្លារ»។

រូបភាពពី ហ្វេសប៊ុកផេក តាលោកសែនជ័យរីស៊ត 
 

លោក យិន ចិន មានក្ដីស្រម៉ៃចង់ជិះយន្តហោះតាំងពីក្មេង។ ហើយលោកក៏ចង់ឲ្យអ្នកផ្សេង ពិសេសមនុស្សចាស់ ដែលគ្មានឱកាសទៅក្រៅប្រទេស បានជិះយន្តហោះផងនោះ ទើបសម្រេចបង្កើតយន្តហើយសិប្បនិម្មិតមួយនេះឡើង សម្រាប់ឱ្យពួកគេបានចុះទស្សនា និងអង្គុយលេង៕