អាងហែលទឹកអូឡាំពិក ដែលចំណាយថវិកាជួសជុលជិត៣លានដុល្លារ នឹងសម្ពោធនៅចុងខែកញ្ញា

កីឡាជាតិ

ជាតិ

អាងហែលទឹកអូឡាំពិក ដែលចំណាយថវិកាជួសជុលជិត៣លានដុល្លារ នឹងសម្ពោធនៅចុងខែកញ្ញា

22, Sep 2020 , 7:59 am

រូបភាព

សកម្មភាពកីឡាករកីឡាការិនីហែលទឹកហ្វឹកហាត់នៅអាងហែលទឹកពហុកីឡដ្ឋានជាតិ, រូបភាពពីសហព័ន្ធខ្មែរកីឡាហែលទឹក

ដោយ:

អាងហែលទឹកពហុកីឡដ្ឋាន នឹងត្រូវបានសម្ពោធដាក់ឲ្យប្រើប្រាស់នៅថ្ងៃទី២៨ កញ្ញា ក្រោយបញ្ចប់ការជួសជុល និងស្តារឡើងវិញជាស្ថាពរកាលពីអំឡុងខែមេសា ឆ្នាំ២០២០ ។ សហព័ន្ធខ្មែរកីឡាហែលទឹក ក៏នឹងរៀបចំការប្រកួតជើងឯកថ្នាក់ជាតិ ដើម្បីតេស្តឧបករណ៍បច្ចេកទេសផ្សេងៗ មុនថ្ងៃសម្ពោធអាងហែលទឹកលំដាប់អន្តរជាតិនេះផងដែរ។

អគ្គលេខាធិការនៃសហព័ន្ធខ្មែរកីឡាហែលទឹក លោក ហែម គីរី បានបញ្ជាក់ថា អាងហែលទឹកនេះ នឹងក្លាយជាទីតាំងប្រកួតកីឡាហែលទឹកជ្រើសរើសជើងឯកថ្នាក់ជាតិប្រចាំឆ្នាំ២០២០ ដែលប្រព្រឹត្តទៅចន្លោះពីថ្ងៃទី២៦-២៨ ខែកញ្ញា ឆ្នាំ២០២០។ បើតាមលោក គីរី ការប្រកួតនេះ ក៏ជាការធ្វើតេស្តឧបករណ៍បច្ចេកទេសទើបបំពាក់ថ្មី និងបង្ហាញទស្សនិកជនពីលទ្ធភាពរបស់អាងហែលទឹក ក្នុងការរៀបចំការប្រកួតកម្រិតជាតិ និងអន្តរជាតិផងដែរ។

ក្នុងបទសម្ភាសជាមួយសារព័ត៌មានថ្មីៗតាមទូរសព្ទនៅថ្ងៃទី២១ ខែកញ្ញា លោក ហែម គីរី បានលើកឡើងដូច្នេះថា៖«គោលបំណងសំខាន់នៃការប្រកួតជើងឯកថ្នាក់ជាតិនេះ យើងអាចតេស្តលើសម្ភារបច្ចេកទេសផង និងដើម្បីបញ្ជាក់ថា វាអាចប្រើប្រាស់សម្រាប់រៀបចំការប្រកួតកម្រិតខ្ពស់ទាំងថ្នាក់ជាតិ និងអន្តរជាតិបានត្រឹមត្រូវផង»។

តាមពិតទៅ សហព័ន្ធគ្រោងសម្ពោធអាងហែលទឹកនេះ តាំងពីក្រោយបញ្ចប់ការជួលជុល និងស្តារឡើងវិញមកម្ល៉េះ ប៉ុន្តែត្រូវបានលើកពេលដោយសារការរាតត្បាតនៃជំងឺកូវីដ-១៩។

បើតាមលោក ហែម គីរី អគ្គលេខាធិការនៃសហព័ន្ធខ្មែរកីឡាហែលទឹក ពិធីសម្ពាធអាងហែលទឹកពហុកីឡដ្ឋានជាតិ នឹងប្រព្រឹត្តទៅចាប់ពីម៉ោង៣រសៀល ក្រោមវត្តមានរបស់សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ឆ្នាំ២០២៣។

អាងហែលទឹកនេះ ត្រូវបានបើកការដ្ឋានជួសជុល និងស្តារឡើងវិញនៅអំឡុងខែតុលា ឆ្នាំ២០១៨ ហើយបានបញ្ចប់ការជួសជុលជាស្ថាពរនៅអំឡុងខែមេសា ឆ្នាំ២០២០។ តាមគម្រោងលោក ស៊ុន ចាន់ថុល ប្រធានសហព័ន្ធខ្មែរកីឡាហែលទឹកបានវាយតម្លៃថា ការជួសជុលនឹងបញ្ចប់នៅដំណាច់ខែមិថុនាឆ្នាំ២០១៩។

ប៉ុន្តែការជួសជុល ត្រូវបានអូសបន្លាយពេលជិត១ឆ្នាំ ដោយសារ សហព័ន្ធ បានបន្ថែមឧបករណ៍បច្ចេកទេសមួយចំនួន ដើម្បីឲ្យអាងហែលទឹកនេះមានគុណភាពស្របតាមស្តង់ដាអន្តរជាតិ។ ការជួសជុលនេះ បានចំណាយថវិកាអស់ជិត៣លានដុល្លារ ដែលជាជំនួយរបស់ក្រុមហ៊ុនចិន។

អាងហែលទឹកពហុកីឡដ្ឋានជាតិ សាងសង់ឡើងចន្លោះពីឆ្នាំ១៩៦១-១៩៦៥ ជាស្នាដៃរបស់ស្ថាបត្យករ វណ្ណ ម៉ូលីវណ្ណ ក្រោមព្រះរាជតំរិះផ្តួចផ្តើមរបស់ព្រះបរមរតនកោដ្ឋ ព្រះបាទ នរោត្តម សីហនុ។ អាងហែលទឹកនេះ បានសម្ពោធដាក់ឲ្យប្រើប្រាស់នៅអំឡុងឆ្នាំ១៩៦៧៕