ជាតិ
សង្គមជាតិ
ពលរដ្ឋ៣នាក់ ត្រូវចាប់ខ្លួន ពេលទៅផ្ដុំគ្នានៅមុខស្ថានទូតចិន ដើម្បីទាមទារឲ្យគោរពកិច្ចព្រមព្រៀងសន្តិភាពទីក្រុងប៉ារីស ក្រុមអ្នកទាមទារត្រូវសមត្ថកិច្ចឃាត់ខ្លួននៅថ្ងៃទី២៣តុលា ២០២០ នៅមុខស្ថានទូតចិន។ (រូបពីទំព័រហ្វេសប៊ុករបស់លោកស្រី ចក់ សុភាព)
× ភ្នំពេញ៖ សមត្ថកិច្ចឃាត់ខ្លួនអ្នកតវ៉ា៣នាក់ ខណៈក្រុមពួកគេប្រមាណ១០០នាក់បានប្រមូលផ្ដុំគ្នានៅមុខស្ថានទូតចិន នាព្រឹកទី២៣ ខែតុលា ឆ្នាំ២០២០ ដើម្បីទាមទារឲ្យរដ្ឋាភិបាលនៃប្រទេសមហាអំណាចមួយនេះ ចូលរួមគោរពកិច្ចព្រមព្រៀងសន្តិភាពទីក្រុងប៉ារីស។ នៅថ្ងៃទី២៣ ខែតុលា ឆ្នាំ២០២០នេះ គឺជាខួប២៩ឆ្នាំនៃការបង្កើតកិច្ចព្រមព្រៀងសន្តិភាពទីក្រុងប៉ារីស។
អ្នកស្រី ចក់ សុភាព នាយិការនៃមជ្ឈមណ្ឌលសិទ្ធិមនុស្សកម្ពុជា (CCHR) ប្រាប់សារព័ត៌មានថ្មីៗតាមទូរស័ព្ទថា អ្នកទាំង៣នាក់ដែលត្រូវអាជ្ញាធរចាប់ខ្លួន គឺ មានស្ត្រី២នាក់ និងបុរសម្នាក់។ អ្នកស្រី សម្តែងការសោកស្តាយយ៉ាងខ្លាំង ដែលសមត្ថកិច្ចតែងតែយាយីដល់ក្រុមអ្នកតវ៉ាឬការជួបជុំរបស់ប្រជាពលរដ្ឋ។
ប្រធានអង្គការផ្នែកសិទ្ធីមនុស្សរូបនេះ មានប្រសាសន៍ថា៖«កន្លងមករាល់ពេលដែលមានការជួបជុំ អាជ្ញាធរតែងតែធ្វើការរឹតត្បិត មិនរៀបចំបង្កឲ្យមានភាពអំណោយផលដល់ក្រុមអ្នកទាមទារឡើយ»។
ក្រោយចាកចេញពីស្ថានទូតចិន ប្រជាពលរដ្ឋទាំងនោះ បាននាំគ្នាបន្តទៅស្ថានទូតនៃប្រទេសមហាអំណាចមួយទៀត គឺស្ថានទូតអាមេរិក ដើម្បីយកញត្តិទៅដាក់។ ក្នុងញត្តិនោះ ពួកគាត់ សុំឲ្យរដ្ឋាភិបាលអាមេរិក ជំរុញប្រទេសទាំងអស់ជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស បើកកិច្ចប្រជុំជាថ្មី លើខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស ព្រោះពួកគាត់ យល់ថា រដ្ឋាភិបាលកម្ពុជា បានដើរចេញឆ្ងាយពីខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស។
លើសពីនេះ ពួកគេ សរសេរក្នុងញត្តិថា ពួកគាត់ជាប្រជាពលរដ្ឋខ្មែរ ប្រឆាំងដាច់ខាតនឹងចិន ដែលមានបំណងមកបោះទីតាំងកងទ័ពនៅលើផែរាមខេត្តព្រះសីហនុ និងនៅតាមតារាសាគរខេត្តកោះកុង។ តាមរយៈញត្តិ ពួកគាត់ ថែមទាំងស្នើឲ្យរដ្ឋាភិបាលអាមេរិក ធ្វើអន្តរាគមន៍ទៅរដ្ឋាភិបាលចិន ដើម្បីឲ្យឈប់គាំទ្រអំណាចបុគ្គល គឺសំដៅលើសម្តេចនាយករដ្ឋមន្រ្តី ហ៊ុន សែន។
