អ្នកគាំទ្របាល់ទាត់ខ្មែរ អាចទស្សនាការប្រកួតបាន ប៉ុន្តែត្រឹម១០ភាគរយនៃកៅអីសរុបនៅកីឡដ្ឋានប៉ុណ្ណោះ

កីឡាជាតិ

ជាតិ

អ្នកគាំទ្របាល់ទាត់ខ្មែរ អាចទស្សនាការប្រកួតបាន ប៉ុន្តែត្រឹម១០ភាគរយនៃកៅអីសរុបនៅកីឡដ្ឋានប៉ុណ្ណោះ

24, Sep 2020 , 9:59 pm

រូបភាព

កីឡដ្ឋានខេត្តសៀមរាប ដែលសូលទីឡូអង្គរ ប្រើប្រាស់ជាទឹកដីរបស់ខ្លួន។ រូបថត FFC

ដោយ:

ក្រសួងសុខាភិបាល អនុញ្ញាតឲ្យអ្នកគាំទ្រចូលទស្សនាការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន និងក្របខណ្ឌមិត្តហ្វូនខេមបូឌានលីគឡើងវិញ។ ប៉ុន្តែក្រសួង តម្រូវឲ្យក្លិបទាំងអស់បន្តរក្សាអនាម័យ និងអនុវត្តតាមវិធានការការពារ និងទប់ស្កាត់ការឆ្លងជំងឺកូវីដ-១៩ ឲ្យបានខ្ជាប់ខ្ជួន។ ក្រសួង នឹងមិនអនុញ្ញាតឲ្យមានអ្នកគាំទ្រចូលទស្សនាឡើយ បើក្លិបណាមិនអនុវត្តតាមវិធានការរបស់ខ្លួន។

ក្រោយប្រកួតបិទទ្វារ មិនឲ្យមានទស្សនិកជនចូលទស្សនាផ្ទាល់ជិត៤ខែ ដោយសារបារម្ភពីការឆ្លងរីករាលដាលនៃជំងឺកូវីដ-១៩ ក្រសួងសុខាភិបាលនៅថ្ងៃទី២៣ ខែកញ្ញា ឆ្នាំ២០២០ បានចេញសេចក្តីប្រកាសព័ត៌មានមួយ ដោយអនុញ្ញាតឲ្យអ្នកគាំទ្រអាចចូលទស្សនាការប្រកួតបាល់ទាត់ពានរង្វាន់សម្តេច ហ៊ុន សែន និងលីគកំពូលឡើងវិញ។ ប៉ុន្តែក្រសួងអនុញ្ញាតឲ្យមានអ្នកគាំទ្រតែ១០ភាគរយប៉ុណ្ណោះក្នុងចំណោមកៅអីសរុបនៃកីឡដ្ឋាននីមួយៗ ខណៈអ្នកចូលទស្សនាត្រូវចុះឈ្មោះតាមប្រព័ន្ធអនឡាញដោយបញ្ជាក់លេខកៅអីច្បាស់លាស់ និងភ្ជាប់ជាមួយអាស័យដ្ឋាន និងលេខទូរសព្ទ។

ទោះបីអនុញ្ញាតឲ្យអ្នកគាំទ្រចូលទស្សនាក៏ពិតមែន ក្រសួងតម្រូវឲ្យក្លិបទាំងអស់ ត្រូវប្រកាន់ភ្ជាប់នូវគោលការណ៍សុវត្ថិភាពតាមរយៈការរក្សាអនាម័យ និងអនុវត្តតាមវិធានការរបស់ខ្លួនឲ្យបានខ្ជាប់ខ្ជួន ដើម្បីការពារនិងទប់ស្កាត់ការឆ្លងរីករាលដាលនៃជំងឺកូវីដ-១៩។ វិធានការទាំងនោះរួមមាន ក្លិបទាំងអស់ត្រូវមានមាស៊ីនវាស់កម្តៅ កាល់កុល ឬជែលលាងដៃតាមច្រកចេញចូលកីឡដ្ឋាន ត្រូវមានបង្គន់អនាម័យគ្រប់គ្រាន់ អ្នកគាំទ្រត្រូវពាក់ម៉ាស់ មិនត្រូវអនុញ្ញាតឲ្យអ្នកគាំទ្រមានជំងឺផ្តាសាយចូលទស្សនា និងបាញ់ថ្នាំសម្លាប់មេរោគតាមចូលកីឡដ្ឋាន។

ក្រសួងសង្កត់ធ្ងន់ថា បើក្លិបណាមិនអនុវត្តតាមវិធានការខាងលើ នោះក្រសួងមិនអនុញ្ញាតឲ្យការប្រកួតនោះមានអ្នកគាំទ្រចូលទស្សនាឡើយ។ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ នឹងផ្អាកមិនឲ្យមានទស្សនិកជនចូលទស្សនាបណ្តោះអាសន្ន ក្នុងករណីរកឃើញទស្សនិកជនណាម្នាក់មានផ្ទុកជំងឺកូវីដ-១៩ ជាយថាហេតុ។

ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន និងក្របខណ្ឌមិត្តហ្វូនខេមបូឌានលីគប្រចាំឆ្នាំ២០២០ ត្រូវបានផ្អាកការប្រកួតជាបណ្តោះអាសន្នកាលពីថ្ងៃទី១៩ ខែមីនា ឆ្នាំ២០២០ ដោយសារបារម្ភពីការឆ្លងរីករាលនៃជំងឺកូវីដ-១៩។ ក្រោយមកនៅថ្ងៃទី២៩ ខែឧសភា ក្រសួងអប់រំយុវជននិងកីឡា បានចេញសេចក្តីប្រកាសព័ត៌មានមួយ ដោយអនុញ្ញាតឲ្យរៀបចំការប្រកួតគ្រប់ប្រភេទកីឡា រួមទាំងបាល់ទាត់ឡើងវិញ។ ប៉ុន្តែការប្រកួតទាំងនោះ មិនតម្រូវឲ្យមានអ្នកគាំទ្រចូលទស្សនាឡើយ៕