ភ្នំពេញ៖ សម្ដេច ហ៊ុន សែន រំពឹងទុកមុនថា កិច្ចព្រមព្រៀងពាណិជ្ជកម្មសេរីកម្ពុជា-ចិន នឹងអាចទាញក្រុមហ៊ុនអាមេរិក មកវិនិយោគនៅកម្ពុជា។ សម្ដេច បង្ហាញក្តីរំពឹងបែបនេះ នៅក្នុងកិច្ចប្រជុំតាមប្រព័ន្ធវីដេអូ ជាមួយលោក អាឡិចសាន់ដឺ ហ្វែលម៉េន (Alexander Feldman) ប្រធានក្រុមប្រឹក្សាធុរកិច្ចអាមេរិក-អាស៊ាន នៅថ្ងៃទី២១ កញ្ញា។
កិច្ចព្រមព្រៀងពាណិជ្ជកម្មសេរីកម្ពុជា-ចិន គ្រោងនឹងចុះហត្ថលេខា នាពេលឆាប់ៗខាងមុខនេះ។ មុនកិច្ចព្រមព្រៀងនេះ លេចចេញជារូបរាង នាយករដ្ដមន្ត្រី ហ៊ុន សែន រំពឹងខ្ពស់ទុកមុន ពីការទទួលបានផលប្រយោជន៍ សម្រាប់ភាគីទាំងសងខាង។ សម្ដេច ហ៊ុន សែន មានទស្សនវិស័យថា ក្រុមហ៊ុនអាមេរិក នឹងមើលឃើញការបោះទុនរកស៊ីនៅកម្ពុជា ក្រោយកិច្ចព្រមព្រៀងចូលជាធរមាន។
ថ្លែងប្រាប់លោកលោក អាឡិចសាន់ដឺ ហ្វែលម៉េន (Alexander Feldman) ប្រធានក្រុមប្រឹក្សាធុរកិច្ចអាមេរិក-អាស៊ាន តាមប្រព័ន្ធវីដេអូ ប្រមុខរដ្ឋាភិបាលកម្ពុជា បាននិយាយដូច្នេះ៖«ខ្ញុំសង្ឃឹមថា ច្បាប់និងកិច្ចព្រមព្រៀងពាណិជ្ជកម្មសេរីកម្ពុជា-ចិន នឹងដើរតួជាកត្តាដ៏សំខាន់មួយ ជួយធ្វើឱ្យកម្ពុជាក្លាយជាគោលដៅសម្រាប់ក្រុមហ៊ុនអាមេរិក ដែលកំពុងរកទីតាំងផលិតកម្មថ្មី នៅតំបន់អាស៊ីអាគ្នេយ៍»។
សម្ដេច ហ៊ុន សែន ក៏បានអះអាងប្រាប់លោក អាឡិចសាន់ដឺ ថា រដ្ឋាភិបាល បានដាក់ចេញវិធានការកែទម្រង់ជាបន្តបន្ទាប់ សម្រាប់ដោះស្រាយបញ្ហាប្រឈម ដែលវិនិយោគិន និងធុរកិច្ចជន កំពុងជួបប្រទះ ក្នុងគោលបំណងបង្កើនភាពប្រកួតប្រជែងរបស់កម្ពុជា តាមរយៈការបង្កភាពងាយស្រួលនិងការបង្កើតបរិយាកាសអំណោយផល ដល់ការធ្វើអាជីវកម្ម និងវិនិយោគនៅកម្ពុជា។
«ជាទិសដៅទៅមុខកម្ពុជា នឹងដាក់ឲ្យអនុវត្តនូវវិធានការអន្តរាគមន៍សមស្រប និងទាន់ពេល គួបផ្សំនិងការគិតគូរជាយុទ្ធសាស្ត្រ តាមរយៈការដាក់ចេញនូវគោលនយោបាយហិរញ្ញវត្ថុសាធារណៈ គោលនយោបាយរូបិយវត្ថុ និងវិធានការកែទម្រង់រចនាសម្ព័ន្ធ សំដៅសម្រេចឲ្យបាននូវគោលបំណងជាអាទិភាពចំនួន២ គឺទី១ ការរក្សាលំនឹងសេដ្ឋកិច្ច និងសង្គម និងទី២ ការជំរុញកំណើនសេដ្ឋកិច្ចឡើងវិញ»។ នេះជាការលើកឡើងរបស់សម្ដេច ហ៊ុន សែន។
បើតាមនាយករដ្ឋមន្ត្រី ទោះបីកម្ពុជារងវិបត្តិកូវីដ-១៩ក៏ដោយ ក៏រដ្ឋាភិបាលកម្ពុជានៅបន្តកែទម្រង់ច្បាប់វិនិយោគ និងប្រព័ន្ធលើកទឹកចិត្តថ្មី សម្រាប់ទាក់ទាញការវិនិយោគដែរ។ ការកែទម្រង់ច្បាប់វិនិយោគនេះ គឺផ្ដោតសំខាន់សម្រាប់ឧស្សាហកម្មអេឡិចត្រូនិក, បង្គុំ, កសិ-ឧស្សាហកម្ម និងគ្រឿងបន្លាស់ជាដើម។
នៅក្នុងរយៈពេល៨ខែ ឆ្នាំ២០២០ នៃវិបត្តិកូវីដ-១៩នេះ កំណើនទំហំពាណិជ្ជកម្មរវាងប្រទេសទាំងពីរ មានការកើនឡើង១៧ភាគរយ ប្រើធៀបនឹងរយៈពេលដូចគ្នានៃឆ្នាំកន្លងទៅ។ នេះជាការបញ្ជាក់របស់សម្ដេច ហ៊ុន សែន។
ស្ថានទូតអាមេរិកប្រចាំកម្ពុជា បានបញ្ជាក់ដែរថា អាមេរិកជាទីផ្សារនាំចេញធំជាងគេមួយរបស់កម្ពុជា ដោយក្នុងឆ្នាំ២០១៩កម្ពុជាបាននាំចេញក្នុងទឹកប្រាក់ជិត៥.៤ពាន់លានដុល្លារ។ ទំនិញដែលនាំចេញភាគច្រើន គឺទំនិញសម្រាប់ធ្វើដំណើរ ដូចជាកាបូបដៃនិងកាបូបស្ពាយជាដើម៕