ប្រជាពលរដ្ឋ ក៏បានយកញត្តិទៅដាក់នៅស្ថានទូតបារាំងដែរ ដែលស្ថិតនៅជិតស្ថានទូតអាមេរិក គឺខាងលិចស្ថានទូតអាមេរិក។ ញត្តិ ដែលដាក់នៅស្ថានទូតបារាំង គឺមានខ្លឹមសារដូចគ្នាទាំងស្រុង ទៅនឹងញត្តិ ដែលដាក់នៅស្ថានទូតអាមេរិក។
មិនមែនតែម្តងឡើយ ដែលរដ្ឋាភិបាល ចេញមកប្រកាសប្រាប់ប្រជាពលរដ្ឋ និងអង្គការអន្តរជាតិ ថា កម្ពុជា មិនបានអនុញ្ញាតឲ្យចិន បង្កើតមូលដ្ឋានកងទ័ពលើទឹកដីកម្ពុជា។ ក្នុងពិធីសំណេះសំណាលជាមួយមន្ត្រីរាជការ និងក្រុមការងារស្ថាបនាហេដ្ឋារចនាសម្ព័ន្ធផ្លូវក្រុង ក្នុងខេត្តព្រះសីហនុ កាលពីខែមិថុនា ឆ្នាំ២០២០ ប្រមុខរដ្ឋាភិបាល បំភ្លឺថា៖«យើង គ្មានគោលការណ៍ណាមួយ ដើម្បីនឹងផ្តល់ឲ្យបរទេស ប្រើប្រាស់នូវមូលដ្ឋាន [ទ័ព] ក្នុងប្រទេសយើង ដែលផ្ទុយនឹងរដ្ឋធម្មនុញ្ញរបស់យើងទេ»។
ប្រមុខរដ្ឋាភិបាល បន្ថែមទៀតថា៖«កម្ពុជា សុំបញ្ជាក់ជាថ្មីថា កម្ពុជា ជាប្រទេសឯករាជ្យនិងអធិបតេយ្យភាព។ កម្ពុជា មិនចូលរួមជាមួយអ្នកនេះ ប្រឆាំងនឹងអ្នកនោះ។ [យើង] មិនអនុញ្ញាតឲ្យមានទីតាំងយោធាបរទេសនៅលើទឹកដីរបស់ខ្លួន ហើយយើង ក៏មិនបោះទីតាំងយោធារបស់យើង នៅលើទឹកដីបរទេសដែរ...»។
ចិន អាមេរិក និង បារាំង សុទ្ធតែជាហត្ថលេខីក្នុងការបង្កើតកិច្ចព្រមព្រៀងសន្តិភាពទីក្រុងប៉ារីស។ ប្រទេសទាំងអស់ ដែលចូលរួមធ្វើជាហត្ថលេខីជាមួយភាគីកម្ពុជា ក្នុងការបង្កើតកិច្ចព្រមព្រៀងសន្តិភាពទីក្រុងប៉ារីស មាន១៨។ ប្រទេសទាំង១៥ទៀត គឺ អូស្ត្រាលី ព្រុយណេ កាណាដា ឥណ្ឌា ឥណ្ឌូនេស៊ី ជប៉ុន ឡាវ ម៉ាឡេស៊ី ហ្វីលីពីន សិង្ហបុរី ថៃ សហភាពសូវៀត អង់គ្លេស វៀតណាម និង យូហ្គោស្លាវី។
កិច្ចព្រមព្រៀងសន្តិភាពទីក្រុងប៉ារីស ដែលបង្កើតឡើង កាលពីថ្ងៃទី២៣ ខែតុលា ឆ្នាំ១៩៩១ នៅទីក្រុងប៉ារីស ប្រទេសបារាំង គឺកើតចេញពីការស្រុះស្រួលរវាងភាគីខ្មែរទាំង៤ គឺរដ្ឋាភិបាលនៃរដ្ឋកម្ពុជា ហ្វ៊ុនស៊ិនប៉ិច រណសិរ្សជាតិរំដោះប្រជាពលរដ្ឋខ្មែរ និងខ្មែរក្រហម។ ក្នុងន័យជារួម កិច្ចព្រមព្រៀងសន្តិភាពទីក្រុងប៉ារីស ត្រូវបានបង្កើតឡើង ដើម្បីបញ្ចប់សង្គ្រាមនៅកម្ពុជា ហើយផ្សះផ្សារ បង្រួមបង្រួម និង កសាងប្រទេសជាតិឡើងវិញ។ កិច្ចព្រមព្រៀងសន្តិភាពទីក្រុងប៉ារីស ថែមទាំងត្រូវឲ្យកម្ពុជា ប្រកាន់យកនូវលទ្ធិប្រជាធិបតេយ្យសេរីពហុបក្ស និងការគោរពសិទ្ធិមនុស្ស៕
Tag:
កិច្ចព្រមព្រៀងសន្តិភាពទីក្រុងប៉ារីស
ចាប់អ្នកតវ៉ា
© រក្សាសិទ្ធិដោយ thmeythmey.com