ជាតិ
×![]()
ភ្នំពេញ៖ នៅព្រឹកថ្ងៃទី២១ កញ្ញានេះ លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងលោក ហង់ ជួនណារ៉ុន រដ្ឋមន្ត្រីក្រសួងអប់រំ បានចុះពិនិត្យការបើកដំណើរការសាលារៀនឡើងវិញក្នុងដំណាក់កាលទី២ នៅវិទ្យាល័យបាក់ទូក។ ក្នុងពិធីចុះពិនិត្យដំណើរការឡើងវិញ លោក ហ៊ុន ម៉ានី និងលោក ហង់ ជួនណារ៉ុន បានវាយតម្លៃខ្ពស់ចំពោះការដំណើរការបើកសាលារៀនឡើងវិញ និងជំរុញឲ្យសិស្សានុសិស្សថ្នាក់ទី៩-១២ ខិតខំប្រឹងរៀនសូត្រ ដែលការប្រឡងនឹងចាប់ផ្ដើមនៅខែវិច្ឆិកា និងខែធ្នូខាងមុខ។ 
គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានបន្តតាមដាន និងចុះពិនិត្យការបើកដំណើរការសាលារៀនក្នុងដំណាក់កាលទី២ នៅវិទ្យាល័យបាក់ទូក ដើម្បីលើកទឹកចិត្ត គាំទ្រ និងផ្តល់យោបល់ ក្នុងការបំពេញការងារ និងដោះស្រាយនូវបញ្ហាទាំងឡាយ ដែលស្ថិតក្នុងសមត្ថកិច្ចរបស់គណៈកម្មការទី៧។
លោក ហ៊ុន ម៉ានី ប្រធានគណៈកម្មការទី៧ បញ្ជាក់ថា៖ «ការចុះពិនិត្យដំណើរការបើកសាលារៀនឡើងវិញក្នុងដំណាក់កាលទី២ នៅវិទ្យាល័យបាក់ទូកព្រឹកនេះ មិនត្រឹមតែ ដើម្បីចុះត្រួតពិនិត្យលើការរៀបចំឱ្យដំណើរការសាលាឡើងវិញតែប៉ុណ្ណោះទេ តែជាការឆ្លុះបញ្ចាំងពីការគាំទ្រទាំងស្មារតី និងកម្លាំង របស់គណៈកម្មការទី៧ ចំពោះក្រសួងអប់រំ ក្នុងកិច្ចខិតខំប្រឹងប្រែងអនុវត្តការងារកន្លងមក ជាពិសេសការរៀបចំត្រៀមខ្លួនបើកដំណើរការគ្រឹះស្ថានសិក្សាឡើងវិញ ស្របពេលដែលត្រូវបន្តការអនុវត្តវិធានការទប់ស្កាត់ការរីករាលដាលជំងឺកូវីដ១៩»។
ជាមួយគ្នានេះ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានវាយតម្លៃខ្ពស់ចំពោះការចូលរួមរបស់លោកគ្រូអ្នកគ្រូ សិស្សានុសិស្ស ដែលបានអនុវត្តវិធានការសុវត្ថិភាពអនាម័យ នៅពេលដំណើរការបើកសាលារៀនឡើងវិញ ក្នុងដំណាក់កាលទី២។
រដ្ឋមន្ត្រីក្រសួងអប់រំ លើកឡើងយ៉ាងដូច្នេះ៖ «ការបើកសាលាដំណាក់កាលទី២នេះ ធ្វើឲ្យសាលារដ្ឋ និងឯកជន រៀនសូត្រពីគ្នាទៅវិញទៅមក និងរៀបចំបរិស្ថានឲ្យបានល្អប្រសើរ។ ក្នុងដំណាក់កាលមួយជំនាន់ទៀត ក្រសួង នឹងបន្តពង្រឹងការគ្រប់គ្រងសុខភាព និងសុវត្ថិភាពនៅតាមគ្រឹះស្ថានសិក្សាទាំងអស់ រួមទាំងពង្រឹងការរៀនសូត្ររបស់សិស្សានុសិស្ស»។
សូមអញ្ជើញទស្សនាវីដេអូខាងក្រោម៖
ក្នុងនាមគណៈកម្មការទី៧ លោក ហ៊ុន ម៉ានី បានលើកទឹកចិត្តឱ្យគណៈគ្រប់គ្រងសាលា លោកគ្រូអ្នកគ្រូ អាណាព្យាបាល និងសិស្សានុសិស្សទាំងអស់ បន្តការយោគយល់ និងសហការយ៉ាងសកម្មជាមួយក្រសួងអប់រំ យុវជន និងកីឡា ដោយអនុវត្តនូវគោលការណ៍ប្រតិបត្តិស្តង់ដាររបស់ក្រសួង និងសេចក្តីណែនាំរបស់ក្រសួងសុខាភិបាល។
លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា
សូមបញ្ជាក់ថា បន្ទាប់ពីក្រសួងអប់រំ យុវជន និងកីឡា ប្រកាសឱ្យមានការបើកគ្រឹះស្ថានសិក្សាឡើងវិញក្នុងដំណាក់កាលទី២ គណៈកម្មការទី៧ បានបំពេញតួនាទីរបស់ខ្លួនក្នុងការពិនិត្យ តាមដាន ស្វែងយល់ពីបញ្ហាប្រឈមក្នុងការអនុវត្តការងាររបស់ក្រសួងអប់រំ យុវជន និងកីឡា តាមរយៈការជួបប្រជុំពិភាក្សាជាបន្តបន្ទាប់ជាមួយថា្នក់ដឹកនាំក្រសួង ការប្រជុំផ្តល់យោបល់ និងការចុះបេសកកម្មទៅតាមបណ្តាខេត្ត ដើម្បីស្វែងយល់បន្ថែមពីស្ថានភាពអប់រំក្នុងក្របខណ្ឌខេត្ត ជាពិសេសការអនុញ្ញាតឱ្យបើកសាលារៀនឡើងវិញនេះ៕
លោក ហ៊ុន ម៉ានី ប្រធានគណៈកម្មការទី៧
Tag:
ហង់ ជួនណារ៉ុន
ហ៊ុន ម៉ានី
ក្រសួងអប់រំ
© រក្សាសិទ្ធិដោយ thmeythmey.com
