កីឡាអន្តរជាតិ
អន្តរជាតិ
Neymar តាមស្មើកំណត់ត្រា Ronaldo ក្រោយធ្វើបាន hat-trick ជួយប្រេស៊ីលឈ្នះប៉េរូ ៤-២
× Neymar បានស៊ុតបញ្ចូលទី៣គ្រាប់ម្នាក់ឯង (hat-trick) ដើម្បីជួយប្រេស៊ីលយកឈ្នះប៉េរូ ៤-២ ក្នុងការប្រកួតជម្រុះ World Cup ក្នុងតំបន់អាមេរិកឡាទីន នៅព្រឹកថ្ងៃទី១៤ ខែតុលានេះ។ ៣គ្រាប់បន្ថែមនេះបានជួយ Neymar តាមស្មើកំណត់ត្រា Ronaldo ក្នុងនាមអ្នកស៊ុតបញ្ចូលទីច្រើនជាងគេឲ្យប្រេស៊ីលលំដាប់លេង២ក្នុងចំនួន៦២គ្រាប់។
ក្នុងចំណោម៤គ្រាប់របស់ប្រេស៊ីល ខ្សែប្រយុទ្ធឆ្នើមក្រុម Paris Saint-Germain រូបនេះរកបាន៣គ្រាប់តាមរយៈការស៊ុតបាល់ពិន័យ១១ម៉ែត្រ២លើកក្នុងនាទី ២៨ និង៨៣ មុនបន្ថែមគ្រាប់ចុងក្រោយនៅនាទី៩០ ខណៈ១គ្រាប់ទៀតសម្រេចទីដោយ Richarlison របស់ Everton។ ។ ឯពីរគ្រាប់របស់ម្ចាស់ផ្ទះប៉េរូ ធ្វើបានដោយ Andre Carrillo នៅនាទី៦ និង Renato Tapia នៅនាទី៥៩។
Neymar វ័យ ២៨ ឆ្នាំរកគ្រាប់បាល់សរុបឲ្យក្រុមរហស្សនាមសាំបាចំនួន ៦២ គ្រាប់ ក្នុងការបង្ហាញខ្លួន ១០៣ ប្រកួត ដែលស្មើ Ronaldo ខណៈវិរបុរសប្រេស៊ីរូបនេះលេងឲ្យក្រុមជម្រើសជាតិសរុប ៩៨ ប្រកួត។ រហូតមកទល់ពេលនេះ នៅតែស្តេចបាល់ទាត់ Pele ដដែល ដែលអាចរក្សាកំណត់ត្រាស៊ុតបញ្ចូលច្រើនជាងគេចំនួន ៧៧ គ្រាប់សម្រាប់ប្រេស៊ីល។
ជ័យជម្នះរបស់ប្រេស៊ីលនេះ បានជួយក្រុមរបស់លោក Tite ឈរកំពូលតារាង នៃការប្រកួតជ្រុះពានរង្វាន់កីឡាបាល់ទាត់ពិភពលោក FIFA World Cup 2022 ប្រចាំតំបន់អាមេរិកខាងត្បូង។ ឆ្លងកាត់ការប្រកួត២លើក ប្រេស៊ីលមាន៦ពិន្ទុ តាមពីក្រោយដោយអាហ្សង់ទីនដែលមាន៦ពិន្ទុដូចគ្នាក្រោយពួកគេឈ្នះបូលីវី ២-១។ កូឡុំប៊ីឈរលេខរៀងទី៣ មាន៤ពិន្ទុ ស្មើក្រុមលេខ៥ប៉ារ៉ាហ្គាយ ខណៈអេក្វាទ័រ និងអ៊ុយរូហ្គាយស្ថិតនៅចំណាត់ថ្នាក់ទី៥និងទី៦មាន៣ពិន្ទុស្មើគ្នា។
លទ្ធផលការប្រកួតជម្រុះ World Cup ក្នុងតំបន់អាមេរិកឡាទីនសម្រាប់គូដទៃ៖
- អេក្វាទ័រ ៤-២ អ៊ុយរូហ្កាយ
- វេណេស៊ុយអេឡា ០-១ ប៉ារ៉ាហ្គាយ
- ស៊ីលី ២-២ កូឡុំប៊ី
© រក្សាសិទ្ធិដោយ thmeythmey.com