លោកគីម ជុងអ៊ុន គឺជាកូនទី៣ និងជាកូនពៅរបស់លោក គីម ជុងអ៊ីល និងពុំសូវជាមានអ្នកស្គាល់ប៉ុន្មានឡើយ។ គេជឿថា លោកកើតនៅក្នុងឆ្នាំ១៩៨៤ ហើយលោកបានចំណាយពេលវេលារៀនសូត្រ នៅប្រទេសស្វ៊ីសនៅពេលជាកុមារ។ ក្រោយមកទៀតលោកបានចូលរៀននៅសាកលវិទ្យាល័យសង្គ្រាមគីម ជុងអ៊ីល ពីឆ្នាំ២០០២ ដល់២០០៧។

 

នៅឆ្នាំ២០០៩ ពាក្យចចាមអារ៉ាម ចាប់លេចលឺជុំវិញការស្នងតំណែងពីឪពុក បន្ទាប់ពីថ្នាក់ដឹកនាំកំពូលកូរ៉េខាងជើង លោកគីម ជុងអ៊ីលបានស្នើឈ្មោះលោកចូលបេក្ខជននៃបក្សពលករកូរ៉េខាងជើង។ ក្នុងឆ្នាំដដែលនោះ លោកត្រូវបានផ្តល់តំណែងក្នុងគណៈកម្មការការពារជាតិ ដែលជាស្ថាប័នខ្ពស់បំផុតយោងតាមរដ្ឋធម្មនុញ្ញកូរ៉េខាងជើង។ 

 

ក្នុងខែមិថុនា ឆ្នាំ២០០៩ លោកត្រូវបានតែងតាំងជាប្រធាននាយកដ្ឋានសន្តិសុខជាតិ។ ក្រោយមកនៅឆ្នាំ២០១០ លោកត្រូវបានតែងតាំងជាឧត្តមសេនីយ៍ផ្កាយ៤ បើទោះបីជាគ្មានបទពិសោធក្នុងសមរភូមិក៏ដោយ។

 លោកគីម ជុងអ៊ុន និងឪពុក គីម ជុងអ៊ីល។ រូបភាព៖ Reuters

 

ក្រោយមរណភាពរបស់លោក គីម ជុងអ៊ីល នៅខែធ្នូ ឆ្នាំ២០១១ លោកត្រូវគីម ជុងអ៊ុនត្រូវបានតែងតាំងជាថ្នាក់ដឹកនាំកំពូលរបស់កូរ៉េខាងជើង។ នៅមេសាឆ្នាំ២០១២ លោកត្រូវបានតែងតាំងជាលេខាទី១នៃបក្សពលករកូរ៉េខាងជើង ប្រធានគណកម្មការយោធាមជ្ឈិមកូរ៉េខាងជើង និងជាប្រធានគណៈកម្មការការពារជាតិ។ លោក គីម ជុងអ៊ីល ដែលស្លាប់ហើយនោះ ត្រូវបានតែងតាំងជាអគ្គលេខាធិការអមតនៃបក្សពលករកូរ៉េខាងជើង។ លោក គីម អ៊ីលស៊ុង វិញ ត្រូវបានតែងតាំងជាប្រធានាធិបតីអមតផងដែរ។

 

នៅឆ្នាំ២០១៣ មួយឆ្នាំក្រោយកាន់អំណាច លោកបានដាក់ចេញនូវគោលនយោបាយជាតិ(byungjin) ដែលការអភិវឌ្ឍសេដ្ឋកិច្ចជាតិត្រូវដើរទន្ទឹមគ្នាជាមួយការអភិវឌ្ឍសមត្ថភាពយោធា។

នៅខែមិថុនា ឆ្នាំ២០១៦ សភាកូរ៉េខាងជើងបានធ្វើការកែប្រែរដ្ឋធម្មនុញ្ញដោយពង្រីកបន្ថែម និងពង្រឹងអំណាចលោកគីម ជុងអ៊ុន។ រដ្ឋធម្មនុញ្ញថ្មីនេះ បានបង្កើតស្ថាប័នថ្មី ដែលមានឈ្មោះថា គណៈកម្មការកិច្ចការរដ្ឋ ដែលជាស្ថាប័នដែលមានអំណាចខ្ពស់បំផុត និងលុបចោលគណៈកម្មការការពារជាតិ។ តំណែងនេះ ផ្តល់អំណាចឲ្យលោកក្លាយជាមេបញ្ជាការកំពូលនៃកងទ័ពប្រជាជនកូរ៉េផងដែរ។

 

ចំណែកឯក្នុងសន្និបាតទី៧ នៃបក្សពលករកូរ៉េខាងជើង បក្សបានបង្កើតតំណែងថ្មីនិងខ្ពស់បំផុតឲ្យលោក គីមជុងអ៊ុន ជាប្រធានបក្សពលករកូរ៉េខាងជើង។ ក្នុងឆ្នាំ២០១៩ លោកត្រូវបានសភាកូរ៉េខាងជើងផ្តល់តំណែងជា តំណាងកំពូលរបស់ប្រជាជនកូរ៉េទាំងអស់ និងថ្នាក់ដឹកនាំកំពូលនៃសាធារណរដ្ឋ។

 

ក្នុងការប្រើប្រាស់លិខិតផ្លូវការជាមួយកូរ៉េខាងជើង ប្រមុខរដ្ឋ និងរដ្ឋាភិបាលប្រទេសដទៃបានសំដៅដល់លោក គីម ជុងអ៊ុន ដោយហៅលោកថា ប្រធានគណៈកម្មការកិច្ចការរដ្ឋនៃសាធារណរដ្ឋប្រជាមានិតប្រជាធិបតេយ្យកូរ៉េខាងជើង៕