អតីតកុងស៊ុលខ្មែរនៅគុនមិញ លោក គ្រុយ លឹមហេង ជាប់ទោស៧ឆ្នាំ និងរងពិន័យ១០លានរៀល

ជាតិ

អតីតកុងស៊ុលខ្មែរនៅគុនមិញ លោក គ្រុយ លឹមហេង ជាប់ទោស៧ឆ្នាំ និងរងពិន័យ១០លានរៀល

08, Oct 2020 , 11:55 am

រូបភាព

លោក គ្រុយ លឹមហេង ពេលស្ថិតក្នុងតួនាទីអគ្គកុងស៊ុលកម្ពុជាប្រចាំក្រុងគុនមិញ ខេត្តយូណាន។ រូបថត theindependentbd

ដោយ: រំដួល ចិត្រា (Romdoul Chetra)

ភ្នំពេញ៖ អតីតអគ្គកុងស៊ុលកម្ពុជាប្រចាំទីក្រុងគុនមិញ ខេត្តយូណាន ប្រទេសចិន លោក គ្រុយ លឹមហេង ត្រូវបានសម្រេចដាក់ពន្ធនាគាររយៈពេល ៧ឆ្នាំ និងពិន័យជាប្រាក់ចំនួន ១០លានរៀលចូលរដ្ឋ នៅថ្ងៃទី៨ តុលានេះ ក្រោមបទចោទចំនួន៤។

លោក គ្រុយ លឹមហេង ត្រូវបានតុលាការបានសម្រេចចោទប្រកាន់ រួមមានទី១ ករណីបំផ្លាញដោយចេតនា និងគៃបំបាត់ដោយទុច្ចរិត ,ទី២ រំលោភអំណាច និងទី៣ វីតិក្រម (យកលុយលើសការកំណត់) និងទី៤ ករណីមិនប្រកាសទ្រព្យសម្បត្តិ និងបំណុល របស់ឈ្មោះ គ្រុយ លឹមហេង ប្រព្រឹត្តនៅកម្ពុជាចាប់តាំងពីឆ្នាំ២០១៥ ដល់ ២០១៩ ។

កន្លងមកលោក ឱម យិនទៀង ប្រធានអង្គភាពប្រឆាំងអំពើពុករលួយ ដែលចុះស៊ើបអង្កេតលើករណីលោក គ្រុយ លឺមហេង បាននិយាយថា អតីតអគ្គកុងស៊ុលកម្ពុជាប្រចាំទីក្រុងគុនមិញនេះ បានប្រព្រឹត្តបទល្មើសពុករលួយ ចន្លោះឆ្នាំ២០១៦ ដល់ខែមិថុនា ឆ្នាំ២០១៨ ។ លោកថា ករណីបទល្មើសទាំងនោះ រួមមានការយកលុយលើសតម្លៃកំណត់ និងការប្រើអំណាចហួសជាដើម។

ក្នុងន័យនេះលោក យិនទៀង បានសង្កត់ធ្ងន់ថា លោក គ្រុយ លឹមហេង បានប្រើអំណាចដកយកលុយរបស់អគ្គកុងស៊ុលកម្ពុជា ពីធនាគារចិនមួយ តាមរយៈការប្រើប្រាស់«ត្រាអគ្គកុងស៊ុល» ខុសច្បាប់អស់រយៈពេល២ខែកន្លងមក នៅគ្រាដែលរូបលោក ត្រូវបានដកចេញពីតំណែង កាលពីឆ្នាំ២០១៨៕