COVID-19
កីឡាអន្តរជាតិ
អន្តរជាតិ
COVID-19៖ ប្រេស៊ីល នឹងអនុញ្ញាតឲ្យអ្នកគាំទ្រខ្លះចូលកីឡដ្ឋានបាល់ទាត់វិញ
× ប្រេស៊ីល នឹងអនុញ្ញាតឲ្យអ្នកគាំទ្រកីឡាបាល់ទាត់វិលត្រឡប់ចូលទស្សនាក្នុងកីឡដ្ឋានវិញក្នុងឆាប់ៗនេះ។ នេះបើតាមការបញ្ជាក់របស់ក្រសួងសុខាភិបាលប្រេស៊ីល នៅថ្ងៃទី២២ ខែកញ្ញា ដោយសង្កត់ធ្ងន់ថាអ្នកគាំទ្រត្រូវមានចំនួនត្រឹម៣០ភាគរយប៉ុណ្ណោះ ដើម្បីបង្ការការឆ្លង COVID-19។
ក្រសួងសុខាភិបាលប្រេស៊ីលបានចេញសេចក្តីប្រកាសខ្លីថា រឿងដែលសំខាន់បំផុតដំបូងគឺត្រូវឲ្យមានអ្នកគាំទ្រត្រឹម ៣០ ភាគរយនៃចំនួនកៅអីសរុបក្នុងកីឡដ្ឋានប៉ុណ្ណោះ ប៉ុន្តែបើស្ថានភាពល្អប្រសើរជាងនេះ នឹងបន្ថែមលើសនេះទៀតប្រសិនបើចាំបាច់។ ដូច្នេះមានន័យថា ប្រេស៊ីលនឹងអនុញ្ញាតឲ្យមានចំនួនអ្នកគាំទ្រប្រមាណ២៥០០០ នាក់នៅក្នុងកីឡាដ្ឋាន Maracana ក្នុងក្រុង Rio de Janeiro ប៉ុណ្ណោះ។
បើតាមការផ្សាយរបស់ទីភ្នាក់ងារព័ត៌មាន Reuters ការសម្រេចចិត្តបែបនេះ កើតឡើងបន្ទាប់ពីសហព័ន្ធកីឡាបាល់ទាត់ប្រេស៊ីល (BFC) បានស្នើសុំមន្ត្រីសុខាភិបាលសម្រេចលើសំណើរបស់ពួកគេដើម្បីធ្វើឲ្យអ្នកគាំទ្រវិលត្រឡប់ទៅកាន់ទីលានដែលបានបិទអស់រយៈពេល៦ខែមកហើយនោះ។ កម្មវិធីប្រកួតបាល់ទាត់ស្ទើពេញពិភពលោកបានផ្អាកតាំងពីខែមីនា ស្របពេលការរីករាលដាលជំងឺ COVID-19 កំពុងកើនឡើងខ្លាំង។
យ៉ាងណាក៏ដោយ បើទោះមានការអនុញ្ញាតដូច្នេះក្តី តែទីក្រុងខ្លះដូចជា Belo Horizonte បាន បដិសេធការវិលត្រឡប់របស់អ្នកគាំទ្រនេះ ដ្បិតមានចំនួនអ្នកឆ្លងជំងឺរាតត្បាតសកលនេះច្រើននៅឡើយ។
មកទល់ពេលនេះ ប្រេស៊ីលមានចំនួនអ្នកស្លាប់ដោយសារ COVID-19 ជាង១៣សែននាក់ ស្របពេលប្រទេសស្ថិតក្នុងតំបន់អាមេរិកឡាទីនមួយនេះ រងផលប៉ះពាល់ធ្ងន់ជាងគេលំដាប់ទី២ពិភពលោក បន្ទាប់ពីអាមេរិក៕
© រក្សាសិទ្ធិដោយ thmeythmey.com