ភ្នំពេញ៖ ករណីប៉ូលិស «ផាកបទល្មើសចរាចរណ៍» គឺជាប្រធានបទមួយដ៏គួរឱ្យចាប់អារម្មណ៍ និងក្លាយជាអាយ៉ៃឆ្លើយឆ្លងគ្នា រវាងឧត្តមសេនីយ៍ត្រី ទី ចំរើនកុសល និងស្នងការនគរបាលជាតិ ក្នុងរយៈពេលមួយសប្ដាហ៍ចុងក្រោយ ។
ជាញឹកញយគេសង្កេតឃើញ លោក ទី ចំរើនកុសល តែងតែចេញមុខរិះគន់លើមន្ត្រីនគរបាលមានសមត្ថកិច្ច ដែលបញ្ឍរជើងតាមគោលដៅ ដើម្បីត្រួតពិនិត្យ និងផាកពិន័យលើការបើកបរល្មើសច្បាប់ចរាចរណ៍។ ឧត្តមសេនីយ៍ត្រីរូបនេះ មិនសំចៃមាត់ក្នុងការរិះគន់លើមន្ត្រីអនុវត្តច្បាប់ចរាចរណ៍ឡើយ។
បើគេមើលក្នុងផេកហ្វេសប៊ុករបស់លោក ទី ចំរើនកុសល នោះ ប្រាកដជាឃើញការរិះគន់ពីចំណុចខុសឆ្គងរបស់មន្ត្រីនគរបាលអន្តរាគមន៍ នៅក្នុងអនុវត្តតួនាទី បម្រើផលប្រយោជន៍ប្រជាពលរដ្ឋ។
ឧត្តមសេនីយ៍ត្រីរូបនេះ បានសរសេរលើទំព័រហ្វេសប៊ុក កាលពីថ្ងៃទី៧ តុលា ដូច្នេះថា៖«ជារឿយៗ ខ្ញុំតែងតែសង្កេតឃើញប្អូនៗនគរបាលអន្តរាគមន៍ នៃស្នងការដ្ឋាននគរបាលរាជធានី ដែលចុះសហការណ៍ជាមួយនគរបាលចរាចរណ៍តាមគោលដៅមួយចំនួនតែងតែចេញមកហៅ ឬឃាត់រាល់យានយន្តដែលល្មើសច្បាប់ចរាចរណ៍ដោយឯកឯង។ នេះគឺជាការប្រព្រឹត្តខុសពីតួនាទី និងភារកិច្ចរបស់ខ្លួន។ ដោយហេតុថា ប្អូនៗមិនមែនជានគរបាលចរាចរណ៍ទេ ដូចនេះប្អូនៗគ្មានភារកិច្ចអ្វីត្រូវហៅ ឬបញ្ឈប់រាល់យានយន្តដែលល្មើសច្បាប់ចរាចរណ៍ដោយឯកឯងបានឡើយ»។
ក្នុងន័យនេះ លោក ទី ចំរើនកុសល បានបកស្រាយថា តួនាទី និងភារកិច្ចរបស់នគរបាលអន្តរាគមន៍ គឺដើម្បីជួយអន្តរាគមន៍ និងបង្ក្រាបរាល់បទល្មើសចរាចរណ៍ទាំងឡាយណា ដែលមិនព្រមឈប់តាមការបញ្ឈប់របស់នគរបាលចរាចរណ៍ ឬមានបង្កអំពើហិង្សាមកលើសមត្ថកិច្ចកំពុងអនុវត្តច្បាប់..។ល។
បើតាមលោក ចំរើនកុសល នគរបាលអន្តរាគមន៍ត្រូវឈរចម្ងាយ៥០ម៉ែត្រ ពីគោលដៅនគរបាលចរាចរណ៍ដែលកំពុងអនុវត្តន៍ច្បាប់នីមួយៗ មិនមែនឈរផ្តុំគ្នាជាមួយនឹងនគរបាលចរាចរណ៍នោះទេ។ «កន្លងមកគោលដៅដែលខ្ញុំឧស្សាហ៍ឃើញនគរបាលអន្តរាគមន៍ឈរផ្តុំគ្នាជាមួយនគរបាលចរាចរណ៍ផ្លូវគោក និងចេញមកបង្ក្រាបដោយឯកឯង គឺនៅគោលដៅអាងទឹក គោលដៅភ្លើងស្តុបផ្សារដើមគរ និងគោលដៅរង្វង់មូលគួចកាណុង»។ នេះជាការលើកឡើងរបស់ឧត្តមសេនីយ៍ត្រី ទី ចំរើនកុសល។
តើនគរបាលអន្តរាគមន៍មានសិទ្ធិចេញមកឃាត់ ឬហៅរាល់យានយន្តដែលល្មើសច្បាប់ចរាចរណ៍ដោយឯកឯងបានដែរឬទេ? ជារឿយៗ...
