កីឡាអន្តរជាតិ
អន្តរជាតិ
គ្រូ Liverpool ព្រមាន Chelsea ថា ការទិញកីឡាករច្រើនមិនប្រាកដជោគជ័យឡើយ
× អ្នកចាត់ការទូទៅ Liverpool លោក Jurgen Klopp ព្រមាន Chelsea ថាបើគ្រាន់តែចំណាយប្រាក់ច្រើនក្នុងការទិញកីឡាករនោះ នឹងមិនធានាទទួលបានជោគជ័យទេ។ ប៉ុន្តែអ្វីដែលសំខាន់ អាស្រ័យលើកីឡាករថ្មីរបស់ពួកគេ«យល់ចិត្តគ្នា»បានឆាប់កម្រិតណា។
ក្លិបរហស្សនាមតោខៀវដែលមានមហាសេដ្ឋីរុស្ស៊ីលោក Roman Abramovich ជាម្ចាស់ បានចំណាយប្រាក់ជាង ២០០ លានផោន (ជិត៣០០លានដុល្លារអាមេរិក)រួចហើយអំឡុងពេលទីផ្សារដោះដូររដូវកាលនេះ ដើម្បីទិញចូលកីឡាករ៤រូបដែលរួមមាន Timo Werner, Kai Havertz, Hakim Ziyech និង Ben Chilwell ។ ដោយឡែក Thiago Silva និង Malang Sarr បានផ្លាស់ទៅកាន់ Stamford Bridge ដោយគ្មានតម្លៃខ្លួន។
ការចំណាយរបស់ Chelsea រដូវកាលនេះ គឺមានភាពខុសគ្នាឆ្ងាយនឹងក្រុមម្ចាស់ជើងឯក Premier League រដូវកាលមុន។ Liverpool ទើបតែបានចុះហត្ថលេខានាំយកកីឡាករ Kostas Tsimikas ក្នុងតម្លៃ ១១.៧ លានផោន (១៥លានដុល្លារ) ប៉ុណ្នោះ។
លោក Klopp ដែលបានដឹកនាំហង្សក្រហម ឈ្នះពាន Champions League, Fifa Club World Cup និង Premier League ក្នុងរយៈពេល ២ រដូវកាលចុងក្រោយនេះ ជឿជាក់ថាការខិតខំប្រឹងប្រែងលើទីលានហ្វឹកហាត់គឺសំខាន់ជាងការចំណាយច្រើនក្នុងទីផ្សារដោះដូរកីឡាករ។
អ្នកចាត់ការសញ្ជាតិអាល្លឺម៉ង់រូបនេះ បានប្រាប់ BBC ថា៖« យើងបានឈានដល់វគ្គផ្តាច់ព្រ័ត្រ Champions League ពីឆ្នាំជាប់គ្នា និងក្លាយជាម្ចាស់ជើងឯកក្របខណ្ឌលីគកំពូលអង់គ្លេសរដូវកាលមុន។ យើងមិនអាចផ្លាស់ប្តូរអ្វីមួយត្រឹមតែមួយយប់នោះទេ ហើយខ្ញុំក៏ចង់និយាយថា យើងមិនអាចធ្វើដូច Chelsea ពេលនេះឡើយ។ ពួកគេកំពុងតែទិញចូលកីឡាករថ្លៃៗជាច្រើន។ អ្នកមិនអាចធ្វើឲ្យកីឡាករឆ្នើមទាំង១១នាក់ អាចលេងជាមួយគ្នាបានល្អត្រឹមមួយសប្តាហ៍នោះទេ។ អ្វីដែល្អបំផុតនោះ គឺធ្វើការរួមគ្នានៅលើទីលានហ្វឹកហាត់»។
Klopp បន្ថែមថា ក្លិបស្ថិតក្នុងស្ថានភាពខុសៗគ្នា ខណៈ Liverpool ត្រូវការពេល៥ឆ្នាំក្រោមការដឹកនាំរបស់លោក ដើម្បីឈ្នះពានលីគកំពូលអង់គ្លេសជាលើកដំបូងក្នុងរយៈពេល៣០ឆ្នាំ។ ដូច្នេះ ការទិញចូលកីឡាករច្រើនដូច Chelsea មិនប្រាកដថានឹងបានទទួលលទ្ធផលល្អឆាប់ៗនោះទេ។
Liverpool ចាប់ផ្តើមការពារតំណែងជើងឯករបស់ខ្លួនរដូវកាល ២០២០-២១នេះ ដោយត្រូវតទល់ជាមួយ Leeds United ដែលជាម្ចាស់ពានក្របខណ្ឌទី២ Championship នៅថ្ងៃទី១២ ខែកញ្ញានេះ ខណៈ Chelsea ត្រូវប៉ះ Brighton & Hove Albion នៅរាត្រីថ្ងៃទី១៤ ខែកញ្ញា៕
Tag:
Jurgen Klopp
Chelsea
Liverpool
© រក្សាសិទ្ធិដោយ thmeythmey.com