COVID-19
អន្តរជាតិ
ការចែកចាយវ៉ាក់សាំង COVID-19 ត្រូវការយន្តហោះខ្នាតយក្សដល់ទៅ៨ពាន់គ្រឿង
×
ដោយ៖ កង ម៉េងហុង
ការដឹកជញ្ជូនវ៉ាក់សាំងប្រឆាំងជំងឺ COVID-19 ជុំវិញពិភពលោក នឹងក្លាយជាការដឹកជញ្ជូនដ៏ធំបំផុតដែលមិនធ្លាប់មានពីមុនមកនេះ។ នេះបើយោងតាមការបញ្ជាក់របស់សមាគមការដឹកជញ្ជូនផ្លូវអាកាសអន្តរជាតិ (IATA) ។ យន្ដហោះប៊ូអ៊ីញខ្នាតយក្ស 747 ចំនួន៨០០០ គ្រឿង នឹងត្រូវការជាចាំបាច់ក្នុងប្រតិបត្តិការមួយនេះ។
ទោះបីជាមិនទាន់មានវ៉ាក់សាំងការពារជំងឺ COVID-19 ក្ដី IATA បានធ្វើការរួចហើយជាមួយក្រុមហ៊ុនអាកាសចរ អាកាសយានដ្ឋាន អង្គភាពសុខភាពពិភពលោក និង ក្រុមហ៊ុនឱសថស្តីពីផែនការហោះហើរជាសកលដើម្បីចែកចាយវ៉ាក់សាំង។ ក្នុងផែនការដែល IATA បានប៉ាន់ស្មាន មនុស្សម្នាក់ ទទួលវ៉ាក់សាំងតែមួយដូសប៉ុណ្ណោះ។ ការដឹកជញ្ជូនវ៉ាក់សាំង នឹងត្រូវការយន្តហោះប្រមាណ៨ពាន់គ្រឿង សំដៅធានាការចែកចាយឲ្យមានប្រសិទ្ធភាព។
បើតាមការផ្សាយរបស់សារព័ត៌មាន BBC លោក Alexandre de Juniac ជានាយកប្រតិបត្តិ IATA អះបាននិយាយកាលពីសប្ដាហ៍មុនថា ការផ្តល់វ៉ាក់សាំង COVID-19 ប្រកបដោយសុវត្ថិភាព នឹងក្លាយជាបេសកកម្មប្រចាំសតវត្សរ៍សម្រាប់ឧស្សាហកម្មដឹកទំនិញតាមផ្លូវអាកាសរបស់ពិភពលោក។ លោកបន្តថា វានឹងមិនកើតឡើងទេប្រសិនបើគ្មានការធ្វើផែនការជាមុនដោយប្រុងប្រយ័ត្ន ហើយពេលវេលាបានមកដល់ហើយ។
តាមពិតទៅ ដោយសារាររាតត្បាតជំងឺ COVID-19 ការធ្វើដំណើរតាមផ្លូវការអាកាស ជួបបញ្ហាខ្លាំង ខណៈក្រុមហ៊ុនអាកាសចរបានផ្លាស់ប្តូរពីការដឹកអ្នកដំណើរមកផ្តោតលើការដឹកទំនិញវិញ។ ទោះជាយ៉ាងនេះ ការដឹកជញ្ជូនវ៉ាក់សាំង នៅតែជួបភាពស្មុគស្មាញច្រើន។ មិនមែនយន្តហោះទាំងអស់សុទ្ធតែសមស្របសម្រាប់ការដឹកជញ្ជូននេះទេព្រោះវ៉ាក់សាំងត្រូវការរក្សាក្នុងកំរិតសីតុណ្ហភាពធម្មតាចន្លោះពី ២ទៅ៨អង្សាពេលដឹកជញ្ជូន ឯវ៉ាក់សាំងខ្លះអាចត្រូវការសីតុណ្ហភាពត្រជាក់ខ្លាំងទៀតផង។
ទ្វីបអាហ្វ្រិក ទំនងជាជួបបញ្ហាខ្លាំងជាងគេ។ បើតាម IATA ការចែកចាយវ៉ាក់សាំងនៅទូទាំងទ្វីបអាហ្វ្រិកគឺមិនអាចទៅរួចទេនាពេលបច្ចុប្បន្ននេះ ដោយសារកង្វះសមត្ថភាពដឹកទំនិញ ទំហំនៃតំបន់ និង ភាពស្មុគស្មាញនៃការឆ្លងកាត់ព្រំដែន។
ទាក់ទិននឹងបញ្ហានេះដែរ IATA បានជំរុញឱ្យរដ្ឋាភិបាលចាប់ផ្តើមរៀបចំផែនការដោយប្រុងប្រយ័ត្នពីឥឡូវនេះដើម្បីធានាថា ពួកគេត្រៀមខ្លួនពេញលេញនៅពេលដែលវ៉ាក់សាំងអាចចែកចាយបាន។ ខណៈវ៉ាក់សាំងនឹងក្លាយជាទំនិញដែលមានតម្លៃខ្ពស់ IATA ក៏បានស្នើឲ្យភាគីទាំងអស់ ធានាសុវត្ថិភាពដើម្បីបញ្ចៀសការលួច ឬការលួចចម្លងផងដែរ៕
© រក្សាសិទ្ធិដោយ thmeythmey.com