ជាតិ
បទយកការណ៍ / បទសម្ភាសន៍
មានដើមទុន មានទុនត្រៀមហានិភ័យ មានសមត្ថភាព មានបទពិសោធខ្លះ តើល្មមប្រឡូកក្នុងវិស័យអាជីវកម្មឬនៅ?
លោក សំ កុសល អ្នកនិពន្ធសៀវភៅ និងជានាយកប្រតិបត្តិក្រុមហ៊ុន Business Cambodia (រូបផ្ដល់ឱ្យ)
×![]()
ដោយ: ប៉ូ សាគុន
ភ្នំពេញ៖ មានដើមទុន មានទុនត្រៀមហានិភ័យ មានសមត្ថភាព និង មានបទពិសោធ គឺជាជំហានដ៏ល្អសម្រាប់ការឈានជើងចូលប្រឡូកក្នុងវិស័យអាជីវកម្ម។ ប៉ុន្តែនៅមានចំណុចសំខាន់បំផុតមួយទៀតគឺ «បេះដូង» ទើបធ្វើឱ្យអាជីវកម្មមួយមិនបរាជ័យ។ «បេះដូង» អាចឱ្យមនុស្សម្នាក់ ដែលមានដើមទុនតិច មិនសូវមានសមត្ថភាព មិនមានបទពិសោធ ជោគជ័យលើអាជីវកម្មរបស់ខ្លួន។ ទាំងនេះជាការមើលឃើញរបស់លោក សំ កុសល អ្នកនិពន្ធសៀវភៅ និងជានាយកប្រតិបត្តិក្រុមហ៊ុន Business Cambodia។
ជាការពិត ការធ្វើអាជីវកម្មមួយ ដើមទុនពិតជាសំខាន់ដែលមិនអាចខ្វះបាន ប៉ុន្តែ «ទុន» មិនមែនត្រឹមតែជាប្រាក់ប៉ុណ្ណោះទេ គឺវាមានទាំងជំនាញ និងបទពិសោធផ្សេងៗ។ ទោះជាយ៉ាងណា កត្តាសំខាន់ជាងគេបំផុតនោះគឺ «បេះដូង» ដែលមិនមែនជាប្រាក់ ក៏មិនមែនជាបទពិសោធដែរ។ «បេះដូង» នៅត្រង់នេះសំដៅលើ ការចេះតស៊ូ អត់ធ្មត់ និងបេះដូងនៃការចេះច្នៃប្រឌិត ដែលទោះបីជាគេមានដើមទុនតិច ក៏គេអាចជោគជ័យបានដែរ។ ទាំងនេះគឺជាការលើកឡើងរបស់លោក សំ កុសល អ្នកនិពន្ធសៀវភៅ និងជានាយកប្រតិបត្តិក្រុមហ៊ុន Business Cambodia ដែលមានបទពិសោធច្រើន ក្នុងវិស័យអាជីវកម្ម។
សូមស្ដាប់បទសម្ភាសរវាងកញ្ញា ប៉ូ សាគុន អ្នកកាសែតនៃសារព័ត៌មានថ្មីៗ ជាមួយលោក សំ កុសល អ្នកនិពន្ធសៀវភៅ និងជានាយកប្រតិបត្តិក្រុមហ៊ុន Business Cambodia នូវខ្លឹមសារលំអិតបន្ថែម៖
លោកបន្ថែមថា នៅក្នុងការរកស៊ី មិនថាបុគ្គលនោះមានចំណេះច្រើន មានបទពិសោធច្រើន មានដើមទុនច្រើនក៏ដោយចុះ ប៉ុន្តែគេអាចនឹងងាយបោះបង់ចោល នូវអ្វីដែលគេខំសាងឡើយ នៅពេលដែលអាជីវកម្មនោះជួបឧបសគ្គ ឬដួលរលំ។ ផ្ទុយទៅវិញ បុគ្គលមួយរូបទៀតដែលមានទុនតិច ប៉ុន្តែគេមាន «បេះដូងជាសហគ្រិន» គេនឹងទទួលជោគជ័យ ដោយការខំជំនះឧបសគ្គ និងការលំបាកគ្រប់បែបយ៉ាង។ មានន័យថា បើទោះបីជាអាជីវកម្មនោះ ខាតច្រើនលើកច្រើនសារ ក៏គេនៅតែមិនចុះចាញ់ដែរ។
