កីឡាអន្តរជាតិ
អន្តរជាតិ
Son ជួយ Spurs នាំមុខ Man Utd ក្លាយជាក្លិបមានប្រជាប្រិយភាពបំផុតនៅកូរ៉េខាងត្បូង
× Son Heung-min បានជួយឲ្យ Tottenham Hotspur នាំមុខ Manchester United វិញក្នុងនាមក្លិបពីបរទេសដែលទទួលបានប្រជាប្រិយភាពបំផុតនៅប្រទេសកូរ៉េខាងត្បូង។ នេះបើយោងតាមស្ថាប័ន Nielsen Fan Insights ដែលធ្វើការលើការប្រៀបធៀបអ្នកគាំទ្រនៅជុំវិញពិភពលោក។
តាមរយៈការស្ទង់មតិរបស់ Nielsen Fan Insights បានបង្ហាញថា Spurs មានអ្នកគាំទ្រស្ដួចស្ដើងក្នុងប្រទេសដែលមានប្រជាជនចំនួន ៥២ លាននាក់ មុនពេលខ្សែប្រយុទ្ធឆ្នើម Son ចូលរួមជាមួយក្លិបក្នុងក្រុងឡុងដ៏នេះនៅឆ្នាំ ២០១៥។
ចាប់តាំងពីពេលនោះមក ការឈានដល់កម្រិតកំពូលរបស់ Son ក្នុងការប្រកួតនៅអង់គ្លេសបានធ្វើឲ្យប្រជាប្រិយភាពរបស់ក្លិបមាន់ខ្នាយមាសកើនឡើយនៅឯស្រុកកំណើតរបស់របស់ខ្លួនជាលំដាប់ ដោយបានទម្លាក់ក្រុម Arsenal, Chelsea, Real Madrid និង Barcelona ជាបន្តបន្ទាប់ មុនប្រជែងឈ្នះ Man Utd នៅចុងឆ្នាំ ២០១៨។
លទ្ធផលការស្ទង់មតិថ្មីៗបំផុតស្ដីពីប្រជាប្រិយភាពក្លិបបរទេសក្នុងចំណោមប្រជាជនកូរ៉េខាងត្បូងដែលមានអាយុចន្លោះពី១៦ ទៅ ៦៩ឆ្នាំ នៅតែមានវត្តមានក្លិបទាំង៦នេះដដែល។ ប៉ុន្តែ Spurs ទទួលបានការគាំទ្រច្រើនជាងគេក្នុងចំនួន ២១,៤ ភាគរយនៃប្រជាជនសរុប ដែលស្មើនឹង ១១ លាននាក់។ ក្លិបបិសាចក្រហមធ្លាក់ទៅលេខរៀងទី២វិញក្នុងនាមក្លិបមានប្រជាប្រិយបំផុតនៅកូរ៉េខាងត្បូងក្នុងចំនួន ៦,១ ភាគរយ។
លោក Marco Nazzari នាយកគ្រប់គ្រងរបស់ Nielsen Sports លើកឡើងថា ប្រជាប្រិយភាពរបស់ Tottenham Hotspur នៅក្នុងប្រទេសកូរ៉េខាងត្បូងបង្ហាញយ៉ាងច្បាស់ពីផលវិជ្ជមាន និងលេចធ្លោតាមរយៈកីឡាករដែលអាចនាំឲ្យមានហ្វ្រេនឆាយកីឡានៅលើទីផ្សារជុំវិញពិភពលោកទៀតផង។
ប្រជាប្រិយភាពរបស់ Man Utd ដែលកើនឡើងខ្ពស់នៅកូរ៉េខាងត្បូង ក៏ដោយសារភាពលេចធ្លោរបស់ Park Ji-sung តាំងពីរូបគេផ្លាស់ទៅ Old Trafford ក្នុងឆ្នាំ ២០០៥។ កាលនោះ អតីតខ្សែបម្រើឆ្នើមរូបនេះទទួលបានការចាប់អារម្មណ៍ខ្លាំងនៅលីគកំពូលអង់គ្លេស៕
Tag:
Tottenham Hotspur
Nielsen Fan Insights
© រក្សាសិទ្ធិដោយ thmeythmey.com