កីឡាអន្តរជាតិ
អន្តរជាតិ
ប្រធាន UEFA ជឿថា Euro 2020 ដែលពន្យារទៅឆ្នាំក្រោយ នឹងមានវត្តមានអ្នកគាំទ្រ
× លោក Aleksander Ceferin ប្រធានសហព័ន្ទកីឡាបាល់ទាត់អឺរ៉ុប (UEFA) ជឿជាក់ថា ការប្រកួតវគ្គផ្តាច់ព្រ័ត្រ Euro ឆ្នាំ ២០២០ ដែលត្រូវពន្យារពេលរហូតដល់ឆ្នាំ ២០២១ អាចដំណើរការបានជាមួយអ្នកគាំទ្រនៅក្នុងកីឡដ្ឋាននានាទូទាំងទ្វីបអឺរ៉ុបបាន។ យ៉ាងណាក៏ដោយ លោក Ceferin នៅតែមានក្តីបារម្ភផងដែរពីផលប៉ះពាល់នៃជំងឺឆ្លង COVID-19 ក្នុងព្រឹត្តិការណ៍ពានរង្វាន់អឺរ៉ុបដែលធ្វើឡើងខែមិថុនា ឆ្នាំក្រោយនេះ។
«សម្រាប់ពេលបច្ចុប្បន្ននេះ យើងកំពុងរៀបចំផែនការការប្រកួតពានរង្វាន់អឺរ៉ូយ៉ាងពិតប្រាកដដូចដែលយើងចង់បាន»។ លោក Ceferin បានប្រាប់វិទ្យុអាល្លឺម៉ង់ ARD ដូច្នេះនៅពេលត្រូវបានសួរអំពីវត្តមានអ្នកគាំទ្រចូលរួមក្នុងកីឡដ្ឋានដែលមាន១២ប្រទេសធ្វើម្ចាស់ផ្ទះ ខណៈការធ្វើតេស្តចេញលទ្ធផលវិជ្ជមាន COVID-19 នៅតែកើនឡើងនៅទូទាំងទ្វីបអឺរ៉ុបក៏ដោយ។ នេះបើតាមការផ្សាយរបស់ទីភ្នាក់ងារព័ត៌មាន AFP។
ប្រធាន UEFA បន្ថែបថា៖« ជាការពិតខ្ញុំបានប្រាប់អ្នកទាំងអស់គ្នាកាលពីខែកុម្ភៈថា Euro នឹងប្រព្រឹត្តទៅតាមវេលាធម្មតា ប៉ុន្តែអ្វីៗបានផ្លាស់ប្តូរក្នុងរយៈពេលមួយខែក្រោយមក។ ប៉ុន្តែឥឡូវយើងបានត្រៀមខ្លួនបានល្អហើយ។ យើងវៃឆ្លាតជាងមុន ហើយខ្លាំងជាងឆ្នាំមុនព្រោះពេលនេះយើងដឹងថាអ្វីៗអាចកើតមានឡើងដោយរបៀបណា និងការពារបានផងដែរ»។
ដោយសារការរាតត្បាតជំងឺសកល Euro 2020 ដែលមាន១២ប្រទេសធ្វើជាម្ចាស់ផ្ទះ ត្រូវបានពន្យារពេលប្រកួតពីថ្ងៃទី១១ ខែមិថុនា ទៅធ្វើនៅថ្ងៃទី១១ ខែកក្កដាឆ្នាំ ២០២១ វិញ។ បើទោះការពន្យារពេលមានរយៈពេលជិត១ឆ្នាំ ប៉ុន្តែប្រធានបាល់ទាត់អឺរ៉ុបសញ្ជាតិស្លូវ៉ានីសង្កត់ធ្ងន់ថា ចំនួនអ្នកគាំទ្រនៅក្នុងកីឡដ្ឋានអាចកំណត់ត្រឹម ៣០, ៥០ ឬ ៧០ភាគរយប៉ុណ្ណោះទៅតាមស្ថានភាពជាក់ស្តែង៕
Tag:
Aleksander Ceferin
UEFA
Euro 2020
COVID-19
© រក្សាសិទ្ធិដោយ thmeythmey.com