ជាតិ
សុខភាព
ក្រសួងសុខាភិបាល អំពាវនាវព្រះសង្ឃ និងពលរដ្ឋ ទប់ស្កាត់ការចម្លងជំងឺគ្រុនផ្ដាសាយធំនៅរដូវភ្ជុំបិណ្ឌ
× ភ្នំពេញ៖ ក្រសួងសុខាភិបាល បានចេញសេចក្ដីជូនដំណឹងស្ដីពី កាពង្រឹងការអនុវត្តវិធានការសុខាភិបាលសម្រាប់ទប់ស្កាត់ការចម្លងជំងឺគ្រុនផ្ដាសាយធំ ក្រោយកើតមានករណីគ្រុនផ្ដាសាយធំនៅតាមខេត្តមួយចំនួននៅក្នុងអំឡុងពេលភ្ជុំបិណ្ឌ។ បើតាមសេចក្ដីជូនចុះថ្ងៃទី១៤ កញ្ញា ក្រសួងសុខាភិបាល អំពាវនាវ និងក្រើនរំលឹកដល់ព្រះសង្ឃ គណៈកម្មការវត្ត និងប្រជាពលរដ្ឋទាំងអស់ ត្រូវយកចិត្តទុកដាក់ និងថែរក្សាអនាម័យ តាមការណែនាំរបស់ក្រសួងសុខាភិបាល។
បន្ទាប់ពីកើតមានករណីការចម្លងជំងឺគ្រុនផ្ដាសាយធំនៅតាមវត្តអារាមមួយចំនួន នៅក្នុងខេត្តតាកែវ ត្បូងឃ្មុំ និងបាត់ដំបង ដែលកើតលើព្រះសង្ឃ ក្រសួងសុខាភិបាល បានអំពាវនាវឲ្យចូលរួមទប់ស្កាត់ជំងឺនេះនៅក្នុងអំឡុងពេលបុណ្យភ្ជុំបិណ្ឌ។ តាមសេចក្ដីជូនដំណឹងរបស់ក្រសួងសុខាភិបាល លទ្ធផលវិភាគនៃមន្ទីរពិសោធន៍បង្ហាញថា ព្រះសង្ឃជាច្រើនអង្គ ដែលមានរោគសញ្ញា ក្ដៅព្រះកាយលើសពី ៣៧.៥ អង្សាសេ ក្អក និងហៀរសំបោរ មានជំងឺគ្រុនផ្ដាសាយធំ។
ក្រសួងសុខាភិបាល បញ្ជាក់ថា តាមការសង្កេតរបស់ក្រសួងឃើញថា នៅតាមវត្តអារាមមួយចំនួន មានការខ្វះចន្លោះ ក្នុងការអនុវត្តវិធានការតាមការណែនាំរបស់ក្រសួង នៅក្នុងអំឡុងពេលភ្ជុំបិណ្ឌ។ សេចក្ដីជូនដំណឹងដែលហត្ថលេខាដោយរដ្ឋមន្ត្រីក្រសួងសុខាភិបាល បានរំលឹកឲ្យបន្តរក្សាអនាម័យ លាងសម្អាតដៃឲ្យញឹកញាប់ និងពាក់ម៉ាស់ក្នុងករណីចាំបាច់ ពិសេសនៅពេលចូលវត្តអារាម។
លោក ម៉ម ប៊ុនហេង បន្តថា ព្រះសង្ឃ និងប្រជាពលរដ្ឋ មិនត្រូវជួបជុំគ្នាទ្រង់ទ្រាយធំឡើយ ដោយរក្សាគម្លាតសុវត្ថិភាពយ៉ាងតិច មួយម៉ែត្រកន្លះឡើងទៅ។ លើសពីនេះ ព្រះសង្ឃអាពាធ ឬបុគ្គលឈឺ មានរោគសញ្ញាផ្ដាសាយ ឬមិនស្រួលខ្លួន ត្រូវសម្រាកក្នុងកុដិ ឬកន្លែងដាច់ដោយឡែក។
សូមបញ្ជាក់ថា កាលពីពេលថ្មីៗនេះ ព្រះសង្ឃចំនួន ៤៦អង្គ ដែលគង់នៅក្នុងវត្តស្វាយដង្គំ ស្រុកឯកភ្នំ ខេត្តបាត់ដំបង មានករណីក្តៅខ្លួន ក្អក និងហៀរសំបោរ។ ក្រោយមានរោគសញ្ញាសង្ស័យលើព្រះសង្ឃចំនួន ២១អង្គ ក្រុមគ្រូពេទ្យខេត្តបាត់ដំបង បានយកវត្ថុសំណាកទៅធ្វើវិភាគនៅវិទ្យាស្ថានប៉ាស្ទ័រកម្ពុជានាព្រឹកថ្ងៃទី១៤ ខែកញ្ញា ហើយលទ្ធផល បង្ហាញថា មិនមានឆ្លងកូវីដ-១៩នោះទេ ដោយកើតជំងឺគ្រុនផ្ដាសាយធំតែប៉ុណ្ណោះ៕
Tag:
សុខភាព
គ្រុនផ្ដាសាយធំ
© រក្សាសិទ្ធិដោយ thmeythmey.com