ជាតិ
សង្គមជាតិ
ការងាររុះរើសំណង់លើគម្រោងផ្លូវ៣៨ខ្សែត្រូវបានពន្យារពេលដល់ថ្ងៃទី៧ តុលា
រូបភាព៖ រដ្ឋបាលខេត្តសៀមរាប
×![]()
សៀមរាប៖ សកម្មភាពរុះរើសំណង់ ដែលស្ថិតនៅតាមបណ្ដោយផ្លូវក្នុងគម្រោងសាងសង់ហេដ្ឋារចនាសម្ព័ន្ធ៣៨ខ្សែក្នុងក្រុងសៀមរាប បាននិងកំពុងអនុវត្តន៍យ៉ាងមមាញឹក។ ប្រជាពលរដ្ឋមួយចំនួនបានស្ម័គ្រចិត្តរុះរើសំណង់ទាំងនោះ ដើម្បីបង្ហាញពីការចូលរួមគាំទ្រក្នុងការអភិវឌ្ឍក្រុងទេសចរណ៍មួយនេះ។ យ៉ាងណា ប្រជាពលរដ្ឋមួយចំនួនដែលរងផលប៉ះពាល់ ក៏មិនទាន់មានអនុវត្តន៍ដែរ ដោយសារសំណង់ខ្លះជាសំណង់ថ្មី និងប៉ះពាល់ច្រើន។ នេះជារឿងដែលពិបាកមួយ ដែលរដ្ឋបាលខេត្តសៀមរាបកំពុងព្យាយាមដោះស្រាយ និងរំពឹងថាអាចប្រព្រឹត្តិទៅដោយរលូន។
រដ្ឋបាលខេត្តសៀមរាប សម្រេចពន្យារពេលថ្ងៃផុតកំណត់នៃការរុះរើសំណង់ដែលប៉ះពាល់ក្នុងគម្រោងស្ថាបនាផ្លូវ៣៨ខ្សែ ដែលកន្លងមក ខ្លួនបានប្រកាសយកត្រឹមថ្ងៃទី២ តុលានេះ។ អភិបាលខេត្តសៀមរាប លោក ទៀ សីហា បញ្ជាក់ថា ការពន្យារពេលនេះនឹងធ្វើរហូតដល់ថ្ងៃទី៧ តុលា ទៅតាមកាលកំណត់របស់គណៈកម្មការអន្ដរក្រសួង។ លោកបន្ថែមថា ក្រោយរុះរើចប់សព្វគ្រប់ នឹងមានក្រុមការងារបច្ចេកទេសដើម្បីចុះសិក្សា និងចាប់ផ្តើមធ្វើផ្លូវតែម្ដង។
អភិបាលខេត្តសៀមរាបទទួលស្គាល់ថា កិច្ចការរុះរើសំណង់នេះមានភាពស្មុគស្មាញខ្លះ ព្រោះទីតាំងមួយចំនួនបានប៉ះពាល់សំណង់ធំៗ ដូចជាផ្ទះ និងផ្ទះល្វែងជាដើម។ យ៉ាងណាក៏ដោយ លោក ទៀ សីហា បានសម្ដែងអារម្មណ៍រីករាយពេលឃើញប្រជាពលរដ្ឋមួយចំនួន ស្ម័គ្ររុះរើសំណង់ដោយខ្លួនឯង ដោយបង្ហាញពីឆន្ទៈគិតប្រយោជន៍រួមជាធំ និងចង់បានក្រុងសៀមរាបមានសោភ័ណស្អាត។ ក្នុងនាមជាអភិបាល លោក ទៀ សីហា លើទឹកចិត្តឱ្យប្រជាពលរដ្ឋទាំងអស់ បន្តសហការជាមួយអាជ្ញាធរ ដើម្បីឱ្យគម្រោងស្ថាបនាផ្លូវ៣៨ខ្សែ ប្រព្រឹត្តិទៅតាមការគ្រោងទុក។
គួរបញ្ជាក់ថា នៅដើមខែតុលា រាជរដ្ឋាភិបាលកម្ពុជាបានសម្រេចអនុម័តនូវកញ្ចប់ថវិកាចំនួន ១៥០លានដុល្លារ ដើម្បីសាងសង់ហេដ្ឋារចនាសម្ព័ន្ធផ្លូវថ្នល់នៅក្រុងសៀមរាប ដែលគម្រោងនេះគ្រោងនឹងបញ្ចប់នៅចុងឆ្នាំ២០២១៕
Tag:
ផ្លូវ៣៨ខ្សែ
ហេដ្ឋារចនាសម្ព័ន្ធ
© រក្សាសិទ្ធិដោយ thmeythmey.com
