ការបញ្ចប់ការសាងសង់ពហុកីឡដ្ឋានមរតកតេជោ ត្រូវអូសបន្លាយដល់ខែឧសភា ឆ្នាំក្រោយ

កីឡាជាតិ

ជាតិ

ការបញ្ចប់ការសាងសង់ពហុកីឡដ្ឋានមរតកតេជោ ត្រូវអូសបន្លាយដល់ខែឧសភា ឆ្នាំក្រោយ

06, Oct 2020 , 8:59 am

រូបភាព

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា, រូបភាពពី Cambodia SEA Games 2023

ដោយ:

ការបញ្ចប់ការសាងសង់ពហុកីឡដ្ឋានជាតិមរតកតេជោ ត្រូវបន្តអូសបន្លាយដល់ខែឧសភា ឆ្នាំ២០២១។ នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ដែលអះអាងថា ការអូសបន្លាយនេះ ដោយសារផ្នែកខ្លះត្រូវការចំណាយពេលច្រើនទៀតក្នុងការសាងសង់។

ទីលានបាល់ទាត់ស្តង់ដាអន្តរជាតិក្នុងពហុកីឡដ្ឋានជាតិមរតិកតេជោ ដែលសាងសង់ ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២ឆ្នាំ២០២៣ ត្រូវបានពន្យាពេលជាបន្តបន្ទាប់ក្នុងការបញ្ចប់ការសាងសង់។ បើតាមលោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា កីឡដ្ឋាននេះ គ្រោងបញ្ចប់ការសាងសង់នៅអំឡុងខែឧសភា ឆ្នាំ២០២១។

ក្នុងបទសម្ភាសជាមួយអ្នកសារព័ត៌មានពេលអមដំណើរសម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ ចុះត្រួតពិនិត្យទីលានហ្វឹកហាត់របស់កីឡាករកីឡាការិនីនៅពហុកីឡដ្ឋានជាតិមរតកតេជោ លោក វ៉ាត់ ចំរើន បានបង្ហាញហេតុផលមួយចំនួន ដែលរាំងស្ទះដល់ការសាងសង់កីឡដ្ឋានជាតិមរតកតេជោ។

លោក បានបញ្ជាក់យ៉ាងដូច្នេះថា៖«នៅព្រឹកនេះមានការត្រៀមលក្ខណៈពីរសំខាន់ៗ ទី១. គឺកីឡដ្ឋានធំ ដែលមានការប្រែប្រួលកាលបរិច្ឆេទក្នុងការបង្ហើយចុងក្រោយ គឺខាងភាគីចិនបានបញ្ជាក់ថា យើងនឹងធ្វើរួចរាល់នៅខែឧសភា ឆ្នាំ២០២១ ដោយសារតែយើងមានការតុបតែង ការធ្វើបន្ទប់ ការបំពាក់កញ្ចក់ បំពាក់កៅអី វានៅត្រូវការពេលច្រើន។ ជាពិសេស ការតុបតែងខាងក្នុង ទាំងតារាងបាល់ ប្រព័ន្ធខាងក្រោមតារាងបាល់ ទីលានរត់អត្តពលកម្ម និងបន្ទប់ VIP ត្រូវការរៀបចំច្រើន»។

តាមគម្រោងពីដំបូងទីលានបាល់ទាត់ដែលជាសមិទ្ធផលធំជាងគេក្នុងពហុកីឡដ្ឋានជាតិមរតកតេជោ គ្រោងបញ្ចប់ការសាងសង់នៅអំឡុងខែធ្នូ ចុងឆ្នាំ២០២០។ ប៉ុន្តែក្រោយមកការបញ្ចប់ការសាងសង់ត្រូវបានពន្យាពេលដល់ខែមេសាឆ្នាំ២០២១ ដោយសារការរាតត្បាតជាសកលនៃជំងឺកូវីដ-១៩ ដែលធ្វើឲ្យរាំងស្ទះដល់ការដឹកសម្ភារដែលបម្រើឲ្យការសាងសង់តាមផ្លូវទឹក ក្រោយមានការបិទព្រំដែនពីប្រទេសមួយចំនួន។

លោក វ៉ាត់ ចំរើន ដែលជាអគ្គលេខាធិការ CAMSOC ផងនោះរំពឹងថា កីឡដ្ឋាននេះនឹងបញ្ចប់ការសាងសង់តាមការគ្រោងទុកនៅពាក់កណ្តាលឆ្នាំ២០២១ ដើម្បីត្រៀមរៀបចំការប្រកួតកីឡាជាតិលើកទី៤ ដែលធ្វើលំនាំការប្រកួតកីឡាស៊ីហ្គេម។ មកដល់បច្ចុប្បន្នកីឡដ្ឋាននេះសាងសង់រួចរាល់បានប្រមាណ៨០ភាគរយហើយ។

កីឡដ្ឋានលំដាប់អន្តរជាតិដែលជាបច្ចេកវិទ្យាចុងក្រោយរបស់ចិន សាងសង់លើផ្ទៃដីជាង១៦ហិកតា ដោយគ្រោងចំណាយថវិកា១៥៨លានដុល្លារ ដែលជាជំនួយឥតសំណងរបស់រដ្ឋាភិបាលចិន។ កីឡដ្ឋាននេះ អាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀងទស្សនិកជនត្រឹមតែ៧នាទីក្នុងករណីមានហេតុការណ៍មិនប្រក្រតីកើតឡើង។

សមិទ្ធផលទីពីរនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានសម្តេចនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ រួមមានមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះ, និងអគារស្នាក់នៅរបស់អត្តពលិក៕