ជាតិ
ការសម្អាតចង្ក្រានបាយក្នុងវត្តឱ្យស្អាត ក៏ជាផ្នែកមួយជួយលើកសោភ័ណវត្តដែរ
× ភ្នំពេញ៖ សោភ័ណភាពរបស់វត្តអារាម មិនមែនមានត្រឹមតែព្រះវិហារស្អាត ទីធ្លារធំទូលាយមានដាំផ្កាលម្អស្រស់បំព្រង ឬមានដើមឈើម្លប់ត្រសុំត្រសាយត្រជាក់នោះទេ។ ប៉ុន្តែអនាម័យចង្ក្រានបាយក្នុងវត្ត ក៏ជាផ្នែកដ៏សំខាន់មួយ ជួយលើកសម្រស់របស់ទីអារាមដែរ។
វត្តអារាមមួយចំនួនទាំងនៅរាជធានីភ្នំពេញ និងនៅតាមបណ្ដាខេត្ត ត្រូវបានគេមើលឃើញថា នៅមានការឆកល្វែងចំពោះសោភ័ណភាពចង្ក្រានបាយ ក៏ដូចជាកន្លែងទុកដាក់ចង្ហាន់ដែលពុទ្ធបរិស័ទយកទៅប្រគេនព្រះសង្ឃ។ តាមការសង្កេតជាទូទៅនៅក្នុងវត្តខ្លះ បើទោះបីជាមានអ្នកនៅមើលការខុសត្រូវផ្នែកចង្ក្រានក្ដី ក៏ចង្ក្រាននោះមិនសូវជាមានអនាម័យដែរ។
ការទុកដាក់ចង្ហាន់ដែលពុទ្ធបរិស័ទយកទៅប្រគេនព្រះសង្ឃ ក៏ជារឿងគួរយកចិត្តទុកដាក់ផងដែរ។ ជាការកត់សម្គាល់ នៅរដូវភ្ជុំបិណ្ឌ ឬចូលឆ្នាំថ្មីជាដើម វត្តអារាមនានា ទទួលបានចង្ហាន់ពោរពាស ហើយវត្តខ្លះបានតម្រៀបចង្ហាន់ទាំងនោះ នៅជ្រុងម្ខាងនៃសាលាឆាន់ ក្បែរផ្លូវពុទ្ធបរិស័ទដើរទៅអុជធូបនៅខាងមុខព្រះភ័ក្ត្រព្រះពុទ្ធរូប ដោយមិនមានអ្វីគ្របការពារសត្វរុយ ឬធូលីដី។ ទិដ្ឋភាពនេះ ហាក់មិនគួរជាទីគាប់ភ្នែក។
ទោះជាយ៉ាងណា ក៏មានវត្តមួយចំនួនធំ បានគិតគូរពីអនាម័យនៃការទុកដាក់ចង្ហាន់របស់ពុទ្ធបរិស័ទ ដែលនាំយកទៅប្រគេនព្រះសង្ឃដែរ ជាពិសេសវត្តនៅតាមជនបទ ដោយនៅរក្សាបានសាជីគ្របអាហារ ដែលធ្វើពីក្រដាសក្រាស់ៗ។ អាហារទាំងឡាយត្រូវបានរៀបជាជួរនៅលើគ្រែរនាបឈើ ឬរនាបឫស្សី ខ្ពស់ផុតពីផ្ទៃការ៉ូនៃសាលាឆាន់។ ចង្ក្រានបាយនោះទៀតសោត ត្រូវបានរៀបចំយ៉ាងមានរបៀបរៀបរយ ដោយមិនបន្យល់ទុកកាកសំណល់ផ្សេងៗឡើយ៕
Tag:
ភ្ជុំបិណ្ឌ
វត្ត
បុណ្យ
កាន់បិណ្ឌ
ប្រពៃណី
សាសនា
អាហារ
ចង្ក្រាន
ចង្ហាន់
© រក្សាសិទ្ធិដោយ thmeythmey.com