Posted by ឧត្តមសេនីយ៍ ទី ចំរើនកុសល on Wednesday, 7 October 2020
ស្នងការដ្ឋាននគរបាលរាជធានីភ្នំពេញ តែងតែចេញមុខបកស្រាយតបលោក ទី ចំរើនកុសល។ ស្នងការនគរបាលក្រុង មិនបដិសេធការលើកឡើងរបស់លោក ចំរើនកុសល ទេ ប៉ុន្តែគ្រាន់តែបញ្ជាក់ថា សកម្មភាពរបស់នគរបាលអន្តរាគមន៍នេះ គឺដើម្បីជួបទប់ស្កាត់យានយន្ត ដែលអាចមានបំណងបើករត់គេចពីការត្រួតពិនិត្យរបស់មន្ត្រីនគរបាលចរាចរណ៍ប៉ុណ្ណោះ។
«ចំពោះកម្លាំងអន្តរាគមន៍ពិសេស (ជាកម្លាំងសហការ) មានភារកិច្ចចុះសហការជាមួយកម្លាំងមន្ត្រីនគរបាលចរាចរណ៍ផ្លូវគោក ជាពិសេពេលយានដែលល្មើស បើកគេចវេសពីការត្រួតពិនិត្យរបស់មន្ត្រីនគរបាលរាចរណ៍ ដូចជាការរឹងរូស មិនឈប់មធ្យោបាយដើម្បីឲ្យត្រួតពិនិត្យ បង្កបាតុភាព ឬមានករណីសង្ស័យថាអ្នកបើកបរមធ្យោបាយទាំងនេះ មានពាក់ព័ន្ធប្រើប្រាស់គ្រឿងញៀន ប្រើប្រាស់អាវុធខុសច្បាប់ ។ល។ គឺអាចចេញមកជួយឃាត់យានទប់ស្កាត់ និងប្រដេញក្នុងករណីចាំបាច់ណាមួយ ។ ហើយចំពោះការដែលលើកឡើងថា កម្លាំងអន្តរាគមន៍ពិសេស គ្មានសិទ្ធិឃាត់យានត្រួតពិនិត្យគឺត្រឹមត្រូវ តែកម្លាំងអន្តរាគមន៍ អាចចុះសហការទប់ស្កាត់ឃាត់យាន ដែលមានបំណងចង់បើកគេចវេសពីការត្រួតពិនិត្យ របស់កម្លាំងមន្ត្រីនគរបាលចរាចរណ៍ផ្លូវគោក ដែលជាកម្លាំងជំនាញ»។ នេះជាការបញ្ជាក់របស់ស្នងការដ្ឋាននគរបាលជាតិ។
សេចក្តីបកស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ...
Posted by ស្នងការដ្ឋាននគរបាលរាជធានីភ្នំពេញ on Thursday, 8 October 2020
អគ្គស្នងការដ្ឋាននគរបាលជាតិ កំពុងតាមដានករណីនេះ។ លោក ឆាយ គឹមខឿន អ្នកនាំពាក្យអគ្គស្នងការដ្ឋាន បាននិយាយថា គោលដៅចរាចរណ៍ពិតជាចាំបាច់មានមន្ត្រីអន្តរាគមន៍ ដើម្បីជួយអន្តរាគមន៍លើករណីពលរដ្ឋគេចវេះពីការត្រួតពិនិត្យ ។
«នៅគ្រប់គោលដៅនគរបាលចរាចរណ៍ កន្លែងខ្លះយើងដាក់ កន្លែងខ្លះយើងអត់ដាក់កម្លាំងអន្តរាគមន៍(នគរបាលអន្តរាគមន៍)។ មូលហេតុអ្វីបានយើងដាក់កម្លាំងអន្តរាគមន៍ យើងជៀសវាងអ្នកគេចរត់ឬមានប្រតិកម្ម នៅកន្លែងគោលដៅចរាចរណ៍។ ពេលខ្លះដោយសារគោលដៅចរាចរណ៍ទាំងអស់ក៏មានភារកិច្ចចូលរួមចំណែកទប់ស្កាត់និងបង្ក្រាបបទល្មើសចោរឆក់ …។ ហើយនគរបាលអន្តរាគមន៍មានតួនាទីសម្របសម្រួលជួយគាំទ្រដល់នគរបាលចរាចរណ៍នៅគោលដៅនោះ គាត់មានសិទ្ធិឃាត់(រថយន្ត) ដើម្បីជួយសម្រួលដល់កិច្ចការចរាចរណ៍ ប៉ុន្តែគាត់មិនមែនជាអ្នកអនុវត្តតួនាទីជានគរបាលចរាចរណ៍ ចេញលិខិតពិន័យនោះទេ។ ការផាកពិន័យគឺនគរបាលចរាចរណ៍ជាអនុវត្ត»។ នេះបើតាមការលើកឡើងរបស់លោក ឆាយ គឹមខឿន ដោយសង្កាត់ធ្ងន់ថា បើមន្រី្តណាមួយឃាត់រយន្ត ដែលមិនមានកំហុសគឺខុសទាំងនមន្រី្តនគរបាលចរាចរណ៍និងនគរបាលអន្តរាគមន៍។
មិនមែនតែករណីនគរបាលអន្តរាគមន៍នេះទេ កន្លងមកលោក ទី ចំរើនកុសល ក៏រិះគន់លើករណីមន្ត្រីចរាចរណ៍ជាប់កិច្ចសន្យា ចុះអន្តរាគមន៍ឃាត់យានយន្តលើដងផ្លូវដែរ។ បើតាមលោក ចំរើនកុសល មន្ត្រី ជាប់កិច្ចសន្យា គឺមានភារកិច្ចជួយសហការជាមួយនគរបាលចរាចរណ៍ ដើម្បីសម្រួលចរាចរណ៍ តែគ្មានសិទ្ធិចេញមកបញ្ឈប់រាល់យានយន្តដែលល្មើសនឹងច្បាប់ចរាចរណ៍នៅលើដងផ្លូវឡើយ។
ក្រោយការរិះគន់នេះ ការិយាល័យនគរបាលចរាចរណ៍ផ្លូវគោកនៃស្នងការនគរបាលរាជធានីភ្នំពេញ ក៏បានហៅមន្ត្រីជាប់កិច្ចសន្យារូបនេះ មកធ្វើកិច្ចសន្យា ត្រួតពិនិត្យ និងបានដាក់ពិន័យនៅការិយាល័យផងដែរ៕