គម្រោងផ្លូវ៣៨ខ្សែក្នុងក្រុងសៀមរាបប៉ះពាល់ផ្ទះនិងសំណង់ពលរដ្ឋជាង៥ពាន់កន្លែង

ជាតិ

សង្គមជាតិ

គម្រោងផ្លូវ៣៨ខ្សែក្នុងក្រុងសៀមរាបប៉ះពាល់ផ្ទះនិងសំណង់ពលរដ្ឋជាង៥ពាន់កន្លែង

23, Oct 2020 , 7:59 am

រូបភាព

លោក ទៀ សីហា អភិបាលខេត្តសៀមរាបផ្តល់បទសម្ភាសឱ្យសារព័ត៌មានថ្មីៗ នៅសាលាខេត្តសៀមរាប កាលពីថ្ងៃ២០តុលា ឆ្នាំ២០២០។

ដោយ: អ៊ូ សុខមាន (OU Sokmean)

សៀមរាប៖ គម្រោងធ្វើផ្លូវទាំង៣៨ខ្សែនៅក្នុងក្រុងសៀមរាប បានប៉ះពាល់ផ្ទះនិងសំណង់នានារបស់ពលរដ្ឋជាង៥ពាន់កន្លែងក្នុងនោះមានផ្ទះចន្លោះពី ១៧០ ទៅ ១៨០ខ្នង ត្រូវប៉ះពាល់ស្ទើរទាំងស្រុង។ នេះជាការលើកឡើងរបស់លោក ទៀ សីហា អភិបាលខេត្តសៀមរាបក្នុងបទសម្ភាសផ្តាច់មុខមួយជាមួយសារព័ត៌មានថ្មីៗកាលពីថ្ងៃទី២០តុលា។

សូមទស្សនាកិច្ចសម្ភាសរវាង រវាងកញ្ញា អ៊ូ សុខមាន នៃសារព័ត៌មានថ្មីៗ និងលោក ទៀ សីហា អភិបាលខេត្តសៀមរាបដូចតទៅ៖

អត្ថបទទាក់ទង

រដ្ឋាភិបាលសម្រេចកញ្ចប់ថវិកា១៥០លានដុល្លារសម្រាប់កសាងផ្លូវ៣៨ខ្សែក្នុងទីរួមខេត្តសៀមរាប

រាជរដ្ឋាភិបាល បានអនុម័តកញ្ចប់ថវិកា ១៥០លានដុល្លារអាមេរិកសម្រាប់គម្រោងសាងសង់ផ្លូវចំនួន៣៨ខ្សែក្នុងទីក្រុងសៀមរាបនៅដើមខែកញ្ញាកន្លងទៅ។

បើតាមការលើកឡើងរបស់អភិបាលខេត្តសៀមរាបលោក ទៀ សីហា គម្រោងផ្លូវសាធារណៈទាំង៣៨ខ្សែដែលកំពុងអនុវត្តនេះបានប៉ះពាល់ដល់ផ្ទះ និងសំណង់នានារបស់ពលរដ្ឋរហូតដល់ ប្រាំពាន់កន្លែងឯណោះ។

ប៉ុន្តែអភិបាលខេត្តសៀមរាបរូបនេះបានថ្លែងថា ភាគច្រើនប្រជាពលរដ្ឋដែលបានរងផលប៉ះពាល់ទាំងនោះបានស្ម័គ្រចិត្តរុះរើសំណង់ទាំងនោះដោយខ្លួនឯង។

«ជាទូទៅយើងឃើញថា ភាគច្រើនគឺប្រជាពលរដ្ឋស្ម័គ្រចិត្ត ក្នុងការរុះរើដោយផ្ទាល់។ ខ្ញុំគិតថា នេះជាកត្តាមួយដែលយើងឃើញថា ប្រជាពលរដ្ឋក្នុងខេត្តសៀមរាបរបស់យើងរង់ចាំឱកាសនេះក្នុងការស្ថាបនាផ្លូវនៅក្នុងក្រុងសៀមរាបរបស់យើង ផងដែរ»។ លោក ទៀ សីហា មានប្រសាសន៍ដូច្នេះ។

លោកបន្តដូច្នេះថា៖ «មានតិចតួចបំផុតដែលប្រជាពលរដ្ឋមានការតវ៉ា[លើការធ្វើផ្លូវចំនួន៣៨ខ្សែ] ដោយសារ វាមានការប៉ះពាល់ធំ ដែលមានខ្លះប៉ះពាល់ដល់អាគារ ខ្លះប៉ះពាល់ដល់សសរគ្រឹះរបស់ផ្ទះពួកគាត់»។

ការសាងសង់ផ្លូវទាំង៣៨ខ្សែដែលនឹងបញ្ចប់នៅចុងឆ្នាំ២០២១ខាងមុខនេះ គឺជាគម្រោងមួយ ក្នុងចំណោមគម្រោងផ្សេងទៀតដែលស្ថិតនៅក្នុងផែនការមេអភិវឌ្ឍវិស័យទេសចរណ៍ខេត្តសៀមរាបឆ្នាំ២០២០ដល់ឆ្នាំ២០៣៥។

លោក ទៀ សីហា បាននិយាយថា នៅពេលដែលផ្លូវទាំងនេះ លេចចេញរូបរាងឡើងតាមការគ្រោងទុក អ្នកទទួលផលប្រយោជន៍ពីផ្លូវថ្មីទាំងនេះធំជាងគេ គឺប្រជាពលរដ្ឋរស់នៅក្រុងសៀមរាបផ្ទាល់តែម្តង។

លោកពន្យល់ដូច្នេះ៖ «នៅក្នុងក្រុងសៀមរាបយើង មាន ប្រជាពលរដ្ឋជិត៣០ម៉ឺននាក់ ក្នុងនោះប្រតិបត្តិករវិស័យទេសចរយើង មានច្រើន។ ការងារធ្វើ[ធ្វើផ្លូវទាំងនេះ] នឹងអាចជួយដល់វិស័យទេសចរណ៍។ អ៊ីចឹង! បងប្អូនប្រជាពលរដ្ឋដែលជាអ្នកទទួលនេះ គឺនឹងអាចមានទាំងផ្ទះ ទាំងមុខផ្ទះ ទាំងផ្លូវថ្នល ផ្លូវដើរ គឺបានសមស្របតាមអ្វីដែលយើងបានគ្រោងទុក។ ជាពិសេស គឺផាសុកភាពរបស់បងប្អូនប្រជាពលរដ្ឋដែលរស់នៅក្នុងសៀមរាបផ្ទាល់តែម្តង»។

បើតាមប្រសាសន៍របស់អភិបាលខេត្តរូបនេះ បច្ចុប្បន្ននេះផ្ទះនិងសំណង់នានារបស់ប្រជាពលរដ្ឋដែលរងផលប៉ះពាល់ពីការសាងសង់ផ្លូវ៣៨ខ្សែក្នុងក្រុងសៀមរាបនេះចន្លោះពី៦០ទៅ៧០ភាគ ត្រូវបានរុះរើហើយ ដោយមានកិច្ចសហការយ៉ាងល្អរវាងអាជ្ញាធរ និងប្រជាពលរដ្ឋផ្ទាល់៕