ប្រុងប្រយ័ត្ន! កម្ពុជាទទួលឥទ្ធិពលព្យុះ «សូដែល» ដែលនឹងចូលមកតាមរតនគិរី

ជាតិ

សង្គមជាតិ

ប្រុងប្រយ័ត្ន! កម្ពុជាទទួលឥទ្ធិពលព្យុះ «សូដែល» ដែលនឹងចូលមកតាមរតនគិរី

13, Oct 2020 , 9:58 am

រូបភាព

ដោយ:

ភ្នំពេញ៖ សមុទ្រចិនខាងត្បូង មានព្យុះទី១៦ ណាងកា (Nanga) ដែលបានចូលមកក្នុងឈូងសមុទ្រតុងកឹង ហើយឆ្លងកាត់កោះហៃណាំរួចចូលមកប្រទេសវៀតណាម។ បាតុភូតនោះក៏បណ្តាលឲ្យកម្ពុជានឹងទទួលរងព្យុះទី១៧ថ្មីគឺសូដែល (Soudel) ដែលបណ្តាលឲ្យតំបន់ទំនាប ជួរភ្នំដងរែក ខ្ពង់រាបឦសាន និង តំបន់មាត់សមុទ្រ នឹងមានភ្លៀងធ្លាក់ចាប់ពីថ្ងៃទី១៨ ដល់ថ្ងៃទី២០ ខែតុលាខាងមុខនេះ។

ក្រសួងធនធានទឹក បានព្យាករថា ព្យុះទី១៧នេះ នឹងចូលមកប្រទេសវៀតណាមត្រង់ចំណុចគីញើន ដោយបន្តឆ្លងកាត់ចូលមកកម្ពុជាតាមខេត្តរតនគិរី ចាប់ពីថ្ងៃទី១៨ ដល់ថ្ងៃទី១៩ ខែតុលាក្នុងកម្លាំងជាវិសម្ពាធ និងសម្ពាធទាប។

បាតុភូតនោះនឹងធ្វើឲ្យបណ្តាខេត្តនៅតំបន់វាលទំនាបកណ្តាល នឹងមានភ្លៀងធ្លាក់រាយប៉ាយ ក្នុងកម្រិតបរិមាណពីតិចទៅបង្គួរ។ បណ្តាខេត្តនៅតាមតំបន់ភាគពាយ័ព្យ និងភាគខាងជើងនឹងមានភ្លៀងធ្លាក់ពីបង្គួរទៅច្រើន។ នៅតាមបណ្តាខេត្តជាប់ជួរភ្នំដងរែក និងខ្ពង់រាបឦសាន និងមានភ្លៀងធ្លាក់មធ្យមទៅបង្គួរ។

ចំណែកនៅបណ្តាខេត្តជាប់តំបន់សមុទ្រនឹងមានភ្លៀងធ្លាក់ពីមធ្យមទៅបង្គួរ។ ក្រសួងធនធានទឹកបញ្ជាក់ថា នៅលើផ្ទៃសមុទ្រ អាចនឹងមានភ្លៀងធ្លាក់ច្រើន លាយឡំនឹងខ្យល់ បក់បោក និងរលកសមុទ្រខ្ពស់ៗ។

ហេតុដូច្នេះ ក្រសួងធនធានទឹកអំពាវនាវឲ្យពលរដ្ឋដែលរស់នៅតាមទីទំនាប ក្បែរផ្លូវទឹក ជាប់តំបន់ភ្នំ និងជួរភ្នំ ប្រុងប្រយ័ត្ននឹងជំនន់ទឹកភ្លៀង។ ចំណែកអ្នកនេសាទ និងអ្នកដំណើរតាមសមុទ្រ ក៏ត្រូវប្រុងប្រយ័ត្ននឹងខ្យល់ និងរលកខ្ពស់ៗផងដែរ៕