ជាតិ
សង្គមជាតិ
រដ្ឋមន្ត្រីអប់រំ និពន្ធសៀវភៅកំណាព្យ «អារ្យធម៌ខ្មែរ» ដើម្បីអបអរទិវាគ្រូបង្រៀន និងបណ្ដុះគំនិតជាតិ
× ភ្នំពេញ៖ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បាននិពន្ធសៀវភៅកំណាព្យមួយ ដែលមានចំណងជើងថា «អារ្យធម៌ខ្មែរ» សម្រាប់អបអរទិវាគ្រូបង្រៀន នៅថ្ងៃទី៥ ខែតុលា ឆ្នាំ២០២០នេះ។ សៀវភៅកំណាព្យនេះនឹងចេញផ្សាយ និងបោះពុម្ពចែកជូនដល់គ្រូបង្រៀន នាថ្ងៃទិវាគ្រូបង្រៀន។
សូមតាមដានទស្សនាបទសម្ភាសរវាងកញ្ញា សៅ សុខអេង នៃសារព័ត៌មាននៅថ្មីៗ ជាមួយនឹងលោក ហង់ជួន ណារ៉ុន រដ្ឋមន្ត្រីក្រសួងអប់រំ ដូចតទៅ៖
សៀវភៅកំណាព្យ «អារ្យធម៌ខ្មែរ» សម្រាប់អបអរទិវាគ្រូបង្រៀននៅឆ្នាំនេះ ជាស្នាដៃនិពន្ធលើកទី២របស់លោករដ្ឋមន្ត្រីក្រសួងអប់រំ។ ទិវាគ្រូបង្រៀននៅឆ្នាំមុន លោកក៏បាននិពន្ធសៀវភៅកំណាព្យដែរ ក្រោមចំណងជើងថា «កំណាព្យអប់រំ»។
លោក ហង់ជួន ណារ៉ុន បានបញ្ជាក់ថា ការបង្កើតសៀវភៅកំណាព្យ «អារ្យធម៌ខ្មែរ» សម្រាប់អបអរទិវាគ្រូបង្រៀនឆ្នាំនេះគឺលោកចង់លើកកម្ពស់អារ្យធម៌ វប្បធម៌ និងអក្សរសិល្ប៍ខ្មែរ ដល់មនុស្សជំនាន់ក្រោយ ឲ្យបានយល់ដឹងកាន់តែទូលំទូលាយ។
លោករដ្ឋមន្ត្រី មានប្រសាសន៍ថា៖«ទាក់ទងនឹងភាសាខ្មែរបុរាណ ពលរដ្ឋខ្មែរយើងអត់សូវបានដឹង ភាគច្រើនយើងបានឃើញប្រាង្គប្រាសាទបុរាណ ប៉ុន្តែយើងអត់បានសិក្សាស៊ីជម្រៅ ឬក៏ផ្សព្វផ្សាយអំពីភាសា វប្បធម៌ និង អារ្យធម៌សម័យបុរាណឲ្យបានទូលំទូលាយទេ។ ដូច្នេះ ជាគោលដៅរបស់ខ្ញុំផ្ទាល់ គឺការលើកកម្ពស់ផ្សព្វផ្សាយអារ្យធម៌ និងវប្បធម៌ឲ្យបានទូលំទូលាយឲ្យសិស្សបានដឹង។ អ៊ីចឹងកំណាព្យនេះផ្សារភ្ជាប់ប្រវត្តិសាស្ត្រខ្មែរ»។
បើតាមលោក ហង់ជួន ណារ៉ុន អារ្យធម៌ និងវប្បធម៌ខ្មែរអាចនឹងមានការរីកចម្រើនតាមរយៈការផ្សព្វផ្សាយតាមប្រព័ន្ធបច្ចេកវិទ្យា។ លោក ថ្លែងថា៖«យើងមានអារ្យធម៌ និងវប្បធម៌ខ្មែរតាំងពីយូរលង់មកហើយ មានភាសា ប្រាសាទ សិល្បៈ ទាំងល្ខោនយីកេ។ អ៊ីចឹងការប្រើប្រាស់បច្ចេកវិទ្យាក៏ជាផ្នែកមួយនៃអរិយធម៌ សង្គមធម៌ និង វប្បធម៌។ អ៊ីចឹងការប្រើប្រាស់បច្ចេកវិទ្យានេះគឺយើងឃើញថា គឺកាន់តែធ្វើឲ្យការអភិរក្សផ្នែកវប្បធម៌កាន់តែល្អប្រសើរតាមរយៈការប្រើប្រាស់បច្ចេកវិទ្យា។ ការប្រើប្រាស់បច្ចេកវិទ្យាដើម្បីស្កេនប្រាសាទ ហើយយើងដាក់នៅអនឡាញ ហើយបង្កើតជាសារមន្ទីរអនឡាញ។ អ៊ីចឹងធ្វើឲ្យពលរដ្ឋខ្មែរអាចមើលឃើញបាន»។
ទិវាគ្រូបង្រៀននៅថ្ងៃទី៥ ខែតុលាខាងមុខនេះ នឹងប្រព្រឹត្តទៅក្រោមប្រធានបទស្តីពី «គ្រូបង្រៀនឆ្លាតវៃ ដើម្បីការអប់រំឌីជីថល» នៅឯវិទ្យាស្ថានជាតិអប់រំ។ សូមរម្លឹកថា ទិវាគ្រូបង្រៀននៅកម្ពុជា ត្រូវបានប្រារព្ធឡើងតាំងពីឆ្នាំ១៩៩៧ ក្នុងគោលបំណងឲ្យសិស្ស និងនិស្សិតរម្លឹកគុណូបការៈដ៏ថ្លៃថ្លារបស់គ្រូបង្រៀន ដែលធ្លាប់បានបង្រៀន និងបណ្តុះបណ្តាលធនធានមនុស្ស សម្រាប់ការពារ កសាង និងអភិវឌ្ឍមាតុភូមិលើគ្រប់វិស័យ៕
Tag:
ហង់ជួន ណារ៉ុន
សៀវភៅកំណាព្យអារ្យធម៌
ទិវាគ្រូបង្រៀន
© រក្សាសិទ្ធិដោយ thmeythmey.com