COVID-19
អន្តរជាតិ
ឥណ្ឌាខ្វះអុកស៊ីសែនសម្រាប់អ្នកជំងឺCOVID-19 ខណៈករណីឆ្លងកើនលើស៥លាននាក់
ក្រុមគ្រូពេទ្យ_ឥណ្ឌា។_រូបភាព៖_AFP
×![]()
មន្ត្រីមន្ទីរពេទ្យឥណ្ឌា នៅថ្ងៃទី១៦ កញ្ញាបានអះអាងថាការផ្គត់ផ្គង់អុកស៊ីសែនសម្រាប់ព្យាបាលអ្នកជំងឺCOVID-19 មានការខ្វះខាតខ្លាំងនៅតំបន់ដែលមានចំនួនអ្នកឆ្លងច្រើន ។ ចំណែក ឯក្រសួងសុខាភិបាលឥណ្ឌាវិញបានអះអាងថាចំនួនអ្នកឆ្លងCOVID-19 បានកើនឡើងលើស៥លានករណីហើយ។ នេះយោងតាម ទៅភ្នាក់ងារព័ត៌មាន AFP។
មន្ត្រីរដ្ឋាភិបាល ក៏ដូចជាអ្នកជំនាញសុខភាពឥណ្ឌាបាននិយាយថា ការឆ្លងយ៉ាងរហ័សនូវជំងឺCOVID-19 គឺបណ្តាលមកពីការបើកចរន្តសេដ្ឋកិច្ចឡើងវិញ ពិធីបុណ្យតាមតំបន់ ក៏ដូចជាការធុញទ្រាននឹងការបង្ខាំងឲ្យនៅផ្ទះ។ក្នុងអំឡុងពេលបិទប្រទេសដែលជាវិធានការទប់ស្កាត់ជំងឺឆ្លង សេដ្ឋកិច្ចឥណ្ឌាបានដាំក្បាលប្រមាណ២៤ភាគរយ ចន្លោះពីខែមេសា ដល់ខែមិថុនា។
ដោយសារតែការឆ្លងយ៉ាងឆាប់រហ័សនេះហើយ ទើបបណ្តាលឲ្យឥណ្ឌាជួបបញ្ហាខ្វះអុកស៊ីសែន។ យោងតាមលោកវេជ្ជបណ្ឌិតAmit Thadhani នៅមន្ទីរពេទ្យជាយទីក្រុង ម៉ុមបៃ ការខ្វះខាតអុកស៊ីសែនក្នុងតំបន់របស់លោកមានសភាពធ្ងន់ធ្ងរខ្លាំង។
លោកអះអាងថា បញ្ហាដែលយើងកំពុងមាន គឺមន្ទីរពេទ្យមិនបានទទួលអុកស៊ីសែនពីអ្នកផលិតឲ្យបានគ្រប់គ្រាន់ ដោយសារតែការផ្គត់ផ្គង់មានកម្រិត។ លោកបន្ថែមថា បើសិនជាយើងស្នើអុកស៊ីសែក ៥០ធុង គេបានយ៉ាងច្រើនពី៥ ទៅ៧ធុង ប៉ុណ្ណោះ។
ចំណែកមន្ត្រីក្នុងទីក្រុងម៉ុមបៃវិញ ក៏ទទួលស្គាល់ផងដែរពីកង្វះខាតអុកស៊ីសែន ដោយបានធ្វើសំណើទៅកាន់អាជ្ញាធររដ្ឋ។ មន្ត្រីរូបនេះ អះអាងថាត្រូវការអុកស៊ីសែនមានការកើនឡើងប៉ុន្មានថ្ងៃចុងក្រោយនេះ ដោយសារករណីឆ្លងមានការលើនឡើង។
នៅឥណ្ឌា បើទោះបីជាអាជ្ញាធរអាចធ្វើតេស្តមនុស្សជា១០លាន ក្នុងមួយថ្ងៃក៏ដោយក្តី អ្នកជំនាញជាច្រើននិយាយថាការធ្វើតេស្តនៅពុំទាន់គ្រប់គ្រាន់នៅឡើយទេ ដោយបន្ថែមថាចំនួនអ្នកឆ្លងពិតប្រាកដមានច្រើនជាងនេះ។ ក្នុងការស្ទង់មតិមួយកាលពីសប្តាហ៍មុន ក្រុមប្រឹក្សាវេជ្ជសាស្ត្រឥណ្ឌាបានសន្និដ្ឋានថា គេមានចំនួនអ្នកឆ្លងដល់ទៅ៦,៥ លាននាក់បាត់ទៅហើយកាលពីខែឧសភា។ ក្រុមប្រឹក្សាស្រាវជ្រាវវេជ្ជសាស្ត្រឥណ្ឌា ក៏បានអនុញ្ញាតឲ្យប្រជាជនគ្រប់រូបធ្វើតេស្ត ដោយពុំចាំបាច់មានលិខិតពីគ្រូពេទ្យឡើយ។
យោងតាមក្រសួងសុខាភិបាលឥណ្ឌា រដ្ឋMaharashtra ក្លាយជាតំបន់ដែលមានករណីឆ្លងខ្ពស់។ យោងតាមទិន្ន័យផ្លូវការ ចំនួនអ្នកឆ្លងមានដល់ទៅជាង១លាននាក់ ខណៈអ្នកស្លាប់មានចំនួនជាង៣ម៉ឺននាក់
អំឡុងពេលបិទប្រទេស ឥណ្ឌាត្រូវបានចាត់ទុកថា ជាប្រទេសទប់ទល់នឹងជំងឺឆ្លងបានយ៉ាងប្រសើរ ដោយមានចំនួនអ្នកឆ្លងតិចធៀបនឹងចំនួនប្រជាជន។
កាលពីថ្ងៃទី៧ ខែកញ្ញាកន្លងទៅ ឥណ្ឌាបានក្លាយជាប្រទេសដែលមានចំនួនអ្នកឆ្លង COVID-19 ច្រើនលំដាប់ទី២ តាមពីក្រោយអាមេរិក ហើយឈរពីលើប្រេស៊ីល។ឥណ្ឌាដែលមានប្រជាជន ១,៣ពាន់លាននាក់ ក៏ត្រូវបានព្រមានផងដែរថា អាចនឹងមានចំនួនអ្នកឆ្លងCOVID-19 លើសអាមេរិកនៅពេលខាងមុខ៕
© រក្សាសិទ្ធិដោយ thmeythmey.com
