របាយការណ៍ស្រាវជ្រាវមួយរបស់អង្គការ Oxfam ចេញថ្ងៃទី២១ ខែកញ្ញា បង្ហាញថា ប្រជាជនមានបំផុតមួយភាគរយរបស់ពិភពលោក បញ្ចេញឧស្ម័នពុលពីរដងច្រើនជាងប្រជាជនក្រីក្របំផុត៥០ភាគរយ។ របាយការណ៍នេះ ពិនិត្យលើទិន្ន័យពីឆ្នាំ១៩៩០ ដល់ឆ្នាំ ២០១៥ ដែលក្នុងពេលនេះការបញ្ចេញឧស្ម័នកាបូនិក បានកើនឡើង៦០ភាគរយ។
អង្គការមនុស្សធម៌ Oxfam និងវិទ្យាស្ថានបរិស្ថានស្តុកខុល កត់សម្គាល់ថា ប្រជាជនអ្នកមានបំផុត ៦៣លាននាក់ ឬ១ភាគរយ បញ្ចេញឧស្ម័នពុលច្រើនជាង២ដង ធៀបនឹងប្រជាជនក្រីក្រ៣,១ពាន់លាននាក់ ឬ៥០ភាគរយ។ របាយការណ៍នេះ បញ្ជាក់ផងដែរថា ការបញ្ចេញឧស្ម័នពុលពីសំណាក់អ្នកមានបំផុត១ភាគរយនោះ មានការកើនឡើង៣ដងច្រើនជាងអ្នកក្រីក្រ៥០ភាគរយផងដែរ។
ស្របពេលជាមួយគ្នានេះដែរ របាយការណ៍ដដែលបន្តថា ប្រជាជនដែលជាជាប់អ្នកមាន១០ភាគរយ ដែលមានចំនួន៦៣០លាននាក់ ជាអ្នកបញ្ចេញឧស្ម័នពុលប្រមាណ៥២ភាគរយទៅក្នុងបរិយាកាសក្នុងរយៈពេល២៥ឆ្នាំចុងក្រោយ។ ការសិក្សារបស់ Oxfam កំណត់ថា អ្នកមានបំផុត១ភាគរយ សំដៅទៅលើអ្នកដែលរកចំណូលបានច្រើនជាង១សែនដុល្លារក្នុងមួយឆ្នាំ ចំណែកឯអ្នកមាន១០ភាគរយ សំដៅលើអ្នករកប្រាក់ចំណូលបាន៣ម៉ឺន៥ពាន់ដុល្លារក្នុងមួយឆ្នាំ។
បើតាមទីភ្នាក់ងារព័ត៌មាន AFP លោក Tim Gore ប្រធានផ្នែកស្រាវជ្រាវ និងគោលនយោបាយរបស់ Oxfam បានសង្កត់ធ្ងន់ថា៖ «ការបញ្ចេញឧស្ម័នពុលយ៉ាងច្រើននៅប្រទេសអ្នកមាន ដែលធ្វើឲ្យពិភពលោកប្រឈមនឹងគ្រោះមហន្តរាយធម្មជាតិ បណ្តាលមកពីការប្រើប្រាស់ផូស៊ីលឥន្ធនៈ នៅតែមិនអាចធ្វើឲ្យជីវិតមនុស្សរាប់ពាន់លាននាក់ប្រសើរជាងមុនឡើយ»។
លោកបន្ថែមថា មូលនិធិកាបូនពិភពលោក(Global Carbon Budget) ត្រូវបានប្រើប្រាស់ដោយមិនសមស្របពីសំណាក់ប្រទេសអ្នកមាន ហើយមិនធ្វើឲ្យការរស់នៅមនុស្សជាតិប្រសើរជាងមុន។ មូលនិធិកាបូនពិភពលោកនេះ សំដៅទៅលើបរិមាណកាបូនក្នុងចំនួនកំណត់ណាមួយដែលគេអាចបញ្ចេញទៅក្នុងបរិយាកាស ដើម្បីបញ្ចៀសផលប៉ះពាល់អាកាសធាតុដ៏អាក្រក់បំផុត។
ការបញ្ចេឧស្ម័នកាបូនិកទៅក្នុងបរិយាកាស បណ្តាលឲ្យកើនឡើងកម្តៅបរិយាកាសនៅប៉ុន្មានទសវត្សរ៍ចុងក្រោយ។ ការកើនឡើងកម្តៅច្រើនជាង១,៥អង្សា នឹងបណ្តាលឲ្យប៉ះពាល់ពេញទំហឹងលើប្រព័ន្ធបរិស្ថាន។ បើសិនការបញ្ចេញឧស្ម័នកាបូនិកនៅតែមិនត្រូវបានដោះស្រាយ ក្នុងរយៈពេល១០ឆ្នាំទៅមុខប្រជាជនអ្នកមាន១០ភាគរយ នឹងបញ្ចេញឧស្ម័នកាបូនិកកាន់ច្រើន ដែលនឹងធ្វើឲ្យកម្តៅផែនដីកើនឡើងលើស១,៥អង្សា។
ការបញ្ចេញឧស្ម័នពុល នៅបណ្តាប្រទេសអ្នកមាន ត្រូវបានលោក Gore អះអាងថា បណ្តាលមកពីការធ្វើដំណើរដូចជាការប្រើប្រាស់រថយន្តប្រភេទSUV ដែលបញ្ចេញឧស្ម័នច្រើន និងការជិះយន្តហោះញឹកញាប់។ ត្រង់ចំណុចនេះ អង្គការ Oxfam ចង់ឲ្យប្រទេសទាំងនោះ យកពន្ធបន្ថែមលើការធ្វើដំណើរប្រណិតដូចជាការហោះហើរញឹកញាប់ ដើម្បីយកលុយទៅវិនិយោគក្នុងវិស័យដែលបញ្ចេញឧស្ម័នតិច និងធ្វើឲ្យជីវភាពអ្នកក្រីក្រប្រសើរឡើង។
លោក Gore អះអាងបន្តថា រដ្ឋាភិបាលត្រូវដាក់ការប្រយុទ្ធប្រឆាំងទៅនឹងអាកាសធាតុ និងបញ្ហាវិសមភាពជាចំណុចស្នូលនៃផែនការស្រោចស្រង់សេដ្ឋកិច្ចក្រោយ COVID-19 ផងដែរ៕