ជាតិ
សង្គមជាតិ
ពីខេត្តបន្ទាយមានជ័យ លោក កឹម សុខា ផ្ញើសារថា៖«អ្វីដែលជាកុសល យើងគួររួមគ្នាធ្វើ! អ្វីដែលជាជម្លោះ យើងគួរនាំគ្នាជម្រុះ»
រូបពីហ្វេសប៊ុកលោក កឹម សុខា អតីតមេដឹកនាំគណបក្សសង្គ្រោះជាតិ
×![]()
ដោយ: ធឿន បញ្ញាឬទិ្ធ
ភ្នំពេញ៖ អតីតមេដឹកនាំគណបក្សសង្គ្រោះជាតិ លោក កឹម សុខា បាននាំយកអំណោយទៅចែកជូនពលរដ្ឋរងគ្រោះ ដោយសារទឹកជំនន់ នៅក្រុងសិរីសោភណ្ឌ ខេត្តបន្ទាយមានជ័យ នៅព្រឹកថ្ងៃទី២០ តុលានេះ។ លោក កឹម សុខា បានយកជំនួយសប្បុរសធម៌ចែកជូនពលរដ្ឋរងគ្រោះជាបន្តបន្ទាប់ នារយៈពេលចុងក្រោយនេះ។
«ទៅហើយមកវិញៗ ដោយសារតែបងប្អូន រងគ្រោះព្រោះទឹកជំនន់»។ នេះជាសំណេររបស់លោក កឹម សុខា ដែលបានបង្ហោះលើហ្វេសប៊ុក អមជាមួយរូបភាព និងវីដេអូ ចែកអំណោយដល់ពលរដ្ឋរងគ្រោះ ដោយសារទឺកជំនន់ រួមមាន អង្ករ តង់កៅស៊ូ ទឹកស៊ីអ៊ីវ ទឹកក្រូច សាប៊ូ និងជែលលាងដៃជាដើម។
អំណោយទាំងនេះ គឺលោក កឹម សុខា ប្រមូលបានពីសប្បុរសជននៅក្នុង និងក្រៅប្រទេស ចែកជូនពលរដ្ឋរងគ្រោះ ២០០គ្រួសារ នៅសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ អមជាមួយការចែកអំណោយ អតីតមេដឹកនាំបក្សប្រឆាំងរូបនេះ បានផ្ញើសារដូច្នេះថា៖«អ្វីដែលជាកុសល យើងគួររួមគ្នាធ្វើ អ្វីដែលជាជម្លោះ យើងគួរនាំគ្នាជម្រុះ ទើបមានកិត្តិយស ជាតិយើងរឹងមាំ»។
បើគិតចាប់ពីថ្ងៃទី២៨ កញ្ញាមក លោក កឹម សុខា បានយកស្បៀង និងសម្ភារចុះចែកប្រជាពលរដ្ឋរងគ្រោះនៅតាមបណ្ដារាជធានី-ខេត្តជាបន្តបន្ទាប់ ក្នុងនោះរួមមានខេត្តព្រះសីហនុ បាត់ដំបង និងភ្នំពេញ។
នៅថ្ងៃទី២១ និង២២ តុលា សម្ដេចនាយករដ្ឋមន្ត្រី ហ៊ុន សែន ក៏នឹងជួបពលរដ្ឋរងគ្រោះដោយសារទឹកជំនន់នេះដែរ មុននឹងត្រឡប់មកដឹកនាំប្រជុំពេញអង្គគណៈរដ្ឋមន្ត្រី នៅថ្ងៃទី២៣ តុលា។«ខេត្តបន្ទាយមានជ័យជាខេត្តដែលរងគ្រោះធ្ងន់ជាងគេនិងយូរជាងគេដែលចាំបាច់ត្រូវផ្តល់អទិភាពសង្គ្រោះផងនិងស្តារឡើងវិញក្រោយទឹកជំនន់ផង»។ នេះជាសាររបស់នាយករដ្ឋមន្ត្រី ហ៊ុន សែន។
ពលរដ្ឋប្រមាណ២ម៉ឺនគ្រួសារ រងគ្រោះដោយជំនន់ទឹកភ្លៀង នៅខេត្តបន្ទាយមានជ័យ។ ក្នុងនោះមានអ្នកស្លាប់១៥នាក់ ដោយសារគ្រោះធម្មជាតិនេះ។ បើតាមរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ អ្នកស្លាប់ដោយសារទឹកជំនន់ទូទាំងប្រទេស មានចំនួន២៥នាក់ គិតត្រឹមថ្ងៃទី១៩ តុលា៕
Tag:
កឹម សុខា
នយោបាយ
© រក្សាសិទ្ធិដោយ thmeythmey.com
