សន្និបាតសភារបស់សហភាពអឺរ៉ុប នាពេលថ្មីៗនេះ បានសម្រេចជាផ្លូវការក្នុងការព្យួរងារជាម្ចាស់ពានរង្វាន់ Sakharov Prize ពីទីប្រឹក្សារដ្ឋមីយ៉ាន់ម៉ា និងជាប្រមុខបក្សកាន់អំណាចសម្ព័ន្ធជាតិដើម្បីប្រជាធិបតេយ្យលោកស្រីអ៊ុងសាន ស៊ូជី ពីសហគមន៍ម្ចាស់រង្វាន់ Sakharov Prize។ នេះបើ យោងតាមសេចក្តីប្រកាស ព័ត៌មានរបស់សភាអឺរ៉ុបចុះថ្ងៃទី១០ ខែកញ្ញា ឆ្នាំ២០២០កន្លងទៅ។

 

តាមរយៈសេចក្តីសម្រេចដដែលនោះ ការណ៍ដែល លោកស្រី អ៊ុងសាន ស៊ូជី ត្រូវបានព្យួរងារ និងមិនត្រូវរាប់បញ្ចូលរាល់គ្រប់កម្មវិធី និងសកម្មភាពទាំងអស់របស់សហគមន៍ម្ចាស់ពានរង្វាន់ Sakharov Prize ក៏ដោយសារតែលោកស្រី បានបរាជ័យក្នុងការអនុវត្តចំណាត់ការ និងដោះស្រាយបទឧក្រិដ្ឋប្រឆាំងនឹងសហគមន៍ជនជាតិភាគតិចរ៉ូហ៊ីងយ៉ានៅមីយ៉ាន់ម៉ា។ 

 

គួរជម្រាបបន្តិចថា សហគមន៍ ម្ចាស់ពានរង្វាន់ Sakharov Prize គឺជាក្រុមអ្នកនយោបាយនៅក្នុងសភាអឺរ៉ុប ដែលត្រូវបានបង្កើតឡើងនៅឆ្នាំ ១៩៨៨ ដើម្បីជាវេទិកាមួយផ្សារភ្ជាប់ សមាជិកសភាអឺរ៉ុប ជាមួយនឹងម្ចាស់ពានរង្វាន់ និងសង្គមស៊ីវិលក្នុងការគោលដៅបង្កើនកិច្ចសហប្រតិបត្តិការលើសកម្មភាពសិទ្ធិមនុស្ស។ វា ជាវេទិកាសម្រាប់សភា និងម្ចាស់ពានរង្វាន់ ដោះស្រាយការបំពាន និងបញ្ហាសិទ្ធិមនុស្សរួមគ្នា។

 

កន្លងមកសភាសហភាពអឺរ៉ុប បានផ្តល់ពានរង្វាន់ Sakharov Prize ទៅកាន់បុគ្គល ឬអង្គការទាំងឡាយណា ដែលបានចូលរួមទាមទារ និងការពារសិទ្ធិមនុស្ស និងសេរីភាពមូលដ្ឋាន។ លោកស្រី អ៊ុងសាន ស៊ូជី ត្រូវបានសភាអឺរ៉ុប ផ្តល់ពាននេះ នៅឆ្នាំ១៩៩០ នៅពេលលោកស្រី នៅជាមេដឹកបក្សប្រឆាំងមីយ៉ាន់ម៉ា ដែលពេលនោះ លោកស្រី គឺជាអ្នកតស៊ូមតិដើម្បីប្រជាធិបតេយ្យមីយ៉ាន់ម៉ាដ៏មុះមុតបំផុត។

 

គិតចាប់ពីវិបត្តិរ៉ូហ៊ីងយ៉ាផ្ទុះឡើងនៅចុងឆ្នាំ២០១៧មក លោកស្រី អ៊ុងសាន ស៊ូជី ដែលត្រូវបានស្គាល់ថាជាមេដឹកនាំកំពូលពីក្រោយនៃរដ្ឋាភិបាលស៊ីវិលបច្ចុប្បន្ន បានបាត់បង់កេរ្តិ៍ឈ្មោះក្នុងឆាកអន្តរជាតិដោយសារតែបញ្ហាសិទ្ធិមនុស្សដ៏ស្មុគស្មាញក្នុងប្រទេស។ លោកស្រី ត្រូវបានអង្គការសិទ្ធិមនុស្សមួយចំនួន បានដក និងបញ្ចប់សុពលភាពងារ ក៏ដូចជាពានរង្វាន់សិទ្ធិមនុស្ស ដែលធ្លាប់ផ្តល់ឲ្យលោកស្រី ជាបន្តបន្ទាប់៕