ពលរដ្ឋជាង១៤០០គ្រួសារនៅស្រុកកណ្តាលស្ទឹង កំពុងរងគ្រោះដោយទឹកជំនន់ពីស្ទឹងព្រែកត្នោត

ជាតិ

សង្គមជាតិ

ពលរដ្ឋជាង១៤០០គ្រួសារនៅស្រុកកណ្តាលស្ទឹង កំពុងរងគ្រោះដោយទឹកជំនន់ពីស្ទឹងព្រែកត្នោត

15, Oct 2020 , 10:38 am

រូបភាព

ដោយ: អ៊ូ សុខមាន (OU Sokmean)

ពលរដ្ឋចំនួន១,៤៧៩គ្រួសារ រស់នៅក្នុងឃុំចំនួន៧ នៃស្រុកកណ្តាលស្ទឹង ខេត្តកណ្តាល កំពុងរងគ្រោះ ដោយជំនន់ទឹកភ្លៀង និងជំនន់ទឹកស្ទឹងព្រែកត្នោត។ នេះជាការលើកឡើងរបស់លោក លោក អ៊ូច សៅរឿន អភិបាលស្រុកកណ្តាលស្ទឹង ប្រាប់សារព័ត៌មានថ្មីៗ នាព្រឹកថ្ងៃទី១៥តុលា។

លោក អ៊ូច សៅរឿន បានបញ្ជាក់ បច្ចុប្បន្នថ្វីដ្បិតកម្រិតទឹកនៅផ្នែកលើនៅទ្រឹង ប៉ុន្តែកម្រិតទឹកផ្នែកខាងក្រោម បែរជាមានការហក់ឡើង ក្នុងល្បឿងលឿនទៅវិញ។ អភិបាលស្រុកកណ្តាលស្ទឹងរូបនេះ បន្តនិយាយដូច្នេះ៖«ប្រសិនបើទឹកផ្នែកក្រោមនៅតែហក់ឡើងបែបនេះ នោះនឹងបន្តរាលដាលធ្វើឱ្យ ប៉ះពាល់ដល់ពលរដ្ឋនៅរស់ក្នុងឃុំផ្សេងៗទៀត ដែលសណ្ឋានដីទាប»។

បើតាមលោក លោក អ៊ូច សៅរឿន ឃុំទាំង៧ដែលមានកំពុងរងគ្រោះ ដោយទឹកជំនន់នេះ មានឃុំដើមឬស ឃុំកន្សោម ឃុំតាមោក ឃុំអន្លង់រមៀត ឃុំព្រះពុទ្ធ ឃុំគោកត្រប់ និងឃុំជើងកែប។ «គិតត្រឹមម៉ោង៩ព្រឹកនេះ គឺមិនទាន់មានពលរដ្ឋណា បានជម្លៀសទៅកាន់ទីទួលសុវត្ថិភាពឡើយ ព្រោះស្ថានភាពទឹកជំនន់នេះ គឺយើងនៅអាចគ្រប់គ្រងបាន»។

ដើម្បីគ្រប់គ្រងគ្រោះមហន្តរាយទឹកជំនន់នេះ អាជ្ញាធរពាក់ព័ន្ធទាំងអស់ក្នុងខេត្តកណ្តាល គឺបានត្រៀមកម្លាំង និងទីទួលសុវត្ថិភាពរួចអស់ហើយ សម្រាប់ជម្លៀសពលរដ្ឋចេញពីកន្លែងគ្មានសុវត្ថិភាពដែលបង្កដោយជំនន់នេះ។ នេះបើតាមការលើកឡើងរបស់លោក គង់ សោភ័ណ្ឌ អភិបាលខេត្តកណ្តាល ដោយបន្តអះអាងដូច្នេះ៖«យើងបានត្រៀមកម្លាំងគ្រប់ស្ថាប័ន សម្រាប់ជម្លៀស នឹងសង្គ្រោះពលរដ្ឋ ឱ្យមានសុវត្ថិភាព។ យើងបានរៀបចំកងកម្លាំងរួចអស់ហើយ ដើម្បីសង្គ្រោះពលរដ្ឋឱ្យបានទាន់ពេលវេលា»។

សូមជម្រាបថា ជំនន់ទឹកស្ទឹងព្រែកត្នោត ដែលបន្តបានហក់ឡើងក្នុងកម្រិតប្រកាសអាសន្ននេះ បានធ្វើឱ្យស្រុកកណ្តាលស្ទឹង ស្រុកអង្គស្នួល និងក្រុងតាខ្មៅ រងគ្រោះដោយជំនន់នេះ។ លើសពីនេះទៀត ឥទ្ធិពលជំនន់ទឹកស្ទឹងព្រែកត្នោត ក៏បានពលរដ្ឋជាច្រើនគ្រួសារនៅក្នុងខណ្ឌដង្កោ បង្ខំចិត្តចាកចេញពីផ្ទះ ទៅកាន់ទីទួលសុវត្ថិ៕