COVID-19
អន្តរជាតិ
លោកម៉ាក្រុង ៖ ពិភពលោកមិនគួរបណ្ដោយខ្លួនឲ្យរួបរឹតដោយជម្លោះចិន-អាមេរិកឡើយ
ប្រធានាធិបតីបារ៉ាង អេម៉ានុយអែល ម៉ាក្រុង ថ្លែងសារក្នុងវីដេអូទៅកាន់មហាសន្និបាតអង្គការសហប្រជាជាតិ។
×![]()
ការប្រកួតប្រជែងរវាងអាមេរិក និងចិន ស្ទើរក្លាយជារឿងរបស់ពិភពលោកទៅហើយ។ ប៉ុន្តែប្រធានាធិបតីបារាំង អេម៉ានុយអែល ម៉ាក្រុង បាននិយាយថា ពិភពលោក មិនគួរបណ្ដោយឲ្យបញ្ហានេះគ្របដណ្តប់លើបញ្ហាឯទៀតឡើយ។ ពីមហាសន្និបាតអង្គការសហប្រជាជាតិនៅថ្ងៃទី២២ ខែកញ្ញា លោក ម៉ាក្រុង ក៏លើកឡើងដែរថា ជំងឺឆ្លង COVID-19 ជាការដាស់តឿនដល់អង្គការសហប្រជាជាតិ ដែលតម្រូវឲ្យមានកិច្ចសហប្រតិបត្តិការខ្លាំងក្លាជាងមុន ។
ថ្លែងតាមរយៈវីដេអូថតទុកជាមុន ប្រធានាធិបតីបារាំង អេម៉ានុយអែល ម៉ាក្រុង បានលើកឡើងពីការប្រជែងរវាងមហាអំណាចអាមេរិក និងចិន ខណៈអង្គការសហប្រជាជាតិឈានដល់អាយុ៧៥ឆ្នាំ។ ក្នុងន័យរិះគន់មហាអំណាចទាំងពីរ លោក ម៉ាក្រុង និយាយថា ពិភពលោក មិនគួរវិលវល់នឹងរឿងប្រកួតប្រជែងនេះទេ។
«ពិភពលោកសព្វថ្ងៃ មិនអាចបង្រួមមកត្រឹមការប្រជែងគ្នារវាងអាមេរិក និងចិនឡើយ បើទោះបីជាប្រទេសទាំងពីរ ជាមហាអំណាចក៏ដោយ»។ ប្រធានាធិបតីបារាំងបញ្ជាក់បែបនេះ ដោយបន្តទៀតថាប្រទេសទាំងអស់មិនគួរនៅស្ងៀមមើលការប្រឈមមុខគ្នារវាងមហាអំណាចទាំង២នេះទេ ព្រោះពួកគេជាទស្សនិកជនដែលពុំមានអំណាចអ្វីទាំងអស់។
ប្រមុខរដ្ឋបារាំង បានអំពាវនាវឲ្យបណ្តាប្រទេសទាំងអស់រួបរួមសហប្រតិបត្តិការបង្កើតកុងសង់ស៊ីសថ្មីសម្រាប់យុគសម័យទំនើបក្នុងដោះស្រាយបញ្ហាប្រឈមរបស់ពិភពលោក។ នេះបើតាមសុន្ទរកថារបស់លោក ម៉ាក្រុង ។
ឆ្លៀតពេលនេះ លោក ម៉ាក្រុង និយាយដល់ការដកខ្លួនរបស់អាមេរិកចេញពីឆាកអន្តរជាតិ ដែលការណ៍នេះ ជំរុញឲ្យអឺរ៉ុបបង្កើតយុទ្ធសាស្ត្រការពាររួម ក៏ដូចជាកាត់បន្ថយការពឹងពាក់ពីក្រុមហ៊ុនចិន និងអាមេរិកលើវិស័យបច្ចេកវិទ្យា។ ត្រង់ចំណុចនេះ លោកអះអាងថា ការពឹងពាក់ផ្តាច់មុខលើមហាអំណាច លើបច្ចេកវិទ្យា ចំណីអាហារ ឬឧស្សាហកម្ម នឹងបង្កើតភាពងាយរងគ្រោះ និងមិនឲ្យមានស្ថិរភាពពិភពលោកឡើយ។
មិនត្រឹមរឿងអាមេរិក-ចិនឡើយ ប្រធានាធិបតីបារាំង ក៏លើកឡើងពីចំណុចខ្សោយរបស់អង្គការសហប្រជាជាតិដែរ និងអង្គការកំពូលអន្តរជាតិមួយនេះ អាចនឹងគ្មានអំណាច។ លោកបានលើកឧទាហរណ៍ពីក្រុមប្រឹក្សាសន្តិសុខ ដែលសឹងតែមិនអាចជួបប្រជុំគ្នាបានអំឡុងពេល COVID-19 និងការណ៍ដែលសមាជិកអចិន្ត្រៃយជ្រើសយកការប្រជែងគ្នាជាជាងការដោះស្រាយបញ្ហានោះ។ ចេញអង្គការសហប្រជាជាតិ លោក ម៉ាក្រុង ក៏លើកយកសំណុំរឿងអង្គការសុខភាពពិភពលោកដែរ។
លោក ម៉ាក្រុង បានកត់សម្គាល់ថា អង្គការអន្តរជាតិដែលពិភពលោកត្រូវការជាចាំបាច់ ដូចជាអង្គការសុខភាពពិភពលោក ត្រូវបានគេចោទប្រកាន់ និងប្រើប្រាស់ជាឧបករណ៍ដើម្បីយកផលប្រយោជន៍។
លោកបាននិយាយដាស់តឿនថា វិបត្តិ COVID-19 ការថមថយក្របខណ្ឌសហប្រតិបត្តិការសកល និងភាពទន់ខ្សោយរបស់អង្គការសហប្រជាជាតិ តម្រូវឲ្យមានការបង្កើតសណ្តាប់ធ្នាប់ថ្មី៕
Tag:
បារាំង
មហាសន្និបាតអង្គការសហប្រជាជាតិ
© រក្សាសិទ្ធិដោយ thmeythmey.com