លោក សំ កុសល បញ្ជាក់បន្ថែម៖«បេះដូចនៅទីនេះមិនមែនត្រឹមជាក្ដីស្រឡាញ់ទេ ប៉ុន្តែជាបេះដូចតស៊ូ។ អត់មានដើមទុនត្រូវធ្វើម៉េច? អត់ដើមទុន ជប់ដើមទុន។ អ្នកខ្លះគាត់មានដើមទុនខ្លះដែរ ហើយនៅពេលដែលរកស៊ីបានតែ៣ខែក៏ខាត ប៉ុន្តែគាត់មិនចុះចាញ់ទេ នេះខ្ញុំហៅថាជាអ្នកមានបេះដូងជាសហគ្រិន។ បេះដូងហ្នឹងជួយលើកទឹកចិត្តយើងរាល់ថ្ងៃ។ ឥឡូវនេះខាតជិតអស់ប្រាក់ពីហោប៉ៅហើយ តើត្រូវធ្វើយ៉ាងម៉េច? គឺយើងត្រូវទៅរកប្រាក់។ ទោះបីខាតយ៉ាងណាក៏ដោយ អ្នកដែលមានបេះដូងគឺគាត់មិនស្លុតទេ គាត់មិនបារម្ភច្រើនទេ ប៉ុន្តែគាត់បែរជាខំប្រមូលកម្លាំងចិត្ត គាត់ខំធ្វើការបន្ថែម និងខំប្រមូលដើមទុនបន្ថែម ដើម្បីបន្តអាជីវកម្មនោះទៀត។ ជាទូទៅអ្នកដែលខ្វះបេះដូង គាត់រកស៊ីបានតែ៣ខែ ឬ៦ខែទេគាត់នឹងបោះបង់ចោល នៅពេលដែលគាត់រកស៊ីខាត»។
ទោះជាយ៉ាងណា មុនឈានជើងចូលប្រឡូកក្នុងវិស័យអាជីវកម្ម លោក សំ កុសល ក៏បានណែនាំទៅយុវជនផងដែរ ឱ្យលះបង់ទម្លាប់អាក្រក់មួយចំនួន ដូចជាការខ្ចិលច្រអូសជាដើម។ បន្ថែមពីនោះ ភាពបរាជ័យក៏អាចគំរាមកំហែងដល់អាជីវកម្មដែរ នៅពេលដែលអាជីវកម្មនោះ ខ្វះគំនិតច្នៃប្រឌិតថ្មី មានន័យថាការចាប់យកអាជីវកម្មបែបបុរាណ។ ទម្លាប់នៃការគិតអវិជ្ជមាន ក៏ត្រូវតែចៀសវាងផងដែរ។ សម្រាប់លោក សំ កុសល ឱ្យនិយមន័យការធ្វើអាជីវកម្ម គឺជាការរៀនសូត្រ តែមិនមែនជាការកើបប្រាក់នោះឡើយ។ គិតបែបនេះ លោកថាវាធ្វើឱ្យគេមិនពិបាកចិត្ត នូវរាល់ការខាតបង់ ហើយគេនៅតែមានកម្លាំងដើរទៅមុខ។
«ជាទូទៅគិតវិជ្ជមាន មិនប្រាកដថាលទ្ធផលចេញមក វិជ្ជមាននោះទេ មិនប្រាកដថាយើងចេញរកស៊ីទៅវាមិនខាតនោះទេ។ ប៉ុន្តែគិតវិជ្ជមាន វាធ្វើឱ្យយើងមានកម្លាំង វាធ្វើឱ្យយើងក្លាហាន វាធ្វើឱ្យយើងមានឱកាសជោគជ័យ និងឱកាសបរាជ័យ។ ប៉ុន្តែអ្នកដែលមានគំនិតអវិជ្ជមានច្រើន គាត់នៅតែអង្គុយគិតបារម្ភបែបនេះ បារម្ភបែបនោះ ធ្វើនេះមិនកើតទេ ធ្វើនោះមិនកើតទេ អ៊ីចឹងវាសុញបាត់ទៅហើយ។ សម្រាប់សហគ្រិន រាល់កំហុសគឺជាប្រាក់ចំណេញ ទោះគេខុសច្រើនដងទៅហើយ ប៉ុន្តែគេនៅតែអាចរកផ្លូវដើម្បីរកប្រាក់ចំណេញឃើញ»។ នេះជាការបញ្ជាក់បន្ថែមរបស់លោក សំ កុសល៕
Tag:
ជាតិ
អាជីវកម្ម
មុខរបរ
ទុន
ហានិភ័យ
សំ កុសល
© រក្សាសិទ្ធិដោយ thmeythmey.com
